དེ་རིང་གི་དཔེ་ཀློག་བརྗེད་བྱང་དགག་པའི་ཚ་རླབས།

 རྩོམ་པ་པོ། ཚེ་དབང་ནོར་བུ། (རྣམ་གྲོལ་གླིང་མཐོ་སློབ།)

དེ་རིང་མངོན་རྟོགས་རྒྱན་གྱི་དཔེ་ཁྲིད་དངོས་གཞི་དབུ་བཙུགས་རྗེས། ཤེར་ཕྱིན་གྱི་ཞོར་འཕྲོས་ཤིང་རྟའི་སྲོལ་འབྱེད་ལས་རིགས་ཚོགས་སུ་འཕྲོས་ནས་དེའི་སྐོར་གྱི་འགགས་གནད་འགའ་ཞིག་གླེང་ན།  སྤྱིར་རང་ལུགས་ལ་རིགས་ཚོགས་ཀྱི་གྲངས་ངེས་འདི་དང་འདི་ཞེས་དངོས་སུ་གསུངས་པ་མེད་མོད། འོན་ཀྱང་མི་ཕམ་པས་ས་སྐྱའི་དྲིས་ལན་དུ་ལྔ་འདོད་པ་དོན་ལ་གནས་ཤིང་གསུངས་པ་དེ་དཔྱད་གཞི་ཡིན། 

དེས་ན་གཞན་དག་གིས་རིགས་ཚོགས་ལ་ལྔ་དང་དྲུག་གིས་གྲངས་ངེས་མཛད་པ་དང་། མ་ཟད་ཁ་ཅིག་ཐ་སྙད་སྒྲུབ་མེད་པ་དང་ག་ལས་འཇིགས་མེད་རང་འགྲེལ་མིན་པར་བཞེད་པ་སྣ་ཚོགས་འབྱུང་ཡང་། དེའི་སྐོར་དཔྱད་རྩོམ་སྤུས་ཀ་དག་ཤོས་དེ། སྔ་འགྱུར་མཐོ་སློབ་ཆེན་མོའི་དགེ་བའི་བཤེས་གཉེན་ཆེན་མོ་སློབ་དཔོན་ཐུབ་བསྟན་རྒྱ་མཚོས་བྲིས་པའི་རིགས་ཚོགས་གྲངས་ངེས་ལ་དཔྱད་པའི་གཏམ་ཞེས་པའི་དཔྱད་རྩོམ་དེ་བཀླགས་ན་བློ་བསྐྱེད་འཕར་མ་འབྱོར་ངེས་ཡིན།

འོན་ཀྱང་དཔྱད་རྩོམ་དེར་ག་ལས་འཇིགས་མེད་རང་འགྲེལ་དུ་བསྒྲུབས་ཤིང་། རང་འགྲེལ་མིན་པར་སྨྲ་བའི་རིགས་པ་བདུན་ཙམ་ལུང་གི་གཞུ་ནས་རིགས་པའི་མདའ་ཡིས་རྨེག་མེད་དུ་བཅོམ་མོད། ད་དུང་འགའ་ཞིག་ལྷག་འདུག་པར་སྙམ་པས་ན་ཁོ་བོས་ཅུང་ཟད་དཔྱད་ན།

དང་པོ་དགེ་ཆོས་ཀྱི་གསེར་ཐང་སྟོད་ཆ་ ༣༡༨ པར། “དོགས་པ་ཤིན་ཏུ་ཆེ་བ་ནི་ག་ལས་འཇིགས་མེད་ལེའུ་ཐ་མ་ལྔ་ཀ་སངས་རྒྱས་བསྐྱངས་ཀྱི་འགྲེལ་བ་དེ་ག་རང་དུ་འདུག་ཅིང་། དེའི་རྒྱུ་མཚན་གྱིས་སངས་རྒྱས་བསྐྱངས་ཀྱི་ལེའུ་ཉེར་བདུན་པར་འཕགས་པ་ལྷའི་ལུང་དྲངས་པ་ཡང་ག་ལས་འཇིགས་མེད་དུ་བསླེབས་པར་འདུག” ཞེས་གཞན་ནས་ཤུས།

