རྙིང་བོན་ཐེག་པ་རིམ་དགུ་ལས་འཕྲོས་པའི་གཏམ།

མཛད་པ་པོ། དོལ་པོ་སྤྲུལ་སྐུ་ཨོ་རྒྱན་ཆོས་དབྱིངས་ཡེ་ཤེས།

༈ ཀུན་རྫོབ་བསླུ་བ་མེད་པའི་རྟེན་འབྲེལ་དང་།།

དོན་དམ་སྤྲོས་པ་བྲལ་བའི་བདེན་པ་གཉིས།།

བརྩེ་བས་འདོམས་ལ་ཁྱད་པར་མ་མཐོང་བས།།

ཆོས་བོན་སྟོན་པ་གཉིས་ལ་སྙིང་ནས་དད།།

འདིར་ཏྲེ་ཧོར་དགེ་བཤེས་སོགས་མདོ་སྔགས་བཤད་གྲྭ་ཆེན་མོར་རྙིང་བོན་གཉིས་ཀྱི་ཐེག་པ་རིམ་དགུ་དང་འབྲེལ་བའི་དྲི་བ་རྣམས་སྟབས་ཅིག་ཏུ་དྲིལ་ཏེ་ཞུས་ན།

༡༽རྙིང་བོན་གྱི་ཐེག་པ་རིམ་དགུ་ངོས་བཟུང་བ།

༢༽རྙིང་བོན་ཕན་ཚུན་འདྲ་བ།

༣༽རྙིང་བོན་ཕན་ཚུན་མི་འདྲ་བ།

༤༽ས་བཀའ་ཇོ་དགེ་བཞི་དང་འདྲ་བ།

༥༽ཟུར་བརྗོད།

༡༽རྙིང་བོན་གྱི་ཐེག་པ་རིམ་དགུ་ངོས་བཟུང་བ།

སྤྱིར་བོན་ལ་ཐེག་པ་རིམ་དགུའི་རྣམ་གཞག་འཇོག་ལུགས་གསུམ་ཡོད།དེ་དག་ཀུན་གྱི་གོ་དོན་མི་ཤེས་ཀྱང་རྣམ་གྲངས་ཙམ་ཞུས་ན།

དང་པོ་ལྷོ་གཏེར་གྱི་ཐེག་པ་རིམ་དགུ།

༡ཕྱཱ་གཤེན་གྱི་ཐེག་པ། ༢སྣང་གཤེན་གྱི་ཐེག་པ། ༣འཕྲུལ་གཤེན་གྱི་ཐེག་པ། ༤སྲིད་གཤེན་གྱི་ཐེག་པ། ༥དགེ་བསྙེན་གྱི་ཐེག་པ། ༦དྲང་སྲོང་གི་ཐེག་པ། ༧ཨ་དཀར་གྱི་ཐེག ༨ཡེ་གཤེན་གྱི་ཐེག་པ། ༩ཡང་རྩེ་བླ་མེད་ཀྱི་ཐེག་པ་དང་དགུའོ།།

ལྷོ་གཏེར་རིམ་དགུ་འདི་ནི། གཏེར་ཁ་གཞན་གཉིས་དང་བསྡུར་ན་རྣམ་གཞག་དང་གཞུང་ལུགས་རྣམས་རྒྱས་ཤོས་ཡིན་སྐད་ཐོས། ལྷ་གཏེར་ཟེར་དོན་ཡང་སྤྲུལ་སྐུ་གཤེན་ཆེན་ཀླུ་དགས་བསམ་ཡས་དབུས་སུ་བྱས་པའི་ལྷོ་ཕྱོགས་འབྲིག་མཚམས་མཐའ་དཀར་ནས་སྤྱི་ལོ་ ༡༠༡༧ ལོར་གཏེར་ནས་སྤྱན་དྲངས་པ་ལ་ལྷོ་གཏེར་ཟེར།

