ནད་ལ་སོགས་པ་ལམ་དུ་འཁྱེར་ཚུལ།

མཛད་པ་པོ། རྒྱལ་སྲས་ཐོགས་མེད་བཟང་པོ།

ན་མོ་གུ་རུ། 

བདག་གཞན་སྒྱུ་ལུས་ཀྱི་ཕུང་པོ་འདི།།

ན་ན་ན་སྟེ་ན་བས་དགའ།།

སྔར་བསགས་ཀྱི་ལས་ངན་འཛད་པ་ཡིན།།

ཆོས་སྤྱོད་ཀྱི་བྱ་བ་སྣ་ཚོགས་ཀྱང་།།

སྒྲིབ་གཉིས་སྦྱང་བའི་ཆེད་དུ་ཡིན།།

ཀུན་མཁྱེན་མི་ཕམ་པའི་ཆེ་བ་བརྗོད་པའི་སྒོ་ནས་གང་གི་གསུང་ལ་ལྟ་བར་བསྐུལ་བའི་གདམས་ངག

མཁན་ཆེན་འཇིགས་མེད་ཕུན་ཚོགས་ཀྱི་ཞལ་གསུང་།

འུ་ཅག་གི་བླ་མའི་སྐལ་བ་གཅིག་པུར་གྱུར་པ་དེ་ཀུན་མཁྱེན་མི་ཕམ་རྒྱ་མཚོ་རེད། ངས་ཁྱེད་རྣམ་པར་ལན་གྲངས་དུ་མར་ཞུ་མྱོང་བ་དེ་ཁ་ཞེ་གཉིས་མེད་ཡིན། ངའི་རྒྱུད་ལ་དད་པ་དང་སྙིང་རྗེ་ཉག་གཅིག་སྐྱེས་པ་ཡན་ཆད་དངོས་སམ་བརྒྱུད་ནས་བླ་མ་རིན་པོ་ཆེ་མི་ཕམ་གྱི་ཐུགས་རྗེའི་རྩལ་ལས་ཤར་བ་མ་གཏོགས་རང་སྟོབས་ཀྱིས་ཤར་བ་གང་ཡང་མེད། ངོ་མ་རང་གིས་བསམ་བློ་བཏང་ན་དད་པ་ལན་གཅིག་སྐྱེ་བ་འདི་བླ་མ་རིན་པོ་ཆེའི་ཐུགས་རྗེ་དང་བྱིན་རླབས་ཀྱི་སྟོབས་རེད་བསམ་གྱིན་ཡོད། དེས་ན་ཁྱེད་རྣམས་ཀྱིས་ཀྱང་ཁོང་གི་གསུང་འདི་ཉམས་སུ་ལོངས་དང་། བརྒྱུད་ཐག་ཉེ་ཞིང་བྱིན་རླབས་དང་དངོས་གྲུབ་ཀྱི་ཚན་ཁ་མ་ཡལ་བ། དམ་ཚིག་ལ་གཡའ་ཡིས་མ་གོས་པ་བཅས་ཡིན།

ཏོག་དབྱིབས་ལམ་འཁྱེར་གནད་ཀྱི་གདམས་པ།

ངེས་པ་དོན་གྱི་མཁས་བཙུན་གྲུབ་པའི་རྣལ་འབྱོར་བ་སྐྱབས་རྗེ་བླ་མ་གཟན་དཀར་མཆོག་གིས་མཛད་པའི་《ཏོག་དབྱིབས་ལམ་འཁྱེར་གནད་ཀྱི་གདམས་པ།》(མཚན་འདི་རྫ་ཚེ་རིང་བཀྲ་ཤིས་ཀྱིས་གསོལ་བ་ཡིན།)འདི་ཀུན་གྱིས་ཐུགས་དམ་དུ་མཛད་པར་ཞུ།

