འགྲོ་བའི་མུན་སེལ། [རྙིང་པ།]

རྩོམ་པ་པོ། དོལ་པོ་ཉི་བསམ། (སེར་བྱེས་སློབ་གྲྭ།)

ངུར་སྨྲིག་གསར་པའི་འོད་ཀྱི་ཟེགས་མའི་

ཁད་ནས་ལྡང་བའི་ངལ་སེལ་རླུང་།།

མཐོན་མཐིང་མཁའ་ཡི་དབྱིངས་ནས་བྱམས་དང་

བརྩེ་བའི་འདབ་ཟུང་དེས།། 

ས་ཡི་གོ་ལའི་ཁྱོན་དུ་འཕུར་ཏེ་

ཕྱོགས་མཐར་ཕྱག་ཟུང་བཏེགས་ནས་ནི།། 

མི་རིགས་མི་གཅིག་ཁྲི་མ་འབུམ་གྱི་

སེམས་སུ་བབས་ཏེ་བདེ་སྐྱིད་སྐྲུན།།

མཐོ་སྒང་གི་ཉི་མ་སེར་པོ།

རྩོམ་པ་པོ། སྡེ་དགེ་སྐལ་བཟང་།

ཞི་བདེའི་ཕུག་རོན་འཕགས་པའི་ཡུལ་ན་ཡོད།།

སྙན་པའི་གྲགས་པ་འཛམ་གླིང་ཁྱོན་ན་ཡོད།།

མཛད་པ་ཆེན་པོས་འགྲོ་དྲུག་སྐྱོངས་བཞིན་ཡོད།།

དུས་ཀྱི་དེད་དཔོན་༸སྐྱབས་མགོན་རིན་པོ་ཆེ།།

འཛམ་གླིང་འདི་ཡི་ཉི་མ་སེར་པོ་ཡིན།།

རྨི་ལམ་ནང་རྩ་བའི་བླ་མ་རྡོ་གྲུབ་ཆེན་རིན་པོ་ཆེ་མཇལ་བ།

_____དོལ་པོ་ཧཱུྃ་ཏྲཱཾ་པ་སྲས་ནམ་མཁའི་རྡོ་རྗེ།

༢༠༢༠/༡༡/༢༣ 

   རབ་གནས་ལྕགས་བྱི་ལོའི་སྨིན་དྲུག་ཟླ་བའི་ཚེས་བཅུའི་ཐོ་རངས་རྨི་ལམ་འདི་འདྲ་ཞིག་རྨིས། ང་དང་ངའི་ཨ་མ་ལགས་གཉིས་དད་ལྡན་པ་མང་པོ་ཞིག་དང་མཉམ་དུ་ཁ་ལྷོ་ནུབ་ལ་གཏད་དེ་ཆས་བཞིན་འདུག གང་འཚམ་ཞིག་ནས་བདག་ཅག་གི་རྩ་བའི་བླ་མ་༧སྐྱབས་རྗེ་རྡོ་གྲུབ་ཆེན་རིན་པོ་ཆེ་མཆོག་ཕྱག་ཕྱི་བ་འགས་ཕྱག་གཡས་གཡོན་ནས་སྐྱོར་ཏེ་ཞབས་ཐང་ལ་རྒྱབ་ནས་ངེད་ཕྱོགས་སུ་ཕེབས་ཀྱིན་འདུག ཨ་མ་དང་ང་ནི་བླ་མ་མཇལ་བའི་དགའ་བས་མྱོས་པ་ལྟ་བུར་གྱུར་འདུག་ཅིང་། ལམ་སང་ཕྱག་ཕུལ། བྱིན་རླབས་ཞུས། བླ་མས་ཀྱང་ཧ་ཅང་ཐུགས་མཉེས་མཉེས་ཀྱི་རྣམ་འགྱུར་དང་བཅས་བཀའ་མོལ་གནང་ཞིང་མུ་མཐུད་ཕེབས་ཞོར་ཕྱག་གཡོན་པ་གུས་ཆུང་ལ་གཏད་པར་ངས་ཀྱང་དགའ་དད་སྤྲོ་གསུམ་གྱིས་མིག་མཆི་མ་འཁྲུག་པ་དང་བཅས་ཕྱག་ནས་བརྟེན་བཞིན་མདུན་ཕྱོགས་སུ་བསྐྱོད། སྐབས་རེ་བླ་མ་རིན་པོ་ཆེ་ངེད་རྣམས་ཀྱིས་སྐྱོར་མི་དགོས་པར་སྐུ་རྐྱང་དུ་སྟབས་བདེ་མོས་ཕེབས་མཛད། སྤྱིའི་ཆ་ནས་སྐུ་གཟུགས་བོངས་སྔར་ལས་ཅུང་ཆུང་ཞིང་དབུ་ཏོག་ཙོག་ཙམ་སྒུར་བའི་རྣམ་པ་འདུག་པས། སྐུ་ན་བགྲེས་པས་མིན་ནམ་སྙམ་པ་བྱུང་། 

