བོད་ཀྱི་ཐོས་བསམ་པའི་ལོ་རྒྱུས་སྐོར་ལས་འཕྲོས་ཏེ་ཉམས་ལེན་སྤྱོད་ཕྱོགས་བསྟན་པའི་གཞུང་སྐོར་ཞིག་གལ་ཆེན་འཛིན་དགོས་པའི་གསུང་གསར། [བྱང་སའི་ཉིན་དང་པོའི་གསུང་འཕྲོས།]

གསུང་བཤད་པ། མཁན་ཆེན་ཚུལ་ཁྲིམས་བློ་གྲོས།

ཡིག་འབེབས་པ། ཀོང་སད།

བོད་འདིར་སྔོན་ཇོ་བོ་རྗེ་བོད་དུ་བྱོན་པ་ནས་བཟུང་། ཇོ་བོ་བཀའ་གདམས་པའི་གཞུང་དེ་ཚོར་ཧ་ཅང་གིས་ཐུགས་རྩིས་ཆེན་པོ་མཛད་ཅིང་། བཀའ་གདམས་གཞུང་དྲུག་ཅེས་བཀའ་གདམས་པའི་དགེ་བའི་བཤེས་གཉེན་རྣམས་ཀྱིས་ཉམས་ལེན་མཛད་པའི་གཞུང་གཙོ་བོ་དྲུག་སྟེ། སྐྱེས་རབས་དང་། ཆེད་དུ་བརྗོད་པའི་ཚོམས་གཉིས་དད་པའི་གཞུང་དང་། བྱང་ས་དང་། མདོ་སྡེ་རྒྱན་གཉིས་ཏིང་ངེ་འཛིན་གྱི་གཞུང་དང་། སྤྱོད་འཇུག་དང་། བསླབ་བཏུས་གཉིས་སྤྱོད་པའི་གཞུང་། ཞེས་གནའ་བོའི་བཀའ་གདམས་པའི་དགེ་བའི་བཤེས་གཉེན་རྣམས་ཀྱིས་བོད་ཀྱི་ན་ལེནྡྲ་གཉིས་པ་ཞེས་གསང་ཕུ་ནེའུ་ཐོག་ཏུ་འཆད་ཉན་མཛད་དེ། བོད་གངས་ཅན་གྱི་ལྗོངས་སུ་མཁས་པ་རྒྱུན་མར་བྱུང་།