ཞོགས་པའི་རོལ་དབྱངས།

ནམ་སྟོད་ཤེས་རབ་རྒྱལ་མཚན། (སྔ་འགྱུར་མཐོ་སློབ་ཆེན་མོ།)

མ་ཉལ་མ་ཉལ་ཡར་ལ་ལོངས་ཤོག།

ཞོགས་པའི་ལྗོངས་སུ་འཆམ་འཆམ་ཆས་འགྲོ།།

ཙན་དན་དྲི་ངད་ཐུལ་ཐུལ་བྲོ་སའི།།

ལྷོ་ཕྱོགས་ནགས་མའི་ཚལ་ལ་ཆས་འགྲོ།།

ཆགས་སྡང་རྨོངས་པས་ཇུས་གཏོགས་རྐྱང་རྐྱང་།།

སྤྱི་ཚོགས་དྲྭ་བར་མགོ་བོ་མ་འཁོར།།

ཞོགས་པའི་རོལ་དབྱངས་དཀྲོལ་དུ་ཕེབས་དང་།།

དབྱངས་ཅན་ལྷ་མོའི་ཉེ་སར་བཅར་འགྲོ།།

ཉི་མའི་འོད་ཀྱི་ཟེར་ཐག་རེ་རེ།།

དབྱངས་ཅན་ལྷ་མོའི་ཕོ་ཉ་དངོས་རེད།།

ལྷོད་ཀྱིས་བསྒུགས་ལ་ཉམས་སུ་མྱོངས་དང་།།

སྙན་མོ་དབྱངས་ཀྱི་དངོས་གྲུབ་སྩོལ་ངེས།།

གསེར་མདོག་ཉི་མ་གཞོན་ནུའི་འོད་ཟེར།།

གསེར་ཕིབས་རྩེ་ལ་ལམ་ལམ་ཕོག་དུས།།

རྣམ་གླིང་གསེར་གྱི་ལྷ་ཁང་ཆེན་མོ།།

གསེར་འོད་སྔར་ལས་ཆེས་ཆེར་འཕྲོས་བྱུང་།།

བཀྲག་མདངས་འཚེར་བའི་གསེར་འོད་དེ་ནི།།

ཨེ་མ་ཅི་འདྲའི་མཛེས་སྡུག་ལྡན་པ།།

ཡབ་རྗེ་གྲུབ་དབང་བླ་མ་མཆོག་གིས།།

བྱམས་བརྩེའི་འོད་སྣང་བཀྱེ་བ་འདྲ་བྱུང་།།

ཙན་དན་དྲི་བསུང་ལེགས་སྐྱེས་ཁུར་ཞིང་།།

འཇམ་ཞིང་ཡང་བའི་ཞོགས་རླུང་གཙང་མ།།

དབྱངས་ཅན་ལྷ་མོའི་ཁ་རླངས་ཡིན་ནམ།།

རེག་པ་ཙམ་གྱིས་བདེ་སྣང་བྱིན་སོང་།།

འཇའ་རིས་བསླས་པའི་རི་མོ་ནང་བཞིན།།

མེ་ཏོག་ཚོམ་བུ་ཚོམ་བུར་བཀྲ་བས།།

གཙུག་ལག་ཁང་གི་ཁོ་ར་ཁོར་ཡུག།

ལྷ་ཡུལ་བཞིན་དུ་མཛེས་པར་བྱས་སོ།།

འདི་ན་རྒྱུ་བའི་ངུར་སྨྲིག་འདུས་སྡེ།།

ཞལ་ནས་སིདྡྷིའི་འཛབ་དབྱངས་དིར་དིར།།

ཕྱག་ན་ཙན་དན་ཕྲེང་བ་ནར་ནར།།

ཨོ་རྒྱན་པདྨའི་རྗེས་འཇུག་རྣལ་མ།།

ཞོགས་པ་འདི་ནི་ཁ་རླུང་གཙང་བ།།

ཞོགས་པ་འདི་ནི་བསིལ་ཞིང་སྐྱིད་པ།།

ཞོགས་པའི་ལྗོངས་སུ་འཆམ་འཆམ་ཕྱིན་པའི།།

ཞོགས་པའི་རོལ་དབྱངས་ཅུང་ཙམ་དཀྲོལ་ཡོད།།

རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་།

ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང་།

རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-ཞོགས་པའི་རོལ་དབྱངས།