རྒྱལ་ཡོངས་ཨ་མའི་ཉིན་མོའི་སྙན་རྩོམ་ཆེད་བསྒྲིགས།

༼༡༽
«བརྩེ་བ་དྲན་པའི་ཉིན་མོ་»མགྱོགས་བྲིས་མ།

གངས་སེང་དཀར་མོ།

རྟག་ཏུ་ཕྱི་བཞིན་འབྲང་བའི་རྣམ་ཤེས་དེས།།

བརྩེ་བ་རྒྱ་མཚོ་འདྲ་ཞིག་བདག་ལ་གནང་།།

གལ་ཏེ་བརྩེ་བའི་མཚོ་ལ་གཟུགས་མཆིས་ན།།

སྲིད་གསུམ་སྣོད་དུ་སྤྱད་ཀྱང་ཆུང་བར་དོགས།།

བརྩེ་བ་གཞན་དག་རེ་དང་མི་འདྲ་བའི།།

ང་ལ་གནང་བའི་བརྩེ་བ་དུང་ལས་དཀར།།

བརྩེ་བ་ཅིག་ཅིག་ཅིག་གིས་བསླུ་འགྲོ་ཡང་།།

ང་ལ་གནང་བའི་བརྩེ་བས་བསླུ་མ་མྱོང་།།

བརྩེ་བ་གཞན་དག་རེ་དང་མི་འདྲ་བའི།།

ང་ལ་གནང་བའི་བརྩེ་བ་མཚོ་ལས་ཟབ།།

བརྩེ་བ་ཅིག་ཅིག་ཅིག་གིས་ཚིམ་འགྲོ་འང་།།

ང་ལ་གནང་བའི་བརྩེ་བས་ཚིམ་མ་མྱོང་།།

བརྩེ་བ་གཞན་དག་རེ་དང་མི་འདྲ་བའི།།

ང་ལ་གནང་བའི་བརྩེ་བ་བྲག་ལས་བརྟན།།

བརྩེ་བ་ཅིག་ཅིག་ཅིག་ནི་འགྱུར་འགྲོ་འང་།།

ང་ལ་གནང་བའི་བརྩེ་བ་འགྱུར་མ་མྱོང་།།

བརྩེ་བ་གཞན་དག་རེ་དང་མི་འདྲ་བའི།།

ང་ལ་གནང་བའི་བརྩེ་བ་བལ་ལས་འཇམ།།

བརྩེ་བ་ཅིག་ཅིག་ཅིག་གིས་འཁོན་འགྲོ་འང་།།

ང་ལ་གནང་བའི་བརྩེ་བས་འཁོན་མ་མྱོང་།།

བརྩེ་བ་གཞན་དག་རེ་དང་མི་འདྲ་བའི།།

ང་ལ་གནང་བའི་བརྩེ་བ་མཁའ་ལས་ཡངས།།

བརྩེ་བ་ཅིག་ཅིག་ཅིག་ནི་འགལ་འགྲོ་འང་།།

ང་ལ་གནང་བའི་བརྩེ་བས་གློད་མ་མྱོང་།།

ནམ་ཀུན་རྒྱང་ལ་གཟིགས་པའི་བརྩེ་བའི་སྤྱན།།

བདག་བས་གཞན་གཅེས་དེ་ཡང་བུ་ངའི་ཆེད།།

བརྩེ་བ་བདེན་པ་ཉིད་ཀྱི་བདུད་རྩིའི་གཏེར།།

བྱམས་ལྡན་ཨ་མའི་ཚེ་ཐག་རིང་བར་ཤོག།

༢༠༢༡/༥/༩

༼༢༽
འཛམ་གླིང་དྲིན་ཆེན་ཨ་མའི་ཉིན་མོ་བསུ།

འོད་གསལ་ཀུན་བཟང་ཆོས་འཕེལ།

རི་ལུང་བྱེ་བས་ཆོད་པའི་ཕ་ཡུལ་ན་བཞུགས་པའི།།

བཀའ་དྲིན་ཟད་མཐའ་མེད་པའི་ཨ་མ་ཡི་དྲུང་དུ།།

ཁྱོད་ཉིད་དྲན་པའི་གདུང་བ་འགོག་ཐབས་རང་མེད་པས།།

སྙན་འཕྲིན་ཁུ་བྱུག་གཞོན་ནུའི་གླུ་དབྱངས་འདི་འབུལ་ལོ།།

སྤྲོ་སྐྱིད་སྣང་བ་འཕེལ་བའི་དཔྱིད་ཀ་ཡི་དུས་སུ།།

འཇམ་པོའི་གོས་ཞིག་ཡོད་ན་རང་ཉིད་ཀྱིས་མི་གྱོན།།

བུ་ཆུང་ཁྱོད་ལ་འགྲིག་ཅེས་འཛུམ་མདངས་ཀྱིས་བསྐོན་པའི།།