བྱང་ཆུབ་སེམས་ཀྱི་གོལ་ས་བརྗོད་པའི་གཏམ་ཞི་བ་ལྷའི་སྙིང་ཐིག་བཞུགས་སོ།།

མཛད་པ་པོ། དོལ་པོ་སྤྲུལ་སྐུ་ཨོ་རྒྱན་ཆོས་དབྱིངས་ཡེ་ཤེས།

༄༅། །ཨོཾ་བོ་དྷི་ཙིཏྟ་མ་ཧཱ་སུ་ཁ་སྭཱ་ཧཱ། 

རང་ཉིད་འཕྲལ་ཕུགས་བདེ་བ་ངལ་གསོའི་སྟེགས། །

གཞན་ཕན་སྟོབས་ཤུགས་བསྐྲུན་པ་བདུད་རྩིའི་སྨན། །

འཛམ་གླིང་ཞི་བདེ་འབྱུང་བའི་རྒྱུ་གཅིག་སྟེ། །

བྱང་ཆུབ་སེམས་མཆོག་སྙིང་གི་དཀྱིལ་དུ་བསྟེན། །

ཀུན་མཁྱེན་ཇོ་ནང་པའི་དགོངས་རྫོགས་ལ་འདྲ་སྐུ་ང་འདྲ་མ་གླེང་ན།

རྩོམ་པ་པོ། སྤོས་ཁང་སྒྲོལ་བཟང་།

དེ་རིང་ནི་བོད་ཟླ་བཅུ་པའི་ཚེས་དྲུག་རེད། ཀུན་མཁྱེན་ཇོ་ནང་པ་ཆེན་པོའི་དགོངས་རྫོགས་ཀྱི་དུས་མཆོད་རེད། དེས་ན་ཁོང་གི་འདྲ་སྐུ་ང་འདྲ་མ་རྩ་ཆེན་དེའི་སྐོར་རགས་ཙམ་གླེང་ན། དེ་ཡང་རང་རེ་ནང་བསྟན་པའི་ལོ་རྒྱུས་སྟེང་བླ་མའི་སྐུ་འདྲ་བཞེངས་པའི་ལུགས་སྲོལ་ཡོད་ལ་བླ་མ་ཞལ་བཞུགས་པའི་དུས་ལ་བཞེངས་པའི་སྐུ་འདྲར་དེ་བས་དད་མོས་ཆེ་བ་བྱེད་ཀྱིན་ཡོད། དཔེར་ན་ཁ་ཆེ་པཎ་ཆེན་གྱི་འདྲ་སྐུ་དང་རྗེ་བླ་མའི་འདྲ་སྐུ་རྡོ་ཁ་མ་སོགས། དེས་ན་ཇོ་ནང་ཀུན་མཁྱེན་དོལ་པོ་པའི་འདྲ་སྐུ་ཐོག་མ་འདི་གང་དང་གང་དུ་བཞུགས་ཡོད་མེད་ཀྱི་ལོ་རྒྱུས་མདོ་ཙམ་བརྗོད་ན། བོད་ཡུལ་གྱི་ལྷ་ཁང་རྣམས་ཀྱི་གཙུག་གི་རྒྱན་དུ་གྱུར་བ་ར་ས་འཕྲུལ་སྣང་གཙུག་ལག་ཁང་ངམ་ཡོངས་མིང་ལ་ལྷ་སའི་གཙུག་ལག་ཁང་ངམ་མདོ་སྨད་ཚོས་འབོད་པའི་ཇོ་ཁང་ཞེས་པར་བཞུགས་ཡོད།