དོགས་པ་འདི་དང་དེ་བཞིན་ནཱ་ལནྡཱ་ཞིབ་འཇུག་ཏུ་དྲངས་པ། རྒྱལ་བ་དགེ་འདུན་གྲུབ་པའི་རྣམ་རྒྱལ་གྲགས་པའི་དྲིས་ལན་ནང་། ག་ལས་འཇིགས་མེད་རང་འགྲེལ་མིན་པའི་སྒྲུབ་བྱེད་གསུམ་བཀོད་པའི་དང་པོ་ནི། དཔྱད་རིན་མེད་ཀྱང་གསུམ་པ་གཞུང་གཉིས་པོ་ལེགས་པར་བཀླགས་དགོས་པའི་དཔྱད་གཞི་ཆེ། གཉིས་པ་དང་དགེ་ཆོས་དེ་དོན་གཅིག་ཏུ་འདུག་ཀྱང་ཕྱི་མས་རབ་བྱེད་ཐ་མ་བཞི་ཁྱད་མེད་དུ་བཤད་མོད། དེའང་ནོར་བ་ཡིན་ཏེ་རབ་བྱེད་ཐ་མ་ལྔའི་འགྲེལ་བ་ཁྱད་མེད་དུ་ཡོད་པའི་ཕྱིར།

ཁོང་ཚོས་བཤད་པ་དངོས་ནི་ག་ལས་འཇིགས་མེད་རང་འགྲེལ་མིན་ཏེ། དེའི་རབ་བྱེད་ཐ་མ་ལྔ་པོ་བུདྡྷ་པཱ་ལི་ཏ་ལས་དཔེ་ཤུས་བྱས་པའི་ཕྱིར་ཟེར་རེད། དེ་མིན་ཏེ་བུདྡྷ་པཱ་ལི་ཏའི་རབ་བྱེད་ཐ་མ་ལྔ་པོ་རང་འགྲེལ་ག་ལས་འཇིགས་མེད་ནས་དཔེ་ཤུས་བྱས་པའི་ཕྱིར། དེ་ལྟར་མཛད་བྱང་དང་ཞེ་ཚིག་འགྲེལ་བ་བཅས་གནད་གསུམ་གྱིས་བཤད་པར་བྱ་སྟེ།

དང་པོ་ག་ལས་འཇིགས་མེད་ཀླུ་སྒྲུབ་ཀྱིས་མཛད་པ་ཡིན་ཏེ། དེའི་མཛད་བྱང་ཉིད་ཀྱིས་གསལ་བའི་ཕྱིར། དེ་ཡང་ག་ལས་འཇིགས་མེད་ཀྱི་མཇུག་ ༣༠༨ པར། “ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་སྟོན་པ། སློབ་དཔོན་བདག་ཉིད་ཆེན་པོ་འཕགས་པ་ཀླུ་སྒྲུབ་མི་འཕྲོགས་པའི་མཁྱེན་རབ་དང་ཐུགས་རྗེར་ལྡན་པ། དེ་བཞིན་གཤེགས་པའི་ཐེག་པ་བླ་ན་མེད་པའི་ཚུལ་རབ་ཏུ་འབྱེད་པ་རབ་ཏུ་དགའ་བའི་ས་བསྒྲུབས་ནས། བདེ་བ་ཅན་གྱི་ཞིང་དུ་གཤེགས་པ་འཇིག་རྟེན་གྱི་ཁམས་དང་བའི་འོད་ཅེས་བྱ་བར། དེ་བཞིན་གཤེགས་པ་ཡེ་ཤེས་འབྱུང་གནས་འོད་ཅེས་བྱ་བར་འགྱུར་བས་མཛད་པ་ཞེས་བྱ་བ་རྫོགས་སོ།།” ཞེས་འབྱུང་བ་དང་།

བུདྡྷ་པཱ་ལི་ཏར་གོང་གི་ཚིག་དེ་ག་རང་གི་མཐར། “དེ་བཞིན་གཤེགས་པ་ཡེ་ཤེས་འབྱུང་གནས་འོད་ཅེས་བྱ་བར་འགྱུར་བས་མཛད་པ། དེའི་འགྲེལ་བ་བུདྡྷ་པཱ་ལི་ཏ་ཞེས་བྱ་བ་ཐེག་པ་ཆེན་པོ་ངེས་པའི་དོན་སྟོན་པ།” ཞེས་མི་འདྲ་བའི་ཁྱད་འབྱུང་བའི་ཕྱིར་རོ།།

གཉིས་པ་གཞུང་དེ་གཉིས་ཀྱི་རབ་བྱེད་བདུན་པར་འཕགས་པ་ལྷའི་ལུང་འདྲེན་སྟངས་ཞེ་ཚིག་གི་སྒོ་ནས་ཀྱང་ཀླུ་སྒྲུབ་ཉིད་ཀྱིས་མཛད་པར་གྲུབ་སྟེ། སངས་རྒྱས་བསྐྱངས་ཀྱིས་ལུང་འདྲེན་སྐབས། “སློབ་དཔོན་འཕགས་པ་ལྷས་ཀྱང་། ཉན་པ་པོ་དང་མཉན་བྱ་དང་། །སྨྲ་པོ་འབྱུང་བ་ཤིན་ཏུ་དཀོན། །དེ་ཕྱིར་མདོར་ན་འཁོར་བ་ནི། །མཐའ་ཡོད་མ་ཡིན་མཐའ་མེད་མིན། །ཞེས་གསུངས་པའི་ཕྱིར།” ཞེས་བྱུང་བ་དང་།

