 |
འབུམ་རམས་པ་དོལ་པོ་དགེ་བཤེས་ཆོས་འཁོར་ཚང་ཉི་མ་འོད་ཟེར། |
སྨྱུག་སྡེ། དགེ་བཤེས་མཆོག་ལ་འཚམས་འདྲི་ཞུ་བ་དང་འབྲེལ་སྐུ་ཉིད་ཀྱི་ངོ་སྤྲོད་དང་ལྷན་སྙན་ངག་ལ་འབྲེལ་འདྲིས་ཇི་ལྟར་བྱས་ཚུལ་མདོར་བསྡུས་ཤིག་གསུང་རོགས།
འབུམ་རམས་པ་དགེ་བཤེས་ཆོས་འཁོར་ཚང་རིན་པོ་ཆེ། བཀྲ་ཤིས་བདེ་ལེགས། ང་དོལ་པོ་བྱི་གཅེར་ནས་ཡིན། བོན་གཞིས་ཉིན་སློབ་ཀྱི་འཛིན་གྲྭ་བརྒྱད་པ་ཐོན་རྗེས་བོན་གྱི་གདན་ས་སྨན་རིའི་གླིང་ནས་དགེ་བཤེས་བཏང་པ་ཡིན། ད་སྐབས་ཡུ་རོབ་ཅེག་སྤྱི་མཐུན་རྒྱལ་ཁབ་(Czech Republic)ཀྱི་ཆར་ལེ་སི་(Charles University)གཙུག་ལག་སློབ་གཉེར་ཁང་ཆེན་མོར་དགེ་རྒན་གྱི་བྱ་བ་གཉེར་བཞིན་ཡོད། སྤྱིར་བཏང་ང་ལ་སྙན་ངག་གི་ངོ་སྤྲོད་ལྟ་བུ་ཞིག་ནི། ཉིན་སློབ་ཀྱི་སློབ་ཚན་ཁག་ཏུ་རང་བཞིན་བརྗོད་པའི་རྒྱན་སོགས་ནས་དོན་རྒྱན་ཁ་ཤས་ཤིག་བཀོད་ཡོད་པ་དེ་དག་ལས་ཐོག་མར་ཐོབ་བྱུང་། དེ་མཚམས་བཤད་གྲྭར་ཞུགས་རྗེས་སྦྱོང་ཚན་ལྟར་སྙན་དངགས་དངོས་སུ་སྦྱངས་པ་ཡིན། འོན་ཀྱང་དེ་ལ་དབྱིངས་ཞུགས་རྒྱུ་འདྲ་བོ་ཞིག་དགེ་འདུན་ཆོས་འཕེལ་དང་དོན་འགྲུབ་རྒྱལ་སོགས་ཀྱི་རྩོམ་ཡིག་ཁག་བཀླགས་ནས་བྱུང་སོང་། སྐབས་མཚམས་དེར་ཕ་ཡུལ་ལ་ཚར་གཅིག་བསྐོར་བསྐྱོད་བྱས་པ་ཡིན། དེས་བདག་གི་སློབ་གཉེར་བྱེད་སྟངས་ཀྱི་ཁ་ཕྱོགས་ལ་འགྱུར་བ་ཞིག་བཏང་སོང་བས། ཚུར་དགོན་པར་ལོག་མཚམས་རིག་གནས་འཛིན་གྲྭ་མར་བབས་ནས་སྙན་དངགས་བསྐྱར་སྦྱོང་བྱས་པ་ཡིན།
