རྫོང་སར་འཇམ་དབྱངས་མཁྱེན་བརྩེ་རིན་པོ་ཆེའི་གསུང།
གསུར་ཞེས་པ་དེ་ཕྱོགས་གཅིག་ནས་ལས་ལམ་འགྲོ་བའི་རིམ་གྲོ་ཞིག་རེད།
ང་ཚོ་ཚང་མ་ལ་ཆོས་དང་འཇིག་རྟེན་སོ་ནམ་ལ་སོགས་པ་གང་བྱས་ན་ཡང་ལམ་འགྲོ་དགོས་རེད།
ལམ་མི་འགྲོ་བའི་རྩ་བ་དེ་དཔལ་འབྱོར་མེད། ཤེས་ཡོན་སློབ་སྦྱོང་མེད། དབང་ཆ་མེད།
དེ་དང་དེ་ལ་སོགས་པའི་སྒོ་ནས་ལམ་འགྲོ་མ་བྱུང་བ་ལྟ་བུ་ཡང་ཡོད་རེད། ཡིན་ན་ཡང་ལམ་འགྲོ་མི་ཡོང་བའི་རྩ་བ་ངོ་མ་དེ་གང་ལ་བརྟེན་ནས་བྱུང་བ་ཡིན་ཞེ་ན།
ལན་ཆགས་བུ་ལོན་ལས་བྱུང་བ་རེད།
ལན་ཆགས་བུ་ལོན་ཟུག་ཚར་མཁན་གྱི་མི་དེ་ལ་སྟོབས་འབྱོར་ཇི་ཙམ་ཡོད་ཀྱང་མེད་པ་དང་གཅིག་རེད།
ང་ཚོ་ནང་པ་ནི་ལས་རྒྱུ་འབྲས་ཁས་ལེན་མཁན་གྱི་ཆོས་ལུགས་ཤིག་རེད།
ང་ཚོ་ལ་ག་ས་གང་དུ་ལན་ཆགས་མང་པོ་ཞིག་ཟུག་རྒྱུ་ཡོད་རེད། ང་ཚོས་ད་ལྟ་བུ་ལོན་མི་དགོས། ལན་ཆགས་མེད།
སུ་གཅིག་ལས་གཡར་མ་མྱོང་། སུ་ལ་ཡང་མགོ་འདོགས་དོན་མེད་དྲན་སྲིད་ཀྱང་།
ལས་རྒྱུ་འབྲས་ཁས་བླངས་ནས་བཟུང་ཚེ་འདི་ལ་ལན་ཆགས་མེད་ན་ཡང་སྐྱེ་བ་དང་ཚེ་རབས་མང་པོར་བསགས་པའི་ལན་ཆགས་བུ་ལོན་མང་པོ་ཡོད་རེད།
དེ་ཡང་ང་རང་ཚོས་དངོས་སུ་མཐོང་བའི་ཕ་མ་དང་ཨ་སྲུ་ཨ་ཞང་།
ཚ་བོ་ཚ་མོ་གཉེན་ཉེ་འབྲེལ། དཔོན་པོ་དང་གྲོགས་པོ་ཚོ་ལ་ལན་ཆགས་བུ་ལོན་ཟུག་ཡོད་རེད་ལ།
དེ་ལས་གཞན་སེམས་ཅན་རྟ་ནོར་ལུག་གསུམ་སོགས་ཀྱི་ཤ་ཟས་པ་དང་།
ཁུར་བཀལ་བ་ལ་སོགས་པའི་ལན་ཆགས་བུ་ལོན་དང་། དངོས་སུ་མཐོང་རྒྱུ་མེད་པའི་ལྷ་འདྲེ་དང་བར་དོའི་སེམས་ཅན་ལ་སོགས་པས་བདག་གིར་བྱས་པའི་ས་གནས་དང་ཁང་པ།
