རིགས་གསུམ་མགོན་པོ།

རྩོམ་པ་པོ། ནུབ་རི་བ་མི་ཕམ་རྣམ་རྒྱལ། (སྔ་འགྱུར་མཐོ་སློབ་ཆེན་མོ།)

༈ ཉི་གཞོན་ལང་ཚོ་གངས་རིའི་འདབས་སུ་བཞད།།

ལ་ལུང་མང་བརྒལ་འཕགས་ཡུལ་ཞིང་དུ་ཕེབས།།

མདོ་སྔགས་ཀུན་ལ་ཐོས་བསམ་ཕ་མཐར་གསོན།།

སྔ་འགྱུར་བསྟན་ལ་སྲོག་གི་ཀ་ཆེན་གསུམ།།

མཁན་ཆེན་པདྨ་ཤེས་རབ།

པདྨ་ཀ་རའི་བསྟན་པའི་གྲལ་དུ་བསྐྱོད།།

ཤེས་རབ་གསུམ་གྱིས་འགྲོ་བའི་མུན་པ་འཇོམས།།

ངུར་སྨིག་འཛིན་པ་སྡོམ་བརྩོན་ཀུན་གྱི་གཙུག།

མཚུངས་མེད་བླ་མ་ཁྱེད་ལ་ཅིས་མི་གུས།།

ངུར་སྨྲིག་སྡོམ་བརྩོན་དཔལ་གྱི་རྣམ་རོལ་ཁྱེད།།

ཁྲོ་ཉམས་བྱམས་བརྩེས་བཞིན་རས་སྣང་བ་དང་།།

མཐོ་དམན་ཀུན་ལ་བཀའ་བསྐྱོན་གཏོང་ལུགས་ལ།།

གསང་བདག་ཕྱག་ན་རྡོ་རྗེ་ཁྱེད་མིན་སུ།།

མཁན་ཆེན་རྣམ་གྲོལ་ཚེ་རིང་།

རྣམ་པར་གྲོལ་བའི་ལམ་བཟང་མ་ནོར་སྟོན།།

དུས་ཀྱི་སྙིགས་མ་འགག་ལ་ཐུག་པའི་ཚེ།།

ཁྱེད་ཀྱི་ལམ་སྟོན་བཟང་པོའི་སྒྲོན་མེ་དེས།།

རིང་མིན་བསམ་དོན་གྲུབ་ལ་ཅིས་མི་གུས།།

མདོ་སྔགས་གཞུང་ལ་སྨྲ་བ་ཟླ་མེད་ཅིང་།།

ཐོས་བསམ་སྒོམ་པའི་དམ་པ་ཀུན་གྱི་གཙུག།

སྙིགས་དུས་ཤེས་རབ་སྩོལ་བའི་རྣལ་འབྱོར་དེ།།

འཇམ་དཔལ་གཞོན་ནུ་ཟླ་གཞོན་ཁྱེད་མིན་སུ།།

མཁན་ཆེན་ཚེ་དབང་རྒྱ་མཚོ།

ཚེ་རབས་ཀུན་ཏུ་དམ་པའི་ངང་ཚུལ་ཞིག།

མཁས་པའི་གནས་ལ་མངའ་དབང་དཔལ་གྱིས་ཕྱུག།

རྒྱལ་བ་རྒྱ་མཚོའི་ཚོགས་གཉིས་དཔལ་འབྱོར་བས།།

དྲིན་ཅན་བླ་མ་དེ་ལ་ཅིས་མི་གུས།།

ཞི་དུལ་འཛུམ་གྱིས་བསུས་ཤིང་ཐར་ལམ་སྟོན།།

སྐད་གཉིས་སྨྲ་བས་གོ་ལ་འཁྱོན་དུ་སྐོར།།

གཏན་དུ་ཁྲོ་བར་མི་མངའ་བྱམས་པའི་འཛུམ།།

སུ་འདྲ་མཇལ་ཡང་སྤྱན་རས་གཟིགས་དབང་དངོས།།

མཆོག་སྤྲུལ་མིན་ཡང་རིགས་གསུམ་མགོན་པོ་དངོས།།

གསེར་ཁྲི་མེད་རུང་སྔ་འགྱུར་རྒྱལ་འཚབ་དངོས།།

སྙན་གྲགས་མེད་རུང་དམ་པ་ཀུན་གྱི་མགོན།།

གྲུབ་དབང་བླ་མའི་ཐུགས་སྲས་རྣམ་གསུམ་ཡིན།།

བདག་ཅག་བློ་གྲོས་རྩལ་དང་མི་ལྡན་རུང་།།

ལས་སྨོན་དང་འབྲེལ་མགོན་པོ་རྣམ་གསུམ་མཇལ།།

དེ་བས་གང་དུ་ཕྱིན་ཡང་རང་ཉིད་ལ།།

རང་ཉིད་ངན་རུང་སྐྱབས་ཡུལ་མ་ནོར་མཆིས།།

པར་རིས་དེ་མཇལ་བ་དང་སྨྱུག་རྩེ་དལ་གྱིས་བཀོད་ལ་འདོད་པ་པོ་མི་ཕམ་རྣམ་རྒྱལ་ལམ་ཨ་བྷྱ་རཱ་ཛཱ་ནས།།

རྩོམ་ཁུངས། རྩོམ་པ་པོའི་ངོ་དེབ་དྲྭ་བ།