ནད་འདིས་ང་རྒྱལ་རི་བོ་བཅོམ། །
ནད་འདིས་འདོད་ཆགས་ཧམ་སེམས་བསད། །

ནད་འདིས་གཏི་མུག་གཉིད་ལས་སད། །
ནད་འདིས་ངེས་འབྱུང་སྐྱོ་ཤས་དྲན། །

ནད་འདིས་འཆི་བ་མི་རྟག་དྲན། །
ནད་འདིས་དགེ་སྡིག་བླང་དོར་ཤེས། །

ནད་འདིས་བསགས་སྦྱང་མཚམས་བསྙེན་འགྲུབ། །
ནད་འདིས་སྙིང་རྗེ་བྱང་སེམས་དྲན། །

ནད་འདི་དགེ་བའི་བཤེས་དང་འདྲ། །
ནད་འདི་དམ་པའི་ཆོས་དང་འདྲ། །

ནད་འདི་དྲང་པོའི་ཁྲིམས་དང་འདྲ། །
ནད་འདིས་གཙང་སྦྲ་འཕྲོད་བསྟེན་ཤེས། །

གྲྭ་པ་མ་བྱས་ཀྱང་འཚོ་བའི་ཁྲོད་ནས་ཉམས་ལེན་བཟོ་ཆོག་པའི་ཕར་ཕྱིན་དྲུག

རྫོང་གསར་མཁྱེན་བརྩེ་རིན་པོ་ཆེ།

ཁྱེད་ཉིད་རབ་ཏུ་མ་བྱུང་ཡང་འདི་ལྟར་ཉམས་ལེན་བྱས་ཆོག་སྟེ། མི་ཚོགས་ཀྱིས་ས་འོག་ལྕགས་ལམ་ནས་འཚང་ག་རྒྱག་སྐབས། ཁྱེད་རང་ཕྱིར་ནུར་བྱས་ཏེ། མི་གཞན་སྔོན་དུ་ཐོངས་དང་འདི་ནི་སྦྱིན་པའི་ཉམས་ལེན་ཡིན།

གྲོགས་པོའི་འདུ་འཛོམས་སྐབས་སུ་ཉེ་འཁོར་གྱི་མི་ལ་སུན་སྣང་མི་འོང་བའི་ཆེད་དུ་ཁྱེད་ཀྱིས་ཆང་མ་འཐུངས་དང་འདི་ནི་ཚུལ་ཁྲིམས་ཀྱི་ཉམས་ལེན་ཡིན།

ཁྱེད་རང་ཁོང་ཁྲོས་པའི་མི་དང་ངོས་འཕྲད་པའི་སྐབས་ལ། མ་གཞི་ཁོའི་ནོར་འཁྲུལ་ཡིན་ཡང་གུས་ཞབས་ལྡན་པའི་སྒོ་ནས་ཟུར་བཤོལ་བྱས་དང་འདི་ནི་བཟོད་པའི་ཉམས་ལེན་ཡིན།

ནམ་རྒྱུན་རང་གིས་རང་ཉིད་ལ་སྒྱིད་ལུག་བྱེད་མི་རུང་བའི་སྐུལ་མ་བྱས་དང་འདི་ནི་བརྩོན་འགྲུས་ཀྱི་ཉམས་ལེན་ཡིན།

དུས་རྒྱུན་དུ་གཟབ་ནན་གྱིས་རང་གི་རྣམ་རྟོག་གི་གཡོ་འགུལ་ལ་ལྟ་རྟོག་བྱོས་དང་འདི་ནི་བསམ་གཏན་གྱི་ཉམས་ལེན་ཡིན།

དེ་བཞིན་དུ་འདུས་བྱས་ཐམས་ཅད་མི་རྟོག་པ། ཆོས་ཐམས་ཅད་བདག་མེད་པ་ཡིན་པར་བསམ་གཞིག་བྱོས་དང་། འདི་ནི་ཤེས་རབ་ཀྱི་ཉམས་ལེན་ཡིན་ནོ།།