གཉིས་པ་བྱང་གཏེར་གྱི་ཐེག་པ་རིམ་དགུ།

༡སྣང་ལྡན་གྱི་ཐེག་པ། ༢རང་ལྡན་གྱི་ཐེག་པ། ༣བཞད་ལྡན་གྱི་ཐེག་པ། ༤ཐོ་ཐོའི་ཐེག་པ། ༥ཕྱི་མཐོའི་ཐེག་པ། ༦ཡ་ཐོ་མཐོའི་ཐེག་པ། ༧ལྷ་རྩེའི་ཐེག་པ། ༨སྣང་རྩེའི་ཐེག་པ། ཡང་རྩེའི་ཐེག་པ་དང་དགུའོ།།   

འདི་དག་གི་རྣམ་གཞག་དང་གཞུང་ལུགས་ཐེག་རིམ་གཞན་གཉིས་ལས་ཉུང་ཤོས་ཡིན་སྐད་ཐོས། བྱང་གཏེར་ཟེར་དོན་ཡང་གྱེར་མི་ཉི་མ་འོད་ཟེར་དང་རྨ་སྟོན་སྲིད་འཛིན་གཉིས་ཀྱིས་སྤྱི་ལོ་ ༡༡༠༨ ལོར་བོད་ཡུལ་བསམ་ཡས་དབུས་སུ་བྱས་པའི་བྱང་དྭང་ར་ཁྱུང་རྫོང་ནས་སྤྱན་དྲངས་པ་ལ་བོན་གཏེར་ལ་བྱང་གཏེར་ཟེར།

གསུམ་པ་དབུས་གཏེར་གྱི་ཐེག་པ་རིམ་དགུ།

༡ལྷ་མི་གཞན་བརྟེན་གྱི་ཐེག་པ། ༢རང་རྟོགས་གཤེན་རབ་རང་རྒྱལ་གྱི་ཐེག་པ། ༣ཐུགས་རྗེ་སེམས་དཔའི་ཐེག་པ། ༤གཡུང་དྲུང་སེམས་པའི་ཐེག་པ། ༥བྱ་བ་གཙང་སྤྱོད་ཡེ་བོན་གྱི་ཐེག་པ། ༦རྣམ་པ་ཀུན་ལྡན་མངོན་ཤེས་ཀྱི་ཐེག་པ། ༧དངོས་བསྐྱེད་ཐུགས་རྗེ་རོལ་པའི་ཐེག་པ། ༨ཤིན་ཏུ་དོན་ལྡན་ཀུན་རྫོགས་ཀྱི་ཐེག་པ། ༩ཡེ་ནས་རྫོགས་ཆེན་ཡང་རྩེ་བླ་མེད་ཀྱི་ཐེག་པ་དང་དགུའོ།།

འདི་དག་གི་རྣམ་གཞག་དང་གཞུང་ལུགས་གཞན་གཉིས་ལས་འབྲིང་ཙམ་ཡོད་སྐད་ཐོས།གུས་པས་རྒྱུད་རྩ་འགྲེལ་གཉིས་པོ་མཇལ་མྱོངས་ཡོད།དབུས་གཏེར་ཟེར་དོན་ཡང་ལོ་ཆེན་བཻ་རོ་ཙ་ནས་གཏེར་དུ་སྦས་ནས་ཕྱིས་སུ་སྤྱི་ལོའི་དུས་རབས།༡༠པའི་སྨད་དུ་སུམ་པ་དབང་ཚུལ་དང་།རྐྱང་པོ་གྲགས་པ་དབང་ཕྱུགའབྲི་ཤེས་རབ་བླ་མ་གསུམ་གྱིས་བོད་ཡུལ་དབུས་བསམ་ཡས་ནས་སྤྱན་དྲངས་པའི་བོན་གཏེར་ལ་དབུས་གཏེར་ཟེར།གཏེར་སྟོན་གསུམ་པོར་བན་སྡེ་མི་གསུམ་ཡང་ཟེར། 

རྙིང་མའི་ཐེག་པ་རིམ་དགུ་ནི།

༡ཉན་ཐོས། ༢རང་རྒྱལ། ༣བྱང་སེམས་གསུམ་པོ་མཚན་ཉིད་ཀྱི་ཐེག་པ་གསུམ། ༤བྱ་རྒྱུད། ༥སྤྱོད་རྒྱུད། ༦རྣལ་འབྱོར་གྱི་རྒྱུད་དེ་སྔགས་ཕྱི་པའི་ཐེག་པ་གསུམ། ༧མ་ཧཱ་ཡོ་ག ༨ཨ་ནུ་ཡོ་ག ༩ཨ་ཏི་ཡོ་ག་སྟེ་ནང་རྒྱུད་ཀྱི་ཐེག་པ་གསུམ་དང་དགུའོ།།