ཁང་ཤུལ་ལ་སོགས་པ་ང་ཚོས་སེམས་ཁྲལ་གང་ཡང་མེད་པའི་སྒོ་ནས་བག་མེད་དུ་ལོངས་སུ་སྤྱོད་པའི་ལན་ཆགས་བུ་ལོན་ལ་སོགས་པ་སྐྱེ་བ་ནས་ཚེ་རབས་མང་པོར་བསགས་པའི་ལན་ཆགས་བུ་ལོན་མང་པོ་ཡོད་པའི་དབང་གིས་ཤེས་ཡོན་དང་སྟོབས་འབྱོར་ངོ་ཤེས་སོགས་ཇི་ཙམ་ཡོད་ཀྱང་ལམ་འགྲོ་རྩ་བ་ནས་མེད་པ།
ལུས་ལ་ན་ཚ་དང་སེམས་ལ་སྡུག་བསྔལ། ཚོང་དང་བསོད་ནམས་ཀྱི་ལམ་འགྲོ་ཡང་མེད། རླུང་རྟ་ཆག
།བླ་ཤོར།
དེའི་སྟེང་དུ་ཆོས་བྱེད་མཁན་ཚོ་ལ་ཆོས་ཀྱི་ཉམས་ལེན་སྟེང་ལ་དཀོར་སྒྲིབ་ཅེས་པ་ཞིག་ཡོད་རེད།
དེ་ཡང་བླ་མ་གྲྭ་བ་ཚོ་ལ་མི་སྐྱ་ཕོ་མོ་ཚོས་ཡར་འབུལ་བའི་དད་རྫས་དེ་དག་ཡག་པོ་ཞིག་བསྔོ་མ་ཐུབ་ནས་བེད་སྤྱོད་ཡག་པོ་མ་བཏང་བའི་ལན་ཆགས་བུ་ལོན་ཟུག
།དེའི་དབང་གིས་དཔེ་ཆ་མི་ཤེས།
སྒོམ་རྒྱེབ་དུས་སེམས་པ་གཏད་མི་ཐུབ་པ་ཟིང་པོ་ཆགས་ནས་སེམས་ཡེངས་ཤོར་བ་ལ་སོགས་པའི་དཀའ་ངལ་མང་པོ་ཞིག་ལན་ཆགས་བུ་ལོན་ལ་བརྟེན་ནས་བྱུང་བ་རེད།
ལན་ཆགས་བུ་ལོན་དེ་དག་བསལ་བའི་ཐབས་ཤེས་དེ་སངས་རྒྱས་ཀྱིས་མང་པོ་གསུང་ཡོད་མོད།
དེའི་ནང་ནས་གསང་སྔགས་རྡོ་རྗེ་ཐེག་པའི་དབང་དུ་བྱས་ན་ཕར་བལྟས་ལ་སྟབས་བདེ་པོ་ཡིན་པ།
ཁེ་སང་ཆེ་ཞིང་འདོད་དོན་ཆེན་པོ་བསྒྲུབ་ཐུབ་པའི་ཐབས་ལ་གསུར་འདོན་རྒྱུ་འདི་རེད།
གསུར་འདོན་སྐབས་ཚང་མས་འཕགས་པ་སྤྱན་རས་གཟིགས་ལ་གསོལ་བ་བཏབ་སྟེ།
སེམས་ནང་ལ་ཞེ་སྡང་དང་ཁོང་ཁྲོ་ཉུང་ཙམ་བྱས་ནས་སྐྱེ་བ་དང་ཚེ་རབས་མང་པོར་བསགས་པའི་ལན་ཆགས་བུ་ལོན་དེ་དག་ངས་དེ་རིང་བསལ་བའམ་འཇལ་རྒྱུ་ཡིན་བསམ་ནས་སྙིང་རྗེའི་ངང་ནས་གསུངས་རོགས་ཞུ།
ལུག་ཚང་དཔལ་ཡོན་འཕྲིན་སྟེགས་ལས་བཤུས།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།