ས་ཟླའི་ཚེས་ཆེན་བཅོ་ལྔའི་སྟོན་པའི་རྗེས་དྲན་གྱི་སྙན་ངག་ཆེད་བསྒྲིགས།

༼༡༽
དད་པའི་མེ་ཏོག

ཨ་འདུས་སྐལ་བཟང་རྒྱ་མཚོ།

ལྗོན་པའི་དབང་པོ་བྱང་ཆུབ་ཤིང་དྲུང་དེར།།

རྡོ་རྗེའི་ཏིང་འཛིན་གདན་དུ་བྱས་པ་ན།།

མི་འཇིགས་རྣམ་བཞིའི་གཙང་པོ་གཞིབས་པ་ཡི།།

རྣམ་འདྲེན་ཆུ་གཏེར་ཆེན་པོ་ཡང་ཡང་དྲན།།

བསམ་གཞིགས་རེ་རེའི་འོད་ཀྱིས་ཉོན་མོངས་སངས།།

ཏིང་འཛིན་རེ་རེའི་ངོགས་ནས་ཤེས་རབ་རྒྱས།།

ཐབས་ཤེས་ཟུང་གིས་བདུད་དཔུང་མ་ལུས་བཅོམ།།

སྲིད་ཞིའི་ཡོན་ཏན་མ་ལུས་ཁྱོད་ལ་ལྡན།།

ཚོགས་གཉིས་ཤེས་བྱའི་སྐར་ཚོམ་རྒྱན་དུ་བཏགས།།

དོན་གཉིས་ཀུན་དའི་ཚལ་ཆེན་དབང་དུ་བསྡུས།།

བདེན་གཉིས་བསིལ་ཟེར་ཕྱོགས་བཅུར་འགྱེད་པ་ཡི།།

སྐུ་གཉིས་དུང་གི་ཟླ་བ་ཚེས་པ་ན།།

སྨིན་མཚམས་མཛོད་སྤུའི་འོད་དཀར་བྱིན་དུ་ཆགས།།

ཕྱག་ཞབས་འཁོར་ལོའི་སྨིན་དྲུག་ལྷང་ངེར་བཀྲ།།

དབུ་ཡི་གཙུག་ཏོར་སྐུ་ཡི་འོད་སྣང་སོགས།།

ངོ་མཚར་མཚན་དཔེ་འབུམ་གྱིས་མཛེས་དེར་འདུད།།

ཤེས་རབ་སྤྱན་གྱིས་འགྲོ་འདི་བོར་མ་མྱོང་།།

བརྩེ་བའི་ཐུགས་རྗེས་མ་རྣམས་བརྗེད་མ་སྤོབས།།

ཁྱེད་ཀྱི་ཞབས་རྗེས་འོད་དུ་འཚེར་བའི་རླབས།།

ལན་གཅིག་དྲན་པའི་སྐལ་བ་བདག་ལ་ཐོབ།།

ས་ག་ཟླ་བའི་ཡར་ཚེས་བཅོ་ལྔའི་ཉིན་ཨ་འདུས་པས་སྨོན་པའོ།།

༼༢༽
«སྟོན་པ་བཀའ་དྲིན་གྱི་འཁྲུངས་སྐར་བསུ།»