༢༽རྙིང་བོན་གྱི་ཐེག་པ་ཕན་ཚུན་འདྲ་བ།

བོན་གྱི་ཐེག་པ་རིམ་དགུ་བརྩི་ཚུལ་ལ་ལྷོ་བྱང་དབུས་གསུམ་ཡོད་པ་ལས། དབུས་གཏེར་རིམ་དགུ་དེ་དང་རྙིང་མའི་རིམ་དགུ་བརྒྱ་ཆ་ནས་ ༧༠ འདྲ་བ་ཡོད་ཀྱང་། ཕྱོགས་ཀུན་ནས་གྲངས་འདྲེན་ཚུལ་མི་འདྲ། དེ་ཡང་བོན་གྱི་དབུས་གཏེར་རིམ་དགུ་ནི། རྫོགས་སྐུའམ་ལོངས་སྐུའི་སྟོན་པ་གཤེན་ལྷ་འོད་དཀར་གྱིས་རྒྱུད་༼ཐེག་པའི་རིམ་པ་མངོན་དུ་བཤད་པའི་མདོ་རྒྱུད་༽ཅེས་པ་བརྡའི་སྒོ་ནས་བསྟན་པ་དེ་ཉིད་ལ་འགྲེལ་བ་སྤྲུལ་སྐུའི་སྟོན་པ་གཤེན་རབ་མི་བོས་༼འཕྲུལ་གྱི་མེ་ལོང་དགུ་སྐོར་༽ཞེས་པ་དེ་གསུངས། རྩ་འགྲེལ་དེ་དག་ལས་བསྟན་པའི་བོན་གྱི་དབུས་གཏེར་རིམ་དགུ་ལས་༡ལྷ་མི་གཞན་བརྟེན་གྱི་ཐེག་པ་ནི་འཇིག་རྟེན་པའི་ཐེག་པ་ཙམ་ལས་ལྟ་སྤྱོད་ཕུན་ཚོགས་ཅན་ཞིག་མིན་པར་བཤད་པ།