རྐུབ་སྟེགས་འདིའི་སྟེང་དུ་ཁྱེད་རང་ཁེར་རྐྱང་བསྡད་མེད།

[རྒྱ་གར་ནང་གི་སྤྱི་ཚོགས་གཏམ་བརྗོད་པ་མུ་ན་ཝར་ཛྷ་མ་ལགས་ཀྱིས་སློབ་གྲྭ་ཞིག་གི་བུ་མོའི་སྡོད་ཁང་དུ་གསུངས་པའི་ཚོར་སྣང་ཤུགས་ཆེར་འབྱིན་པའི་གཏམ་བཤད་གྲགས་ཅན།]

རྐུབ་སྟེགས་འདིའི་སྟེང་དུ་ད་ལྟ་ཁྱེད་རང་བསྡད་ཡོད་དུས་ཁྱེད་རང་ཁེར་རྐྱང་བསྡད་ཡོད་མ་རེད། སོ་སོའི་པ་ལགས་ཀྱི་རེ་བ་དང་ཨ་མ་ལགས་ཀྱི་རྨི་ལམ་ཁྱེད་ཚོ་མཉམ་དུ་བསྡད་ཡོད་རེད། ཁྱེད་ཚོ་ཁེར་རྐྱང་བསྡད་ཡོད་མ་རེད། ཕ་མའི་རེ་བ་དང་ཡིད་ཆེས་ཁྱེད་ཚོ་མཉམ་དུ་ཡོད་རེད། དེ་དག་ལ་རྡོག་རོལ་བཏང་ནས་ཁྱེད་ཚོ་འགྲོ་ཡིས་འདུག དེ་ལ་ཡང་ཡ་མེད་བཏང་ནས་འགྲོ་བཞིན་འདུག 

ཆེས་འཇིགས་སུ་རུང་བ་ནི་དགེ་རྒན་གྱིས་དཔེ་ཀློག་མི་བྱེད་པར་གང་ཐུབ་ཅི་ཐུབ་ཀྱིས་སློབ་ཁྲིད་བྱེད་པ་དེ་ཡིན།

རྩོམ་པ་པོ།  ཐང་ཡོན།

འབྲི་རུ་བ་གཡང་འགྲུབ་ཀྱིས་བསྒྱུར།

གནས་ལུགས་ལྟར་ན།  དགེ་རྒན་ནི་མ་གཞི་ནས་དཔེ་ཀློག་ལ་གཞོལ་བའི་ཚོགས་པ་ཞིག་ཡིན།  ཡིན་ནའང་རྒྱུགས་སྤྲོད་དམིགས་ཡུལ་དུ་འཛིན་པའི་སློབ་གསོ་དང་ཁེ་ཕན་གཙོ་བོ་འཛིན་པའི་སློབ་གསོའི་འགོག་རྐྱེན་འོག   ཁོ་ཚོའི་མིག་མདུན་ན་སྐར་གྲངས་ལས་མེད་ལ།  སྦྱངས་འབྲས་ལས་མེད།  སློབ་མའི་ཉོག་བཤད་ལས་མེད་དེ་མི་ཚེའི་ཁྲོད་དཔེ་ཀློག་ནི་ཉིན་རེ་ནས་ཉིན་རེ་བཞིན་ཆར་རྗེས་ཀྱི་འཇའ་ཚོན་ལྟར་ཡལ།

མཇུག་འབྲས།

 རྩོམ་པ་པོ། གླིང་ཚང་ཕྲིན་ལས་མཐར་ཕྱིན།

ཀ

སྨུག་པ་ལང་ལོང་གིས་གཏུམ་པའི་རི་སྒང་དེ་ན། རྩི་ཤིང་དང་ལྡུམ་ར་ཡིད་དུ་འོངས་པས་ཀུན་ནས་བརྒྱན་ཅིང་། དྲིལ་སྒྲ་སྙན་པོ་རེ་ཡང་བར་མཚམས་སུ་གྲག་ཡོང་བ་དང་། གནས་འདི་ན་རྒྱུ་བའི་བྱ་བྱིའུ་འདབ་ཆགས་ཀྱི་རིགས་དང་། གཡུང་དྭགས་དུད་འགྲོའི་ཚོགས་རྣམས་ཀྱང་བག་ཕེབས་ཀྱིས་དགའ་བདེའི་དཔལ་ལ་རོལ་བཞིན་མཆིས།  རང་བྱུང་ཁོར་ཡུག་གིས་སྐྱེ་འགྲོ་ཡོངས་ལ་ལེགས་སྐྱེས་ཀྱི་བྱམས་བརྩེ་བར་ཆད་མྱོང་མེད་པ་ལྟར། གནས་འདིར་ཡང་ཕྱི་རོལ་ནས་བལྟས་ན། རང་བྱུང་གི་མཛེས་སྡུག་དག་གི་འཛུམ་ཞལ་ནམ་ཡང་མཚམས་བཞག་མ་མྱོང་ལ། སྟེང་ལྷ་ཡུལ་དང་འོག་ཀླུ་ཡུལ་སོགས་ཀྱི་དཔལ་དང་ཕུན་ཚོགས་ཡོད་རྒུ་འདིར་བསྡུས་པ་ཡིན་ཞེས་བཤད་ན། ཁྱེད་ཅག་གིས་འུར་སྒྲོག་ཏུ་སྙམ་སྲིད་ཀྱང་། ངོ་མ་ཕྱོགས་ཡོངས་ནས་ཕུན་སུམ་ཚོགས་པའི་གནས་ཤིག་ཡིན།

