ཚེ་རིང་བླ་མ། དེཧ་རཱ་དཱུན་ས་སྐྱ་དགོན།
རང་སྲོག་གཅེས་པར་འཛིན་པའི་མི་ལུས་རྣམས།།
འཚོ་བ་ཤ་ལ་བརྟེན་པའི་ལག་རྗེས་འདིར།།
ཅུང་ཟད་བསམ་ཚེ་གཞན་སྲོག་འཕྲོག་པ་ཡིས།།
ཤ་ཁྲག་ཚིལ་གསུམ་བརྔམ་པའི་ང་ཚོ་ནི།།
རང་ཉིད་གཅེས་པར་འཛིན་ནས་ད་བར་ལུས།།
གཞན་སྲོག་གཅོད་ལ་ཐེ་ཚོམ་མེད་པ་འདིས།།
རང་གི་བདེ་སྐྱིད་གཡངས་ལ་བསྐུར་འདུག་གོ།
རང་ལུས་ཚེར་མ་ཅུང་ཟད་ཟུགས་པའི་ཚེ།།
བཟོད་པར་དཀའ་བའི་ངུ་འབོད་འཆོར་ན་ཡང་།།
མགོན་མེད་བདུད་འགྲོའི་ཚེ་སྲོག་འཕྲོག་པ་འདིས།།
ལས་འབྲས་ཕྱིན་ཅི་ལོག་པར་མ་བྱས་བསམ།
ཁ་ནས་གཞན་དོན་ཟེར་ཞིང་ཁོག་ནས་རང་དོན་ལ།།
མ་བོས་ལྷུག་ལྷུག་རྩོམ་པའི་དེང་གི་མི་བུ་ཚོས།།
རང་ལུས་འཚོ་ཕྱིར་གཞན་སྲོག་གཅོད་པ་འདིས།།
ལས་འབྲས་འཁོར་ཚེ་སྐྱབས་འཇུག་སུ་ལ་ཞུ།།
དལ་འབྱོར་མི་ལུས་ཐོབ་ཀྱང་དོན་མེད་བཏང་།།
ཚེ་འདིར་རང་དོན་གྲུབ་ནས་གཞན་དོན་བཅོམ།།
ཨེ་མ་འདི་འདྲ་མི་ཡིས་བྱས་ཉེས་ལ།
ཅུང་ཟད་བསམ་ཚེ་ལུས་སེམས་འདར་འདར་བྱེད།།
ཉིན་གཅིག་ལྷོད་བདེར་སྡོད་ལོང་མེད་པ་འདི།།
ཤ་དང་ཁྲག་ལ་སྲེད་པའི་འདོད་རྔམ་ཅན།།
ང་ཚོས་བྱས་པའི་ཉེས་པ་ཚབས་ཆེན་ལས།།
འབྱུང་གི་ཡོད་པ་ཅུང་ཟད་སོམས་དང་ཀྱེ།།
འཆི་འདོད་མེད་པའི་ཉམ་ཆུང་བདུད་འགྲོ་ཚོར།།
ཅུང་ཟད་སྨྲ་བའི་སྐལ་པ་ལྡན་གྱུར་ན།།
སྡུག་བསྔལ་གང་ཡོད་འུ་ལ་སྨྲས་པའི་ཚེ།།
ཁ་ནས་ཁྲག་ཀྱང་སྐྱུག་པར་ཅིས་མི་འཚལ།།
མར་གྱུར་སེམས་ཅན་ཟེར་ཞིང་ལོ་མང་ཕྱིན།།
ཁ་རུ་ཤ་ཟ་ཁྲག་འཐུང་གང་འཚམ་བྱེད།།
ཁ་དོན་མི་མཚུངས་ང་ཚོའི་བྱེད་སྟངས་དེས།།
ད་གཟོད་རང་གིས་མི་མྱོང་སུ་ལ་གཡོར།།
རང་དོན་འབའ་ཞིག་སྒྲུབ་པའི་དེང་རབས་ཚོས།།
འདོད་རྔམ་ཆེ་བའི་བྱས་ཉེས་ཤོར་བའི་འོག།
ཉམ་ཆུང་བདུད་འགྲོའི་རང་དབང་འཕྲོག་པ་འདིས།།
བཟོད་དཀའི་ངན་འགྲོའི་སྡུག་བསྔལ་སུས་མྱོང་སོམས།།
ཤ་བཟའ་ཁྲག་ལ་སྲེད་པའི་བྱས་ཉེས་ལས།།
ད་ནི་ཉམ་ཆུང་བདུད་འགྲོ་རྫོགས་ལ་ཉེན།།
སྟོན་རྒྱུ་མེད་པའི་ཁ་ཡི་གཞན་དོན་དག།
ཁོང་རུལ་སོང་བའི་གཞན་དོན་ཨེ་མ་མཚར།།
ཁ་ནས་མར་གྱུར་སེམས་ཅན་འདོན་བཞིན་དུ།།
ལག་ནས་བསད་ཤ་བཟའ་བའི་བྱེད་སྟངས་འདི།།
དངོས་གནས་ཕྱིན་ཅི་ལོག་པའི་ཉེས་བྱས་ལ།།
ཅུང་ཟད་དཔྱོད་ཚེ་ལུས་སེམས་ཡོམ་ཡོམ་བྱེད།།
དྲྭ་གྲོཊ་གངས་དཀར་འཚོ་ཡིས་བརྩམས་ཐུང་དེ་མཐོང་བ་དང་བཀླགས་ཚེ། འདི་ཙམ་ཞིག་རང་གི་སོར་རྩེ་ནས་དབང་མེད་དུ་ཐལ་ལོ།།
_______________
རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་ཟིན་བྲིས་དྲྭ་བ།
ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང།
རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-མིའི་འགྲོ་བས་བཟས་ནས་རྫོགས་ལ་ཉེན་པའི་ཚེ་སྲོག
࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།