སྔ་འགྱུར་བསྟན་པའི་སྲོག་མཐུད་སྐྱབས་རྗེ་གྲུབ་པའི་དབང་ཕྱུག་པདྨ་ནོར་བུ་མཆོག་ལ་རྗེས་སུ་ཕྱོགས་པའི་བསྟོད་སྨོན་ཞབས་བརྟན་ཟུང་འབྲེལ་དོན་མཐུན་མདོང་མཐའ་དགའ་བའི་ཟློས་གར་ཞེས་བྱ་བ།
མཛད་པ་པོ། རྫོགས་ཆེན་པདྨ་སྐལ་བཟང་།
གྲངས་མེད་སྐལ་པའི་སྔོན་ནས་སངས་རྒྱས་ཀྱང་།།
བརྩེ་ཆེན་སྙིང་རྗེས་ལྔ་བརྒྱ་ཐ་མའི་འགྲོར།།
བྱང་ཆུབ་ཞི་བ་དམ་པའི་ལམ་སྟོན་པ།།
རྒྱལ་བ་དོན་ཀུན་གྲུབ་པ་ལ་ཕྱག་འཚལ།།
རབ་འབྱམས་རྒྱལ་བ་ཀུན་གྱི་གསང་གསུམ་འཕྲུལ།།
སིནྡྷུའི་དྭངས་མཚོར་འཕོས་པའི་ཡ་མཚན་གར།།
འཆི་མེད་རྟག་པ་དམ་པའི་སྐུ་འཆང་བ།།
པད་འབྱུང་རྒྱལ་བ་གཉིས་པ་རྒྱལ་གྱུར་ཅིག།
མ་ལུས་ཕྱོགས་དུས་རྒྱལ་བའི་ཡེ་ཤེས་དཔྱིད།།
ཀུན་ཁྱབ་མཁའ་ཡི་རྡོ་རྗེ་སྒྱུ་མའི་འཕྲུལ།།
མི་ཟད་བློ་གྲོས་གཏེར་འཆང་གཞོན་ནུའི་གཟུགས།།
འཇམ་དཔལ་སྨྲ་བའི་ཉི་མས་དགེ་ལེགས་སྩོལ།།