བསྟོད་པ་དྲི་ཟའི་པི་ཝང་།

རྩོམ་པ་པོ། སློབ་དཔོན་འོད་གསལ་ཀུན་བཟང་ཆོས་འཕེལ།

དུས་གསུམ་རྒྱལ་བའི་ཐུགས་ཀྱི་ཆུ་གཏེར་ལས།།

མཚན་དཔེའི་མཛེས་སྡུག་ཆུ་ཤེལ་གསར་པའི་ཁམས།།

ཐར་འདོད་སྐྱེ་དགུ་ཡོངས་ཀྱི་དཔུང་གཉེན་ཏེ།།

གཙུག་གི་རྒྱན་དུ་བཀོད་དོ་གྲུབ་དབང་རྗེ།།

«སྟོན་མཆོག་ཐུབ་པའི་དབང་པོ།»མགྱོགས་བྲིས་མ།

རྩོམ་པ་པོ། གངས་སེང་དཀར་མོ།

ཉི་ཟླ་སྐར་གསུམ་གཅིག་ཏུ་བསྡུས་པའི་གཟུགས།།

ཞི་བསིལ་བདུད་རྩིའི་རྒྱ་མཚོ་འཁྱིལ་བ་ཡི།།

ཕན་བདེའི་རྩ་ལག་ཆོས་ཀྱི་གདུགས་དཀར་ཅན།།

སྟོན་མཆོག་ཐུབ་དབང་བུ་རམ་ཤིང་པ་ཉིད།།

ཕར་ཕྱིན་བཤེས་གཉེན་རྗེས་སུ་དྲན་པའི་བསྟོད་ཚིག

རྩོམ་པ་པོ། དོལ་པོ་ཀ་རང་བ་སྣང་རྩེ་ཚེ་དབང་ནོར་བུ། (སྔ་འགྱུར་མཐོ་སློབ་ཆེན་མོ།)

ཡབ་སྲས་བརྒྱུད་པར་བཅས་པ་རྒྱལ་ལོ།།

དུག་ལྔས་མྱོས་པའི་མཐའ་མེད་སྡུག་བསྔལ་གྱི་རྒྱ་མཚོར།།

མུ་མཐས་དབེན་པའི་རྒྱུད་ལྔའི་སྐྱེ་རྒུ་ལ་བསམ་གྱིན།།

ཆོས་ཕུང་བརྒྱད་ཁྲི་བཞི་སྟོང་ཞི་བ་ཡི་ཞལ་ནས།།

མི་འཇིགས་སེངྒེའི་སྒྲ་སྒྲོག་གང་ཉིད་རང་རྒྱལ་ལོ།།

བོར་ལ་ཉེ་བའི་ཐ་སྙད།

རྩོམ་པ་པོ། དོལ་པོ་ཉི་བསམ། (སེར་བྱེས་སློབ་གྲྭ།)

མི་རབས་མང་པོའི་རི་རྒྱུད་ཀྱི་ཁྲོད་ནས།

ཐ་སྙད་ཀྱི་གཙང་པོ་འདི་འགག་མེད་དུ་བཞུར་ཡང་། 

ད་ལྟ་སའི་གོ་ལའི་མཐའ་རུ་བཞུད་ལ་ཉེ།

ཐ་སྙད་ཀྱི་གཙང་པོ་ཐག་རིང་ནས་རྒྱུ་སྟེ་བབས་ཀྱང་།

རྒྱ་མཚོར་བབ་པའི་སྐལ་བ་ཞིག་མ་མཆིས།