སེམས་པ་དགུན་གྱི་རླུང་བུ་ཪེད་ཤག

བསྟན་འཛིན་ཆོས་འཕེལ། རྣམ་གྲོལ་གླིང་།

ཤུགས་ཀྱིས་ལྡང་བའི་དགུན་ལྷགས་འདིས།།

སྟོན་ལོ་སེར་པོ་འབྲུལ་སྟངས་ལས།།

ཙག་གིས་བྱིད་པའི་སྙིང་ཆུང་ཡང་།།

རྒྱང་ལ་འབྱེར་འདོད་ཚུགས་ཀ་རང་།།

ཞོགས་པའི་ཅོང་བརྡ།

ས་ལྡང་པདྨ་རྒྱལ་མཚན། སྔ་འགྱུར་མཐོ་སློབ་ཆེན་མོ།

ཀྱེ་མ།

དེ་རིང་གི་ཞོགས་པའི་ཅོང་བརྡས།

གཉིད་ཀྱི་མུན་ནང་དུ་ཐིམས་པའི།

ཁྲ་ཁྲ་དང་མཛེས་མཛེས།

དགའ་དགའ་དང་སྐྱིད་སྐྱིད་ཀྱི་མུན་རུམ་ན་ཉུལ་བཞིན་པའི་རྨི་ལམ་ཡང་།

ལ་མོ་ཐོན་པོ་ཞིག་དང་། གཞུང་ལམ་རིང་མོ་ཞིག་གི་ཕ་རོལ་ཏུ། བརླག་པར་བྱས།

རེ་ཞིག སྙིང་ཆུང་དམར་པོའི་ཕར་མཚམས་ཡང་།

ཇེ་མགྱོགས་སུ་སོང་།

ཅི་འདྲའི་ཚེར་བ་ལ་ཨང་།

གནས་བརྟན་ཕྱག་མཆོད་གསར་པ།

ཐོད་རྒལ་བ། རྣམ་གྲོལ་གླིང་།

ཐུབ་བསྟན་གླིང་གི་རྒྱབ་ངོས་ན།།

གྱད་ཀྱི་མི་བུ་"རིག་འཛིན་"བཞུགས།།

ལྷག་བསམ་ཁྲི་དང་འབུམ་གྱིས་བསྐོར།།

གཙང་ཕྱགས་བསམ་པ་ཁོག་ན་འཆང་།།

ཡང་སྲིད་བླ་མའི་འཁྲུངས་སྐར་བསུའོ།།

རོང་ཕྲུག སྔ་འགྱུར་མཐོ་སློབ་ཆེན་མོ།

བི་མའི་རྣམ་སྤྲུལ་ཉི་ཟེར་གཞོན་ནུ།།

གངས་དཀར་ཏི་སེའི་ཕྱོགས་སུ་མ་བཞུགས།།

པད་ངན་ང་ཚོ་ཁྱེད་ལ་གཅེར་ནས།།

རྒྱ་གར་རྒྱ་མཚོའི་ངོགས་ནས་སྒུག་ཡོད།།

པདྨའི་རང་མདངས་ལགས།

པདྨ་བཀྲ་ཤིས། སྔ་འགྱུར་མཐོ་སློབ་ཆེན་མོ།

པདྨའི་རང་མདངས་ལགས།

ཁྱེད་སླར་ཡང་ང་ཚོའི་ཆེད་དུ་ཕེབས་པར་དགའ་བས་བསུ།

ཁྱེད་ནི་ཆེས་ཟབ་པའི་མན་ངག་གི་བདུད་རྩི་ཡིན་ཞིང་།

ལེགས་ཉེས་ཤན་འབྱེད་ཀྱི་རལ་གྲི་ཡིན་ལ།

བླང་དོར་མིག་འབྱེད་ཀྱི་བཤེས་གཉེན་ཡང་ཡིན།

འཛམ་གླིང་འདི་ཡི་ནང་སྡིངས་ཆ་ཆེ་ཤོས་ནང་གི་ཟབ་ཤོས་ནི་ཁྱེད་ཉིད་མིན་ན་སུ་རེད།

དོལ་པོ་བཙག་ཁང་དགོན་པ་བདེ་ཆེན་བླ་བྲང་ལ་བསྟོད་པ་འཇམ་དབྱངས་དགྱེས་པའི་སྙན་གདངས།

ཕྲིན་ལས་རྡོ་རྗེ། བལ་ཡུལ་དོལ་པོ།

དོལ་པོ་ཤེལ་རི་མཆོག་སྤྲུལ་སྐུ་ཕྲེང་རིམ་བྱོན་གྱི་གདན་ས་ཆེན་མོ།

