སློབ་སྤྲུལ་འཆི་མེད་ཚེ་དབང་།
࿐ མི་སུ་ཡིན་ནའང་ཕ་ཡུལ་ལ་ཤ་ཞེན་མེད་པ་ནི་ཧ་ལམ་མི་སྲིད་པས། བདག་ཀྱང་ཕ་ཡུལ་གྱི་དབུ་འཕང་མཐོ་ན་དགའ་བ་དང་། དམའ་ན་སྐྱོ་མཁན་ཞིག་ཡིན་སྟབས། གནའ་བོའི་དཔེ་རྙིང་ཁྲོད་ཀྱི་སྐད་ཆ་འདི་དག་མཐོང་དུས་སེམས་རྩ་དྲོད་ཀྱིས་ཁེངས་ཡོང་། འདི་ནས་བརྩིས་པའི་མི་ལོ་བརྒྱ་ཕྲག་སྔོན་གྱི་ཕ་ཡུལ་ནི་སྐྱ་བོ་གཡོ་ཆུང་། སེར་མོ་ཆོས་བཟང་བས་རྒྱལ་ཁམས་དཀར་འབྱམས་ཡུག་ཅིག་གིས་ཁྱབ་ཡོད་ཚོད་འདུག ལྷག་པར་དུ་བླ་མ་ཆོས་པ་ཕལ་ཆེ་བ་ཆོས་ལ་ཕྱོགས་རིས་མེད་པར་དོན་དམ་པའི་རིས་མེད་ངོ་མ་ཤ་སྟག་བྱུང་བ་ནི་སྤོབས་པ་མི་སྐྱེ་རང་སྐྱེ་རེད། གཏམ་དཔེ་ལའང་། བོན་ཆོས་ལ་དབྱེ་བ་མེད། ཆོས་སྐུ་ལ་རྒྱབ་མདུན་མེད། ཟེར་སྲོལ་ཡོད་པ་ལྟར། དོན་དངོས་ལའང་ལུང་པ་ཁ་ཤས་ན། ལྷ་ཁང་གི་ནང་ལོགས་ཕྱོགས་གཅིག་ཏུ་བོན་པོའི་ལྷ་སྐུ་དང་། ཕྱོགས་གཅིག་ལ་ཆོས་པའི་ལྷ་སྐུ་བཞེངས་པ་དང་། ཚོགས་པ་ཡང་ཆོས་བོན་གཉིས་གྲལ་གཡས་གཡོན་བྱས་ནས་ང་ཁྱོད་མེད་པར་ཚོགས་སྲོལ་ཡོད་འདུག