ཡང་ག་ལས་འཇིགས་མེད་དུ་ལུང་དེ་འདྲེན་སྐབས། “བཙུན་པ་འཕགས་པ་ལྷས་ཀྱང་། ཉན་པ་པོ་དང་མཉན་བྱ་དང་། །སྨྲ་པོ་འབྱུང་བ་ཤིན་ཏུ་དཀོན། །དེ་ཕྱིར་མདོར་ན་འཁོར་བ་ནི། །མཐའ་ཡོད་མ་ཡིན་མཐའ་མེད་མིན། །ཞེས་བཤད་དོ་”ཞེས་འབྱུང་བའི་ཕྱིར། དེས་ན་སྔ་མར་རང་ལས་གོང་མ་ཡིན་ཕྱིར་ཞེ་ཚིག་ཡོད་པ་དང་ཕྱི་མར་རང་ལས་མཉམ་པའམ་དམན་པ་ཡིན་ཕྱིར་ཞེ་ཚིག་མེད་པའི་ཁྱད་ཡོད་པའི་ཕྱིར་རོ།།

ཡང་བསྒྱུར་གཞི་གཅིག་ལ་སྒྱུར་བ་པོ་ཐ་དད་པས་ཁྱད་ཤོར་བར་དོགས་ནའང་། དེ་མིན་པར་དཔྱད་གཞིའི་གཞུང་དེ་གཉིས་ཀ་རྒྱ་གར་གྱི་མཁན་པོ་ཛྙཱ་ན་གརྦྷ་དང་། བོད་ཀྱི་ལོ་ཙཱ་བ་ཉི་ཟླ་ཟུང་དུ་གྲགས་པའི་ཡ་རྒྱལ་ཅོག་རོ་ཀླུའི་རྒྱལ་མཚན་གྱིས་བསྒྱུར་བར་གཞུང་གཉིས་ཀའི་འགྱུར་བྱང་དུ་གསལ་བ་དང་། དེ་བཞིན་ག་ལས་འཇིགས་མེད་རང་འགྲེལ་ཡིན་པ་ལོ་ཙཱ་ཆེན་པོ་སྐ་དཔལ་གྱིས་ཀྱང་བཞེད་པར་ཐོས།

གསུམ་པ་འགྲེལ་བའི་ཚིག་མང་ཉུང་གིས་ཀྱང་ཤེས་པར་འདུག་སྟེ། ག་ལས་འཇིགས་མེད་མགོ་ནས་འཇུག་བར་ཚིགས་བཅད་འགའ་རེ་ལས་གཞན་མང་ཆེ་བར་འགྲེལ་བ་ཚིག་ཉུང་ངུ་དང་། བུདྡྷ་པཱ་ལི་ཏར་རབ་བྱེད་ཉེར་གཉིས་བར་ཚིགས་བཅད་འགའ་རེ་ལས་མང་ཆེ་བར་ག་ལས་འཇིགས་མེད་ལ་ལྟོས་ན། འགྲེལ་བ་ཚིག་རྦད་དེ་མང་ང་དང་རབ་བྱེད་ཉེར་གསུམ་ནས་བཟུང་ཉེར་བདུན་བར་འགྲེལ་བ་ཚིག་ཉུང་དུ་ཕྱིན་པ་འདིས་ཀྱང་། གོང་གི་འདོད་པ་ལྟར་མིན་པར་རང་འགྲེལ་ག་ལས་འཇིགས་མེད་ཉིད་ལས་དཔེ་ཤུས་བྱས་པར་མངོན་ནོ། །དཔྱད་གཞི་ཙམ་དུ་བཀོད་པ་ཡིན།

       2020/5/15 ཉིན་ཚེ་ནོར་ནས་ཤར་མར་བྲིས་པས་མཛུབ་མོས་གནོན་ནོར་ཤོར་བའི་ཡིག་ནོར་ཡོད་ན་དགོངས་དག་ཞུ།

ཡོངས་ཁུངས། རྩོམ་པ་པོའི་ངོ་དེབ་ཀྱི་མདུན་ངོས་ལས་བཤུས།