སྔ་འགྱུར་བསྟན་པ་རྒྱས་པའི་ཕ་ས་ནས། །ཀུན་གསལ་ཉི་མའི་མགོན་པོ་གཤེགས་འདི་སྐྱོ།།

ཚེ་དགའ་དབང་རྒྱལ། རྣམ་གྲོལ་གླིང་།

 

དུས་ཀྱི་ལོ་ཟླ་ནག་པོ་མཁའ་ནས་འཆར།།

ཉམ་ཐག་སེམས་ཅན་བསོད་ནམས་མཐའ་ལ་ལྷུང་།།

ལས་དང་སྐལ་བ་རྫོགས་པའི་འཇིག་རྟེན་ནས།།

འགྲོ་བའི་མགོན་པོ་གཅིག་གཤེགས་གཉིས་གཤེགས་རེད།།

 

ལས་ཉོན་འཁོར་བར་འཁྱམས་པའི་གྲོང་ཁྱེར་ནས།།

དུག་གསུམ་མེ་ལྕེ་དམར་པོ་ཡར་ཡར་འབར།།

སྣང་སྲིད་དགྲ་ལ་ཤར་བའི་དུས་སྐབས་དེར།།

འདྲེན་མཆོག་དེད་དཔོན་གཅིག་བཞུད་གཉིས་བཞུད་རེད།།

 

ནད་དང་མུ་གེ་སྐལ་ངན་ཕྱི་ནས་རྡུང་།།

བླ་མ་གཤེགས་པའི་མྱ་ངན་ནང་ནས་རྡུང་།།

ལུས་སེམས་སྡུག་གིས་གང་བའི་སྨྲེ་ངག་འདི།།

གདུང་བའི་དབྱངས་ལ་གཏེགས་པའི་མཆོད་པ་ཡིན།།

 

རྣམ་དག་རྒྱལ་བསྟན་ཆུ་བོ་རྒྱས་པའི་སྐབས།།

ལྟ་ལོག་བཙན་དམག་མཁར་རྫོང་བོད་ལ་ཟུག།

བཤད་སྒྲུབ་ཉི་ཟླ་གཉིས་པོ་ནུབ་པའི་སྐབས།།

གྲུབ་དབང་བླ་མའི་ཕྱག་གཡས་ཁྱེད་ཀྱིས་བཟུང་།།

 

བྱང་ཕྱོགས་ཁ་བ་ཅན་གྱི་སྨད་ལྗོངས་ནས།།

སྔ་འགྱུར་བསྟན་པ་རྒྱས་པའི་ཕ་ས་འདིར།།

བཙན་དང་དབང་གིས་ཐབས་ངན་ཅི་བྱུང་ཡང་།།

རྒྱལ་བསྟན་སྲོག་གི་འཇུ་ཐག་གློད་མ་མྱོང་།།

 

རྒྱ་མཚོའི་ཕར་ནང་ཆགས་པའི་ཆོས་སྒར་དེར།།

སྲིད་འབྱོར་གཉིས་ཀྱིས་རྒུད་པ་གང་བྱུང་ཡང་།།

བཤད་སྒྲུབ་བསྟན་པ་རྒྱ་མཚོར་ཐུགས་བཅངས་ནས།།

གྲུབ་དབང་བླ་མའི་བཞེད་དོན་ཞིག་མ་མྱོང་།།

 

རིག་འཛིན་གོང་མའི་ཕྱག་བཞེས་གནད་ལ་མཁས།།

ཟབ་ཁྲིད་མན་ངག་ལམ་གྱི་བརྒྱུད་པ་ཕྱུག།།

ཕ་ཆོས་རིང་ལུགས་གཙང་མའི་རྒྱུན་གདམས་པས།།

རྒྱལ་བ་དཔལ་ཡུལ་ཚང་གི་མིག་སྟོན་ཡིན།།

 

མདོ་སྔགས་ལེགས་བཤད་རྒྱ་མཚོའི་དགོངས་དོན་བརྙེས།།

ཉམས་རྟོགས་སེམས་ཉིད་རིག་པའི་རྩལ་ཆེན་རྫོགས།།

ཀུན་ལ་འཛུམ་པའི་དགེ་སྦྱོང་ཚུལ་ལྡན་པས།།

དམན་ས་ལམ་དུ་བཟུང་བའི་བླ་མ་ཡིན།།

 

དུས་ངན་སྡུག་གི་ལ་མོ་མ་ཟད་གོང་།།

གཏམ་ངན་སེམས་རྩ་བཟི་བའི་སྒྲ་ཞིག་ཐོས།།

ཁྱེད་སྐུ་ཞིང་གཞན་གཤེགས་པའི་སྣང་ཚུལ་འདི།།

ཡབ་རྗེ་མགོན་པོའི་མཛད་མཐའ་དྲན་དུ་བཅུག།

 

འདུ་འཛོམས་སྣང་བ་འཁྲུགས་པའི་རྒྱ་གྲོང་ནས།།

སྐུ་གདུང་གསེར་མདོག་ཅན་དེ་གདན་དྲངས་སྐབས།།

འཕགས་ཡུལ་ལྷོ་གླིང་ཆེན་པོའི་ལྷ་ཁང་ནང་།།

དེ་སྔོན་ཞལ་འཛུམ་མངོན་པའི་མདངས་འདི་དྲན།།

 

གྲུབ་དབང་མཚན་དཔེ་ལོ་འདབ་མ་རྒྱས་གོང་།།

ཁྱེད་སྐུ་ཉི་འོད་ནུབ་རིའི་གཟེབ་དུ་ཡིབ།།

གདུལ་བྱ་མ་སྨིན་འདུལ་བྱེད་ནུབ་པ་འདི།།

བྲང་ཁོག་སྟོད་ཀྱི་སེམས་པ་ལྷག་པར་སྐྱོ།།

 

སྲིད་གསུམ་མི་རྟག་གྲོང་ཁྱེར་ཆེན་པོ་ནས།།

མོས་གུས་ཁྱེད་ལ་ཕྱོགས་པའི་སློབ་ཚོགས་ཚོས།།

ཡང་སྤྲུལ་གཟུགས་སྐུ་སྡོང་པོ་མྱུར་བཞད་པའི།།

རེ་འདུན་ནང་གི་རྨི་ལམ་བསྒུག་བསྡད་ཡོད།།

 

བདག་སོགས་དེ་ནས་ཚེ་རབས་ཐམས་ཅད་དུ།།

མི་བྲལ་ཁྱེད་ཀྱི་བརྩེ་བས་རྗེས་གཟུང་ནས།།

ས་དང་ལམ་ལ་བར་ཆད་མི་འབྱུང་བ།།

ཞིང་མཆོག་པདྨ་འོད་དུ་མཇལ་བར་ཤོག།

 

ཕྱི་ལོ་ ༢༠༢༡ ཟླ་བ་ ༡ ཚེས་ ༡༩ ཉིན། བླ་མ་དགོངས་རྫོགས་ཀྱི་བདུན་ཚིགས་གཉིས་པའི་སྐབས་ཀྱི་ཞོགས་པར་རང་ཤག་ཏུ་ཤར་མར་བྲིས་པའོ།། 

ཡོང་ཁུངས།: རྩོམ་རིག་པའི་གཞིས་ཀའི་ཏར་འཕྲིན་བརྒྱུད་ལམ།