«ངས་ཀྱང་ཁོང་ཀློག་གིན་ཡོད།» འཛམ་གླིང་དཔེ་ཀློག་གི་ཉིན་མོར།

རྫ་ཚེ་རིང་བཀྲ་ཤིས།

རེད་རེད། 

ངས་ཀྱང་ཁོང་ཀློག་གིན་ཡོད། 

ཁོང་ནི་དཔེ་དེབ་མ་ཡིན་པའི་དཔེ་དེབ་ཅིག་རེད། 

ཁོང་ནི་ཀློག་དཀའ་བའི་དཔེ་དེབ་ཅིག་རེད།

ཁོང་ནི་གོ་བདེ་བའི་དཔེ་དེབ་ཅིག་རེད།

དཔེ་དེབ་དེའི་མིང་ལ་ཚུལ་ཁྲིམས་བློ་གྲོས་ཟེར།

ཁོང་གི་ཤེས་རབ་དང་སྙིང་རྗེ། 

ཁོང་གི་རིགས་ཞེན་དང་སྤོབས་པ། 

ཁོང་གི་ཞི་དུལ་དང་བག་ཡོད།

ཁོང་གི་བཟོད་སྒོམ་དང་སྒམ་དཀྱེལ།

ཁོང་གི་ཐུགས་བསྐྱེད་དང་མཛད་བཟང་།

རེ་རེ་ནས་བཀླགས་པ་ཡིན།

བདུད་རྩི་བཞིན་འཐུང་བ་ཡིན།

ནངས་རེ་བཞིན་དུ་བཀླགས་པ་ཡིན། 

ནུབ་རེ་བཞིན་དུ་ཀློག་གིན་ཡོད།

མ་གཞི་ཁོང་ནི་ཆ་མེད་ཀྱི་གླེགས་བམ་ཞིག་མ་རེད།

ཉིན་རྟག་པར་ང་ཚོ་ཚང་མས་ཀློག་གིན་ཡོད། 

ཕྲིན་འཕྲན་དང་པོད་ཕྲན། 

མགྱོགས་འཕྲིན་དང་ཐད་གཏོང་། 

ཇ་ཁ་དང་ཆང་ཁ། 

མཁས་གྲལ་དང་བླུན་ཚོགས། 

ག་ས་གང་དུ་སོང་ཡང་ཁོང་ཀློག་མཁན་མང་པོ་འདུག

འདས་པའི་དུས་ན་བཀླགས་པ་བཞིན།

མ་འོངས་པ་ན་ཡང་བཀླག་པར་འགྱུར།

ཡིན་ན་ཡང་། 

ཀློག་སྟངས་གཏན་ནས་འདྲ་གི་མི་འདུག

འགའ་རེས་ཐད་ལ་ཀློག

འགའ་རེས་ཐུར་དུ་ཀློག

འགའ་རེས་གྱེན་ལ་ཀློག 

གཅོད་མཚམས་མི་འདྲ་ལ་སྒྲ་གདངས་ཡང་མི་གཅིག

གོ་རིམ་མི་འདྲ་ལ་རྒྱས་བསྡུས་ཀྱང་མི་འདྲ།

ཡིག་ངོ་ཆོད་པ་ཚོ་ནང་བཞིན། 

ཡིག་ངོ་མི་ཤེས་པ་ཚོས་ཀྱང་ཤར་རེར་ཀློག་གིན་འདུག

སྐད་གདངས་ལྷག་ཏུ་མཐོ།

དྲན་པ་རྣལ་དུ་གནས་པ་ཚོ་ནང་བཞིན། 

ཆང་གིས་ར་རོ་བ་ཚོས་ཀྱང་ཁ་བྱང་ལྕེ་བྱང་དུ་ཕྱིན་འདུག

མཆན་འགྲེལ་ལྷག་ཏུ་མང་།

གང་ལྟར་ཚང་མས་ཁོང་ཀློག་གིན་འདུག

དེ་ནི་དུས་རབས་འདིའི་མགོ་སྟོད་ཀྱི་བོད་པ་ཚོའི་ངག་ན།

ཉིན་ལྟར་ཀློག་དགོས་པ་ཞིག་ཆགས་འདུག

ཡིན་ན་ཡང་།