ལམ་བཟང་པོ།

ཞབས་པདྨོ་ལུམ་བིའི་སྐྱེད་ཚལ་དུ་བཀོད་པ།།

ལུས་བཀའ་ཐུབ་ཆུ་ཀླུང་འགྲམ་ངོགས་སུ་སྤྱད་པ།།

སེམས་དེ་ཉིད་བྱང་ཆུབ་ཤིང་དྲུང་ནས་རྙེད་པ།།

ཆོས་བདེན་བཞི་དྲང་སྲོང་ནགས་ཀློང་དུ་བསྐོར་བ།།

ཡེ་གདོད་མའི་དབྱིངས་སུ་ཆོས་སྐུ་ཡི་བདག་ཉིད།།

གནས་འོག་མིན་ཞིང་ཁམས་ལོངས་སྐུ་ཡི་རྣམ་རོལ།།

ཡུལ་འཛམ་བུ་གླིང་དུ་གཟུགས་སྐུ་ཡི་སྤྲུལ་པ།།

སྐྱབས་སྐུ་གསུམ་སྐུ་འདུས་མགོན་པོ་ཁྱེད་འདུད་དོ།།

ཡུལ་མཐའ་འཁོབ་ཡིན་པ་འཁོར་བ་ཡི་ཐང་ཆེན།།

མི་བློ་གྲོས་མེད་པ་ཤིང་ནགས་ཀྱི་དམུ་རྒོད།།

སེམས་ཐ་རྒོད་ཤོར་བ་ཉོན་མོངས་ཀྱི་ཞིང་སར།།

ལས་མི་དགེའི་རྩྭ་ངན་མུ་མཐའ་མེད་འབྱམ་དུས།།

ཁྱེད་སྙིང་བརྩེའི་སྤྱན་རས་གཡོ་མེད་དུ་གཟིགས་ཏེ།།

ཐབས་མཁས་པའི་མཛད་པ་བཅུ་གཉིས་ཀྱི་ཐུགས་རྗེས།།

དོན་མ་ནོར་ཡང་དག་ལམ་བུ་རེ་སྟོན་ཡོད།།

དེ་བསམས་ན་བཀའ་དྲིན་སྙིང་དབུས་ནས་དྲན་ཡོང་།།

ཡུལ་མུན་པའི་གླིང་གི་ཉི་མ་ནི་ཁྱེད་ཡིན།།

འོད་བརྒྱ་སྟོང་ཟེར་གྱིས་མཐོང་ལམ་ཀུན་བསལ་བ།།

སྲོག་གནས་ཚད་ཀུན་སྙོམས་བྱམས་བརྩེ་ཡིས་སྐྱོང་དུས།།

མ་འགྲོ་བའི་མ་མ་ཁྱེད་ཉིད་ལས་སུ་ཡོད།།

དེང་མི་ཡི་དྲན་རིག་སྣ་དགུ་ཡི་རྩལ་ལས།།

འདིར་སྣང་བ་ཁྲ་ཁྲ་ཟིང་ཟིང་གི་དངོས་པོ།།

ལར་བྱིས་པའི་མིག་སྔར་མཛེས་མཛེས་འདྲ་སྣང་རུང་།།

སེམས་ཞི་བའི་སྨན་མཆོག་ཁྱེད་ཉིད་ཀྱི་གསུང་ཡིན།།

སྐུའི་བཀོད་པ་བཤིག་སྟེ་རྟག་པ་ཡི་མཚང་བརྟོལ།།

གསུང་བདེན་པ་བསྒྲགས་ཏེ་གཉུག་མ་ཡི་གདངས་ཕྱེས།།

ཐུགས་རྗེན་ནེ་སྟོན་ཏེ་གནས་ལུགས་ཀྱི་གཤིས་ངོམ།།

ཁྱེད་སྟོན་པའི་སྟོན་མཆོག་བླ་མེད་དུ་ཡིན་ནོ།།

གང་ལ་མི་ཕྱེད་པའི་དད་པས་ཚིག་དུམ་འགའ་ཐད་དུ་སྦྱར་རོ། །༢༠༢༡།༠༥།༢༦ ས་ག་ཟླ་བའི་ཚེས་བཅོ་ལྔར། ལམ་བཟང་པོས།

༼༣༽
«ཁྱོད་ནི་ང་ཡིན་སྟོན་པ་ཡིན།»

