རྫོགས་ཆེན་གླིང་གི་སྐྱེས་བུ་དམིགས་བསལ་བ་འགའ་རེའི་རྟོགས་པ་བརྗོད་པ།

རྫོགས་ཆེན་གླིང་ནི་སྔ་འགྱུར་རྙིང་མའི་རིག་འཛིན་སྔགས་པ་ཕོ་མོ་རྣམས་ཀྱི་དམ་ཆོས་བགྲོ་གླེང་གནང་སའི་གླེང་སྟེགས་ཤིག་རེད།

མེ་འོད། 

བཅོས་མའི་ཤུན་པ་རིང་དུ་དོར། །

མ་ངེས་སྤྱོད་པས་འགྲོ་དོན་མཛད། །

མདོ་སྔགས་གནས་ལུགས་ཐུགས་སུ་ཆུད། །

མཆོག་སྤྲུལ་སྨྱོན་པས་བྱིན་རླབས་རྩོལ། །

མཇལ་ན་གཟི་ལྡན་བྱིན་རེ་ཆགས། །

འཆད་ན་མཁས་དགུའི་སྙན་དབང་འཕྲོག །

ཉམས་ལེན་མངོན་རྟགས་ཕུལ་བྱུང་བ། །

དོལ་པོ་ཤྭཀྱའི་ཞབས་ལ་འདུད། །

རྣམ་རྟོག་སྤྲོས་པའི་མཁར་རྫོང་བཤིག །

སྤྲོས་མེད་མགུར་དབྱངས་ཐག་སེ་ཐག །

ཞི་དུལ་ཐུགས་འཇམ་གཞན་སེམས་འགུག །

ནམ་མཁའ་ཆོས་ཉིད་ཕྱག་གི་ཡུལ། །

རྫོགས་ཆེན་ལམ་ལ་དད་གུས་ཟབ། །

མདོ་སྔགས་རིགས་གཞུང་སྦྱང་པ་ཆེ། །

རང་རིགས་ཤ་ཞེན་ལྷག་བསམ་མངའ། །

འཇིགས་མེད་ཆོས་དབང་བཀུར་བའི་གནས། །

དད་གུས་དག་སྣང་གཞན་ལས་ལྷག །

སེམས་ཉིད་གནས་ལུགས་སྐྱོང་ལ་མཁས། །

མང་ཐོས་ལུང་རིགས་ཆར་ལྟར་འབེབ། །

ཐང་དཀར་རྒོད་པོ་བླ་མ་ཡག །

བསྟོད་སྨད་རེ་དོགས་འཇིགས་པ་བྲལ། །

གང་ཤར་ཉམས་སྣང་བརྡ་གླུ་ལེན། །

མཆོག་སྤྲུལ་སྨྱོན་པས་ཐུགས་རྗེས་བཟུང་། །

འཆར་རན་སྨྱོན་པ་གྲོགས་ཀྱི་མཆོག །

ད་དུང་རྫོགས་ཆེན་གླེང་སྟེགས་ནང་། །

འདི་འདྲའི་སྐྱེས་བུ་ངོ་མཚར་ཅན། །

མང་བར་མཐོང་ཡང་རེ་རེ་བཞིན། །

ཡོན་ཏན་བརྗོད་པར་མ་ཁོམ་མོ། །

ཞེས་མེ་འོད་ནས་ཤར་མར་བྲིས། 

_______________

རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་ཟིན་བྲིས་དྲྭ་བ།

ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང།

རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-རྫོགས་ཆེན་གླིང་གི་སྐྱེས་བུ་དམིགས་བསལ་བ་འགའ་རེའི་རྟོགས་པ་བརྗོད་པ། 

࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།