གཅོད་མཚམས་མ་ནོར་བར་ཀློག་མཁན་ཉུང་བར་སྣང་།

ཟུར་ཕྱིན་པའི་ཀློག་པ་པོ་ནི་དེ་བས་ཉུང་། 

ཚིག་རྗེས་དོན་དྲན་གྱི་ཀློག་པ་པོ་ནི་ཧ་ལམ་མེད།

ཚིག་དོན་ཀློང་དུ་གྱུར་པ་ནི་ཉིན་མོའི་སྐར་མ་ལས་ཀྱང་དཀོན།

ང་རང་ཉིད་ཀློག་པ་པོ་བཟང་པོ་ཞིག་མིན་ན་ཡང་།

ངས་ཁོང་ཉིད་བཀླགས་ནས་རིང་ཞིག་ལོན།

ད་དུང་ཡང་ཀློག་གིན་ཡོད།

ཁོར་ཡུག་སྐད་ཅོར་ཚ་ས་ནས་ཀྱང་ཀློག་མཚམས་བཞག་མེད།

བཀླགས་ཀྱིན་བཀླགས་ཀྱིན་ཧ་ཅང་སྐྱིད་དུ་ཚོར།

ཡིག་འབྲུ་རེ་བཞིན་འོད་དུ་འཚེར་བ་མཐོང་།

དུད་འགྲོའི་རང་དབང་གི་ཉིན་མོར་ཁོང་ཀློག་གིན་ཡོད།

སྐད་ཡིག་སྲུང་སྐྱོབ་ཀྱི་ཉིན་མོར་ཁོང་ཀློག་གིན་ཡོད།

ཨེ་ཙི་སྔོན་འགོག་གི་ཉིན་མོར་ཁོང་ཀློག་གི་ཡོད།

མི་རིགས་རིག་གནས་ཀྱི་ཉིན་མོར་ཁོང་ཀློག་གི་ཡོད།

སྒེར་གྱི་མི་ཚེའི་ལམ་སྟོན་གྱི་ཆེད་དུ་ཁོང་ཀློག་གིན་ཡོད།

སྤྱི་ཡི་དུས་ཀྱི་ཁ་ཕྱོགས་ཀྱི་ཆེད་དུ་ཁོང་ཀློག་གིན་ཡོད།

མདོར་ན། 

ང་རང་ཉིད་མི་ཚེ་འདིར་ཁོང་གི་ཀློག་པ་པོ་ཞིག་ཏུ་གྱུར་པ་ནི་ངའི་བསོད་ནམས་ཡིན།

འཛམ་གླིང་དཔེ་ཀློག་གི་ཉིན་མོའི་དཔེ་ཀློག་དང་ཐད་ཀར་མ་འབྲེལ་བ་ལྟར་སྣང་ན་ཡང་། ད་ལྟ་རང་དྲ་རྒྱབ་ནས་དྲ་གྲོགས་གླིང་ཚང་མདའ་སྨྱུག་ཞུ་བས་འདི་འདྲ་པོ་ཞིག་བྲིས་འདུག་པ་མཇལ་བའི་རྐྱེན་བྱས་ཏེ། ཉམས་མཚར་ཙམ་དུ་འབྲི་འདོད་བྱུང་བ་ལྟར་དེ་མ་ཐག་ཡི་གེར་བཏགས་སོ། །རྫ་ཚེ་རིང་བཀྲ་ཤིས་ཀྱིས།

_______________

རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་ཟིན་བྲིས་དྲྭ་བ།

ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང།

རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-«ངས་ཀྱང་ཁོང་ཀློག་གིན་ཡོད།» འཛམ་གླིང་དཔེ་ཀློག་གི་ཉིན་མོར།

࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།