༢རང་རྟོགས་གཤེན་རབ་ཀྱི་ཐེག་པ་ནི་ཆོས་པའི་རང་རྒྱལ་ཐེག་པ་དང་འདྲ། དབང་རྟུལ་ནེ་ཙོ་དང་དབང་རྣོན་བསེ་རུ་ལྟ་བུ་དང་། ལྟ་བ་གཟུང་བ་ཙམ་མེད་པར་རྟོགས་པའི་རྣམ་གཞག་སོགས་ཆོས་བོན་གཉིས་འདྲ། ཐེག་པ་འདི་གཉིས་ཐེག་དམན་ཡིན། ཐེག་པ་ཆེ་ཆུང་གི་ཁྱད་པར་ནི། བོན་གཞུང་ཡེ་ཁྲི་ལ་ཟླ་ལས།ཐེག་པའི་ངོ་བོ་བསྟན་པ་ནི། །ཤེས་རབ་དང་ནི་སྙིང་རྗེ་ཡིན། །དོན་གཉིས་ཆེ་ན་ཐེག་པ་ཆེ། །དོན་གཉིས་ཆུང་ན་ཐེག་པ་ཆུང་། །ཞེས་གསུངས་པ་ལྟར་སྟོང་ཉིད་རྟོགས་པའི་ཤེས་རབ་དང་ཐབས་སྙིང་རྗེ་ཆེན་པོ་ཡོད་མེད་ཀྱིས་ཐེག་པ་ཆེ་ཆུང་དུ་འདོད་པ་རྣམས་ཆོས་བོན་མཚུངས། ཐེག་པ་ཆེན་པོའི་ནང་གསེས་༣ཐུགས་རྗེ་སེམས་དཔའི་ཐེག་པ་ནི་ཆོས་པའི་སེམས་ཙམ་དང་འདྲ། ཕྱི་དོན་མེད་པར་གཟུང་འཛིན་གཉིས་སྟོང་དོན་དམ་དུ་བཞེད་པ་ཆོས་བོན་གཉིས་འདྲ། ༤གཡུང་དྲུང་སེམས་པའི་ཐེག་པ་ནི་དབུ་མ་དང་ཆོས་མཚུངས། འདི་ལ་རང་རྒྱུད་པ་དང་ཐལ་འགྱུར་གཉིས་དང་མཚུངས་པ་རོལ་པ་སྐྱེ་མཆེད་ལྟར་སྣང་བ་དང་མཚན་མ་ཀུན་བྲལ་ཅིར་མི་གནས་པ་གཉིས་ཡོད། འདི་གཉིས་ཀྱི་ཁྱད་པར་ནི། དགག་བྱ་བདེན་གྲུབ་འགོག་པར་འདོད་པ་མཐུན་ཀྱང་རང་བཞིན་གྱིས་གྲུབ་པ་འདོད་མི་འདོད་ཀྱིས་ཁྱད་པར་འབྱེད་སྟངས་གཅིག་མཚུངས་ཡིན། བོན་གྱི་ཐེག་པ་རིམ་དགུར་དབུ་སེམས་ལོགས་སུ་ཕྱེ་ནས་ཐེག་པ་རིམ་དགུའི་ནང་དུ་འདྲེན་ཀྱང་རྙིང་མས་དེ་གཉིས་བྱང་སེམས་ཀྱི་ཐེག་པ་གཅིག་ཏུ་བརྩི། ༥བྱ་བ་གཙང་སྤྱོད་ཀྱི་ཐེག་པ་ནི་ཆོས་པའི་རྒྱུད་སྡེ་བཞིའི་དང་པོ་ཀྲི་ཡ་ཏནྟྲ་སྟེ་བྱ་རྒྱུད་དང་འདྲ། ༦རྣམ་པ་ཀུན་ལྡན་གྱི་ཐེག་པ་ནི་ཆོས་པའི་རྒྱུད་སྡེ་གཉིས་པ་ཨུ་པ་ཏནྟྲ་སྟེ་སྤྱོད་རྒྱུད་འདྲ། ༧དངོས་བསྐྱེད་ཐུགས་རྗེ་རོལ་པའི་ཐེག་པ་ནི་ཆོས་པའི་རྒྱུད་སྡེ་གསུམ་པ་ཡོ་ག་ཏནྟྲ་སྟེ་རྣལ་འབྱོར་རྒྱུད་དང་མཚུངས། ༨ཤིན་ཏུ་དོན་ལྡན་ཀུན་རྫོགས་ཀྱི་ཐེག་པ་ནི་ཆོས་པའི་རྒྱུད་སྡེ་བཞི་པ་རྣལ་འབྱོར་བླ་མེད་དང་དོན་གཅིག ༩ཡེ་ནས་རྫོགས་ཆེན་ཡང་རྩེ་བླ་མེད་ཀྱི་ཐེག་པ་ནི་སངས་རྒྱས་པའི་ཐེག་པ་རིམ་དགུའི་ཡང་རྩེ་ཨ་ཏི་ཡོ་ག་སྟེ་ཤིན་ཏུ་རྣལ་འབྱོར་དང་། མ་ཧཱ་སནྡྷི་སྟེ་རྫོགས་ཆེན་དོན་གཅིག་གོ།

༣༽རྙིང་བོན་གྱི་ཐེག་པ་ཕན་ཚུན་མི་འདྲ་བ།

བོན་གྱིས་འཇིག་རྟེན་ལྷ་མིའི་ཐེག་པ་རིམ་དགུའི་ནང་དུ་རྩིས་བ་རྙིང་མས་མི་རྩི། རྙིང་མས་ཐེག་ཆེན་གྱི་དབུ་སེམས་གཉིས་པོ་བྱང་སེམས་ཀྱི་ཐེག་པ་གཅིག་ཏུ་གྲངས་འདྲེན་པ་དང་། བོན་གྱིས་དེ་གཉིས་ཐ་དད་དུ་རྩིས།བོན་གྱིས་རྒྱུད་སྡེ་བཞི་རང་ལྡོག་ནས་རྩིས་བ་དང་། རྙིང་མས་རྒྱུད་སྡེ་བཞིའི་སྔ་མ་གསུམ་རང་ལྡོག་ནས་རྩི་བ་མཚུངས་ཀྱང་། ནང་རྒྱུད་རང་ལྡོག་ནས་མིན་པར་མ་ཧཱ་ཡོ་ག་དང་།ཨ་ནུ་ཡོ་ག་དང་།ཨ་ཏི་ཡོ་ག་གསུམ་དུ་ཕྱི་ནས་དགུ་རྩིའོ། །བརྒྱ་ཆ་ནས་བརྒྱ་མིན་པར་ ༧༠ འདྲ་བའི་རྒྱུ་མཚན་འདི་ཡིན།