སྡེ་དགེ་སྐལ་བཟང་།

འཇིག་རྟེན་ཞི་བའི་ཐབས་ལམ་སྟོན་པ་ལ།།

རིག་པའི་གར་གྱིས་སྟོབས་ཤུགས་སྦྱིན་མཛད་པོ།།

སྣང་སྲིད་འཁོར་འདས་ཆོས་རྣམ་ཐམས་ཅད་ཀྱི།།

དཀའ་སྡུག་སེལ་མཛད་ང་ཡི་སྟོན་མཆོག་རྒྱལ།།

སྣང་སྟོང་དབྱེ་མེད་ཟུང་དུ་འཇུག་པའི་ཞིང་།།

གདུལ་བྱའི་དོན་མཛད་འོད་ཀྱི་རླབས་ལ་འདྲེས།།

སྟོན་པ་ཁྱོད་ནི་སྣང་གསལ་སྒྲོན་མེ་ལྟར།།

ལྷམ་མེར་འབར་ཏེ་མུ་ནག་དཀྲོལ་བར་མཛད།།

གློ་བུར་ཚོགས་ཀྱི་དག་ཞིང་སྒོམ་པའི་ངོར།།

འགྲན་མེད་གཡུ་ལས་རྣམ་པ་རྒྱལ་བའི་ཁྱེད།།

སྒྱུ་འཕྲུལ་འཁོར་གྱིས་ཡོངས་སུ་རབ་ཁེངས་ཏེ།།

བདག་བློའི་སྙིང་གར་པདྨ་ལྟར་དུ་བཞད།།

ཁྱབ་འཇུག་ཁྱབ་བདག་ཚོགས་ཀྱི་ལམ་བུ་ལ།།

ཀུན་རྫོགས་ཆོས་རྣམ་བདེན་པའི་གསེབ་ན་འཛུམ།།

སྣང་བ་བོར་བའི་ཕྱི་རོལ་པ་དག་ཀྱང་།།

ཡོངས་སུ་འདུལ་ཏེ་བསམ་བློའི་ཁ་ལོ་བསྒྱུར།།

༢༠༢༡/༠༥/༢༦ ཉིན།

༼༤༽
«སྟོན་པ་ལ་ཕུལ་བའི་ཀ་རྩོམ་ཡན་ལག་བདུན་པ།»

