ཨ་ཅེ་མཚོ་བྱུང་མ།

རྩོམ་པ་པོ། དོལ་པོ་སྤྲུལ་སྐུ་འཆི་མེད་ཚེ་དབང་།

ན་མོ་ཌཱ་ཀི་ས་ར་སྭ་ཏི་ཡེ།

བརྟན་གཡོའི་སྒྲ་དབྱངས་རྒྱ་མཚོའི་ཉིང་ཁུ་རྣམས།།

གཅིག་འདུས་མཚན་དཔེ་ལང་ཚོའི་དཔལ་འབར་བ།

མཛེས་པ་མཛེས་པའི་མཐར་ཐུག་དབྱངས་ཅན་མ།།

ཁོ་བོའི་མགྲིན་པའི་རྒྱན་དུ་རོལ་ཅིག་ཀྱེ།།

ཀུ་མུད་མདངས་འཛིན་ཞལ་གྱི་དཀྱིལ་འཁོར་ནས།།

བུང་བ་གཡོ་འདྲའི་ཟུར་མིག་འཁྱུག་ཐེངས་རེས།།

ཆགས་ལྡན་སྐྱེ་བོ་སྦྲིད་པ་ཨ་ཅང་ཅང་།། 

འཇིག་རྟེན་དབང་ཕྱུག་སྤྱན་ཡང་ཟུམ་ཞེས་གྲགས།

འཇམ་མཉེན་འདེགས་འཇོག་ཡང་བའི་སོར་མོའི་རྩེར།།

སྲིད་དང་ཞི་བའི་སྙན་པ་ཀུན་འཁྱིལ་བའི།།

བསྟོད་པ་གླུ་རུ་ལེན་པའི་ཏམྦུ་རས།། 

འཇམ་དཔལ་གཞོན་ནུའི་རལ་གྲི་ཐང་ལ་ལྷུང་།། 

སྨད་གཡོགས་ཐུང་བས་ལྟེ་བ་མ་ཁེབས་ཤིང་།།

སྟོད་གཡོགས་སྲབ་པས་སྨྱོས་བུམ་མ་བསྒྲིབས་སྟེང་།།

ད་དུང་མིག་འཁྲུལ་ལྟ་བུའི་གར་སྟབས་དེས།།

གསང་བའི་བདག་པོའི་ངོ་ལའང་འཛུམ་ཤ་བཏོད།།

རྒྱ་སྐྱེགས་ཁུ་བ་བྱུགས་པའི་ཕྱག་ཞབས་རྣམས།།

ཁོ་བོའི་མལ་ཁུང་ནང་ལ་མ་རྐྱོང་དང་།།

དགའ་བཞིའི་བདེ་བ་མ་བཟོད་འཁུན་སྒྲ་དེས།།

སྨྲ་བའི་སེང་གེ་གཉིད་ལས་དཀྲོག་པར་དོགས།།

གང་ཞིག་ཁྱོད་ཞབས་བསྟེན་པའི་སྐྱེས་བུ་ལ།།

ནོར་རྒྱུན་ལྷ་མོས་མཛོད་ཁང་སྒོ་གཏན་ཞིང་།།

སྨན་གྱི་ལྷ་མོས་སྙིང་རླུང་སློང་བ་སོགས།།

རིགས་མཐུན་ཐམས་ཅད་མིག་སེར་ལང་ཞེས་གྲགས།།

བདག་ཀྱང་འདི་ནས་བྱང་ཆུབ་མ་ཐོབ་བར།།

ཁྱོད་ཞབས་བསྙེན་ནོ་ཨ་ཅེ་མཚོ་བྱུང་མ།།

མགྲིན་པའི་འཁོར་ལོའི་རྩ་མདུད་ཞིག་པ་དང་།།

ལག་པའི་སོར་མོའི་རྒྱུས་པ་ལྷོད་པར་མཛོད།།

༢༠༢༠།༡༢།༢༡ བཟང་པོ་བཅུ་འཛོམས་ཉིན།

ཡོང་ཁུངས། རྩོམ་པ་པོའི་ངོ་དེབ་དྲྭ་བ།