ཐོས་ཐོས་བླ་མའི་མན་ངག་ཐོས།།

བསམ་བསམ་བླ་མའི་མན་ངག་བསམ།།

བསྒོམ་བསྒོམ་བླ་མའི་རྣལ་འབྱོར་བསྒོམས།།

དེ་གསུམ་རྫོགས་པ་ཤེལ་རི་བ།།

མཆོག་གི་སྤྲུལ་སྐུར་ཕྱག་གིས་འདུད།། 

༄༅། །ཇོ་ནང་དང་ཀམ་ཚང་གི་འབྲེལ་བ།

རྩོམ་པ་པོ། རྩིས་ཆེ་ལེགས་མཐོང་།

ཡོང་ཁུངས།: འོད་འཛིན་རྩོམ་སྟེགས།

ང་ལ་མཚོན་ན། མེ་ཏོག་གང་ལ་ཕོག་པའི་ལྷ་སྐལ་ལྟ་བུར་གྱུར་པའི་ཆོས་བརྒྱུད་ནི། སྒྲུབ་བརྒྱུད་ཀརྨ་ཀམ་ཚང་ཡིན་ན་ཡང་། ཇོ་ནང་པའི་ཆོས་བརྒྱུད་དང་ཀརྨ་ཀམ་ཚང་གཉིས་ཀྱི་ཆོས་དང་དམ་ཚིག་གི་འབྲེལ་བ་ནི་ཆེས་སྔ་མོ་ནས་ཡོད་པ་ཞིག་རེད། ངས་བསམས་ན་ཇོ་ནང་དང་ཀམ་ཚང་གི་འབྲེལ་བ་དང་ཤོས་ནི། བྱང་སེམས་རྒྱལ་བ་ཡེ་ཤེས་ལ་བརྟེན་ནས་བྱུང་བར་མངོན་ཏེ། བྱང་སེམས་རྒྱལ་བ་ཡེ་ཤེས་ནི་གྲུབ་ཐོབ་ཆེན་པོ་ཀརྨ་པཀྵིས་དགོས་པ་ཆེན་པོ་ཡོད་པར་གསུངས་ནས། ཡབ་ཀྱི་ས་ནས་བསླངས་ནས་ཆོས་སྒོར་བཅུག ཀརྨ་པཀྵིའི་གསོལ་ཇ་བ་ཡུན་རིང་གནང་བའི་རིང་། ཀརྨ་པཀྵིས་ཕ་ཡི་བུ་བཞིན་དུ་བསྐྱངས་ཏེ། ཀརྨ་ཀམ་ཚང་གི་ལུགས་གཙོ་བོར་གྱུར་པའི་དབང་དང་མན་ངག་མང་པོ་ཞིག་གནང་བའི་རྗེས་སུ་རྟེན་འབྲེལ་ཁྱད་པར་ཅན་ཡོད་གསུངས་ནས། ཀུན་སྤངས་ཐུགས་རྗེ་བརྩོན་འགྲུས་ཀྱིས་གསར་དུ་ཕྱག་བཏབ་པའི་ཇོ་ནང་གི་གདན་སར་མངགས་པས། ཇོ་ནང་གི་ཁྲི་རབས་གཉིས་པ་དང་། ཡོངས་གྲགས་སུ་ཇོ་ནང་གི་ཐོག་མའི་བླ་རབས་གསུམ་དུ་གྲགས་པའི་གཅིག་ཏུ་གྱུར། དེར་བརྟེན་བྱང་སེམས་རྒྱལ་བ་ཡེ་ཤེས་ནི་ཀརྨ་ཀམ་ཚང་གིས་གསོ་སྐྱོང་གནང་སྟེ། ཆོས་བརྒྱུད་གཞན་ལ་ཕུལ་བའི་ནང་ནས་མི་སྣ་རླབས་ཆེ་ཤོས་ཤིག་ཏུ་གྱུར་པའོ། །སྐབས་དེ་ནས་བཟུང་ཇོ་ནང་དང་ཀམ་ཚང་གཉིས་ཀྱི་འབྲེལ་བ་བྱུང་བས། ད་ལྟ་ཀམ་ཚང་གི་བརྒྱུད་པ་ལ་དུས་འཁོར་གྱིས་མཚོན་པའི་ཇོ་ནང་གི་ཆོས་ཡོད་ཅིང་། ཇོ་ནང་གི་བརྒྱུད་པ་ལ་ཀམ་ཚང་གི་བླ་མ་ཡང་བཞུགས་པ་དེས་འདི་གཉིས་ཀྱི་འབྲེལ་བ་ནི་དམ་ཚིག་གཙང་ཞིང་ཕན་ཚུན་ཤན་ཞུགས་ཐལ་མ་དྲགས་པའི་འབྲེལ་བ་བཟང་པོ་ཞིག་གོ།