སུ་ལུའམ་ཚུལ་ཁྲིམས་རྒྱ་མཚོ།

༡) ཕྱག་འཚལ་བའི་ཡན་ལག

ཀ་མེད་འགྲོ་བ་ཀུན་གྱི་ཉི་མ་འདྲ་བའི་སྐུ་མངའ་ཞིང་།།

ཁ་ཆོས་སྟོང་པའི་ཀུན་གྱི་ཁ་ཟས་ལྟ་བུའི་གསུང་རབ་སྦྱིན།།

ག་སློག་སྤངས་ཤིང་ཀུན་ལ་བྱམས་བརྩེ་ལྡན་པའི་ཐུགས་མངའ་བ།།

ང་ཡི་སྟོན་པ་ཤཱཀྱ་མུ་ནི་མཆོག་ལ་མགོས་ཕྱག་འཚལ།།

༢) མཆོད་པ་འབུལ་བའི་ཡན་ལག

ཅ་ཅོ་དབེན་པའི་དག་ཞིང་ལྟ་བུའི་དགོན་པའི་འདུ་ཁང་ནས།།

ཆ་ལག་རྫོགས་པའི་ཆོ་གའི་དབྱངས་རྟ་ངག་ནས་ལེན་བཞིན་དུ།།

ཇ་མར་ལ་སོགས་བདག་ལ་ཡོད་པའི་རོ་མཆོག་མ་ལུས་པ།།

ཉ་གང་ཟླ་བ་ལྟ་བུའི་སྟོན་པ་ཁྱོད་ལ་མཆོད་པར་བགྱི།།

༣) སྡིག་པ་བཤགས་པའི་ཡན་ལག

ཏ་ཐཱ་ག་ཏ་ཁྱོད་ཀྱི་གསུང་རབ་མང་དུ་ཐོས་ན་ཡང་།།

ཐ་མ་བདག་ནི་མོངས་དང་བག་ཆགས་ངན་པའི་གཞན་དབང་གིས།།

ད་ལྟའི་བར་དུ་སྡིག་པའི་ལམ་དུ་ཞུགས་པའི་མི་དགེ་བ།།

ན་བཟའ་ངུར་སྨྲིག་ཅན་གྱི་སྟོན་པའི་ཞབས་ནས་སོ་སོར་བཤགས།།

༤) རྗེས་སུ་ཡི་རང་བའི་ཡན་ལག

པ་ཕས་སྦྱིན་པའི་རྒྱལ་སྲིད་དབང་ཐང་ཡོངས་རྫོགས་སྤངས་པ་དང་།།

ཕ་རོལ་ཕྱིན་པའི་ལམ་བཟང་དྲུག་ཏུ་རྟག་ཏུ་ཕེབས་བཞིན་པ།།

བ་གླང་གཙོས་པའི་འགྲོ་བ་སེམས་ཅན་གཅིག་ཀྱང་མ་ལུས་པའི།།

མ་ལྟར་ཡིན་པའི་སྟོན་པའི་མཛད་པ་ཀུན་ལ་རྗེས་ཡི་རང་།།

༥) ཆོས་འཁོར་སྐོར་བ་སྐུལ་བའི་ཡན་ལག

ཙ་རི་གནས་བསྐོར་ཕྱིན་པའི་བསོད་ནམས་ཅན་གྱི་བོད་མི་ཡང་།།

ཚ་གྲང་སྡུག་བསྔལ་དག་གི་ར་བའི་ནང་དུ་ལྷུང་བཞིན་མཆིས།།

ཛ་ཡ་ཁྱོད་ཀྱིས་སླར་ཡང་བདུད་རྩི་ལྟ་བུའི་དམ་ཆོས་ཤིག།

ཝ་ལེར་གསུངས་ནས་ཀུན་གྱི་གདུང་བ་ཐམས་ཅད་ཆོད་པར་མཛོད།།

༦) གསོལ་བ་འདེབས་པའི་ཡན་ལག

ཞ་ར་ལྟ་བུའི་བདག་དང་བདག་གི་མ་གྱུར་སེམས་ཅན་རྣམས།།

ཟ་ངེ་ཟིང་ངེ་ཅན་གྱི་སེམས་པ་འདི་དང་མ་བྲལ་བར།།

འ་འུར་རྣམ་གཡེང་སྤངས་པའི་བདག་གི་སྟོན་པ་བཀའ་དྲིན་ཅན།།

ཡ་མཚན་ཆེ་བའི་ཉི་མ་འདྲ་བར་ཞིང་འདིར་བཞུགས་སུ་གསོལ།།

༧) དགེ་རྩ་བསྔོ་བའི་ཡན་ལག

ར་བ་གངས་ཀྱིས་སྐོར་བའི་ཕ་ཡུལ་ཆོས་ལྡན་ཞིང་ཁམས་དང་།།

ལ་ལུང་གང་སར་བསྡད་ནས་བསགས་པའི་དགེ་བ་ཅི་མཆིས་པ།།

ཤ་ཟས་སྤངས་པའི་སྟོན་པ་ཁྱོད་ལྟར་བདག་སོགས་འགྱུར་བའི་སླད།།

ས་ག་ཟླ་བའི་དུས་ཆེན་འདི་ནས་བདག་གིས་རབ་ཏུ་བསྔོ།།

ཧ་ཧ་ཞེས་ནས་རྩེད་མོའི་ཚུལ་དུ་བྲིས་པའི་ཡི་གེ་མིན།།

ཨ་རོགས་འབོད་སའི་གྲོགས་ལ་བྲིས་པའི་སྙན་ངག་དེ་བས་མིན།།

ཧ་ཅང་དྲན་པའི་སྟོན་པ་ཁྱོད་ཀྱི་དུས་ཆེན་གསུམ་འཛོམས་ལ།།

ཨ་མའི་བུ་ཆུང་བདག་གིས་སྟོན་པའི་དུས་ཆེན་བསུ་ཕྱིར་བྲིས།།

༢༠༢༡/༥/༢༦ ཞོགས་པར་བྲིས།

_______________

རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་།

ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང།

རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-ས་ཟླའི་ཚེས་ཆེན་བཅོ་ལྔའི་སྟོན་པའི་རྗེས་དྲན་གྱི་སྙན་ངག་ཆེད་བསྒྲིགས།

࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།