༤༽བོན་དང་ས་བཀའ་ཇོ་དགེ་བཞི་དང་འདྲ་བ།

བོན་གྱི་ཐེག་དམན་ལྷ་མི་གཞན་བརྟེན། རང་རྟོགས་གཤེན་རབ། ཐེག་ཆེན་གྱི་ཐུགས་རྗེ་སེམས་དཔའ། གཡུང་དྲུང་སེམས་པའི་ཐེག་པ་བཞི་པོ་སངས་རྒྱས་པའི་ཐེག་དམན་གྱི་ཉན་ཐོས།རང་རྒྱལ། ཐེག་ཆེན་གྱི་སེམས་ཙམ།དབུ་མ་བཞི་དང་འདྲ། བོན་གྱི་བྱ་བ་གཙང་སྤྱོད། རྣམ་པ་ཀུན་ལྡན། དངོས་བསྐྱེད་ཐུགས་རྗེ་རོལ་པ། ཤིན་ཏུ་དོན་ལྡན་ཀུན་རྫོགས་ཀྱི་ཐེག་པ་བཞི་པོ་སངས་རྒྱས་པའི་བྱ་རྒྱུད། སྤྱོད་རྒྱུད། རྣལ་འབྱོར་གྱི་རྒྱུད། རྣལ་འབྱོར་བླ་ན་མེད་པའི་རྒྱུད་སྡེ་བཞི་དང་མཚུངས།ས་བཀའ་ཇོ་དགེ་བཞི་དང་བརྒྱ་ཆ་ནས་ ༧༠ ཙམ་མིན་པར་ ༩༠ མཚུངས་པ་ཡོད་དོ།།

༥༽ཟུར་བརྗོད།

འདྲ་བ་ཡོད་པ་ཙམ་གྱིས་ཆོས་བརྒྱུད་གཅིག་པ་དང་ཕན་ཚན་དཔེ་བཤུས་ཡིན་མིན་སོགས་རང་གཞན་གྱི་ལུགས་མཐོང་བའི་མེ་ལོང་དཔང་པོར་བཞག་ནས་རྟགས་ཀྱི་ཁྱབ་སྐོར་རྣམས་ལ་དགོངས་པ་བཞེས་དགོས་ཀྱི་འདུག་གོ།

སླར་སྨྲས་པ།

རྙིང་བོན་ཐེག་པ་རིམ་དགུ་མཚུངས་ཙམ་གྱིས།།

ཆོས་བརྒྱུད་གཅིག་གམ་ཕན་ཚུན་འདྲ་བཤུ་ཞེས།།

ཐལ་བ་འཕེན་པའི་བན་བོན་བློ་གསར་ལ།།

མ་ངེས་རྟགས་ཀྱི་གོ་བ་ལེགས་པར་སྦྱིན།།

མཚན་ཉིད་གྲུབ་མཐའ་བཞི་དང་གསང་སྔགས་ཀྱི།།

རྒྱུད་སྡེ་བཞི་པོ་མཚུངས་པའི་གསལ་བཤད་འདིས།།

གངས་རིའི་ལྗོངས་ཀྱི་ཆོས་བོན་རྣམ་གཉིས་ལ།།

རྟོན་པ་བཞི་ཡི་གོ་རིམ་དྲན་གསོ་བྱས།།

དོལ་སྤྲུལ་མིང་པས། ༢༨།༡༡།༡༤།

ཡོངས་ཁུངས། སྔ་འགྱུར་ཞབས་ཞུ་ཚན་ཆུང་གི་འཕྲིན་སྟེགས།