རྩོམ་པ་པོ།: ཀླུ་སྨྱོན་ཧེ་རུ་ཀ
ཡོང་ཁུངས།: ཤེས་རབ་སྒྲོན་མེའི་འཕྲིན་སྟེགས།
སྟོན་དང་བསྟན་པ་བསྟན་འཛིན་གསུམ་ལ་ཕྱག་འཚལ་ལོ།།
ཡོངས་གྲགས་སུ་ལོ་ངོ་ཉིས་སྟོང་དྲུག་བརྒྱའི་སྔོན་དུ། སྟོན་པ་ཐུགས་རྗེ་ཅན་མཉམ་མེད་ཤྰཀྱའི་རྒྱལ་སྲས་དེ་ཉིད་འཇིག་རྟེན་འདིར་བྱོན་ཏེ། ལྟ་བ་རྟེན་འབྱུང་དང་སྒོམ་པ་འོད་གསལ། སྤྱོད་པ་འཚེ་མེད་བཅས་ཡིན་པའི་ནང་པའི་བསྟན་པ་འདི་ཉིད་གསར་བཏོད་མཛད། རྒྱལ་བུ་གཞོན་ནུ་དོན་གྲུབ་ཀྱིས་དགུང་ལོ་སོ་ལྔའི་སྟེང་མངོན་པར་རྫོགས་པར་སངས་རྒྱས་ཏེ། དགུང་གྲངས་བརྒྱད་ཅུ་པར་སྐུ་མྱ་ངན་ལས་མ་འདས་བར་དུ། མི་ལོ་བཞི་བཅུ་ཞེ་ལྔའི་རིང་མདོ་དང་སྔགས་ཀྱི་ཆོས་ཀྱི་འཁོར་ལོ་བསྐོར་ཏེ། མི་དང་ལྷ་དང་ཀླུ་སོགས་འགྲོ་བ་རིགས་མི་འདྲ་བ་དུ་མ་ཞིག དགྲ་བཅོམ་པ་ནས་རྒྱུན་ཞུགས་ཀྱི་བར་གྱི་ས་ལམ་ལ་བཀོད། བསྐལ་བཟང་གི་སངས་རྒྱས་རེ་རེའི་བསྟན་པ་འཇིག་རྟེན་འདིར་གནས་པའི་དུས་ཡུན་ལ། མི་འདྲ་བའི་ཁྱད་པར་ཆེན་པོ་ཡོད་ཅིང་། སངས་རྒྱས་ལ་ལའི་བསྟན་པ་འཇིག་རྟེན་དུ་མི་ལོ་དུང་ཕྱུར་མང་པོར་གནས་པ་དང་། སངས་རྒྱས་ལ་ལའི་བསྟན་པ་ལོ་སྟོང་ཕྲག་རེ་ཟུང་ལ་གནས་ཀྱི་ཡོད། སངས་རྒྱས་གཞན་གྱི་བསྟན་པའི་གནས་ཚད་དང་བསྡུར་ན། སངས་རྒྱས་ཤྰཀྱ་ཐུབ་པའི་བསྟན་པ་ནི་འཇིག་རྟེན་དུ་གནས་ཡུན་ཆེས་ཐུང་ངུ་དེ་ཡིན། ཁོང་གི་བསྟན་པ་འདི་འཇིག་རྟེན་འདིར་ལོ་སྟོང་ཕྲག་ཅི་ཙམ་གྱི་རིང་གནས་པའི་སྐོར་ལ། སངས་རྒྱས་རང་ཉིད་ཀྱིས་གསུངས་པར་གྲགས་པའི་མདོ་སྡེ་དག་གི་བཞེད་ལུགས་ཀྱང་མི་འདྲ་ཞིང་།