ལྷན་པ་དགུ་བརྩེགས་གྱོན་པའི་ཨ་མ་དེ་དྲན་བྱུང་།།

དབྱར་གསུམ་ཆར་པ་བབས་པའི་ཡོ་ལང་གི་ཁྲོད་ན།།

ང་རང་སྐྱིད་པོའི་མལ་ན་བདེ་མོ་རུ་ཉལ་ཡང་།།

ནོར་ལུག་ལྷས་མཐའ་བསྐོར་ནས་ངལ་དུབ་ཀྱིས་མནར་བའི།།

གཡོག་མོའི་དཀའ་ཚེགས་མྱངས་པའི་ཨ་མ་དེ་དྲན་བྱུང་།།

སྟོན་དུས་ཕ་མཐའ་མངོན་མེད་ས་ཞིང་གི་འདབས་ན།།

ངོ་གདོང་རྔུལ་ཆུས་ཁེབས་བཞིན་ཞིང་ལས་ལ་འབད་ནས།།

ལུས་ཀྱི་ཤ་བསྐམས་ཁ་ངོ་ཉི་འོད་ཀྱིས་འཚིགས་པའི།།

ལག་ངོ་སེར་གས་གང་བའི་ཨ་མ་དེ་དྲན་བྱུང་།།

མི་ཚེ་དཀའ་སྡུག་ལྗིད་མོས་དབང་མེད་དུ་མནར་ནས།།

ཕུན་ཚོགས་ཟས་གོས་རྣམས་ནི་གཞན་དབང་དུ་གྱུར་དུས།།

ཟ་མ་ཕོར་གང་རྙེད་ཀྱང་བུ་ཕྲུག་ལ་བྱིན་ནས།།

ལྟོགས་སྐོམ་ཡང་ཡང་མྱངས་པའི་ཨ་མ་དེ་དྲན་བྱུང་།།

ལང་ཚོའི་མེ་ཏོག་བཀྲ་བའི་ན་གཞོན་གྱི་དུས་སུ།།

ཁྱིམ་གྱི་དཀའ་ཁག་ཐམས་ཅད་མགོ་ཐོག་ཏུ་བབས་ནས།།

སྟོན་གྱི་མེ་ཏོག་བཞིན་དུ་ལང་ཚོ་ཡི་མདངས་བཟང་།།

སྐད་ཅིག་ཉིད་ལ་ཟད་པའི་ཨ་མ་དེ་དྲན་བྱུང་།།

ངེད་ཅག་བུ་ཕྲུག་རྣམས་ལ་ཟས་གོས་ཀྱི་དོན་དུ།།

དུས་བཞི་བར་མེད་སྐུ་ཚེགས་སྣ་ཚོགས་ཀྱིས་གདུངས་ནས།།

འཛུམ་དཀར་ལྷུག་ལྷུག་མངོན་པའི་ཞལ་རས་ཀྱི་དཀྱིལ་འཁོར།།

མི་སྡུག་གཉེར་མས་ཁེབས་པའི་ཨ་མ་དེ་དྲན་བྱུང་།།

བཀྲ་ཤིས་ཟླ་བ་དཀར་པོ་ཤར་ཕྱོགས་ནས་ཤར་དུས།།

བྱམས་བརྩེ་ལྷོད་པ་མེད་པའི་དྲིན་ཆེན་གྱི་ཨ་མའི།།

འཛུམ་དཀར་ཞལ་རས་ཉ་གང་བཅོ་ལྔ་ཡི་དུང་ཟླ།།

དྲན་པའི་མེ་ལོང་ངོས་སུ་གསལ་པོ་རུ་ཤར་བྱུང་།།

ང་རང་དགེ་བཅུ་འཛོམས་པའི་གྲོང་ཁྱེར་ན་འདུག་ཀྱང་།།

གཉེར་མ་རི་མོས་བཀྲ་བའི་དྲིན་ཅན་གྱི་ཨ་མ།།

ཚ་གྲང་ངལ་དུབ་སྡུག་བསྔལ་མྱངས་པ་དེ་དྲན་ན།།

ཞིམ་མངར་ཟས་ཤིག་ཟོས་ཀྱང་མིད་པ་ལ་མི་འགྲོ།།

ལྷ་ལམ་དབྱིངས་ནས་རྒྱུ་བའི་མདོག་དཀར་གྱི་སྨུག་པ།།

ང་ཡི་ཨ་མ་བཞུགས་པའི་ས་ཕྱོགས་སུ་ཨེ་འགྲོ།།

བུ་ང་བདེ་ཞིང་འཚམས་པའི་སྙན་མོ་ཡི་སྐད་འཕྲིན།།

མ་བརྗེད་ཨ་མར་བཤད་པའི་བཀའ་དྲིན་ཞིག་སྐྱོངས་དང་།།

ཚད་མེད་དྲིན་གྱིས་བསྐྱངས་པའི་དྲིན་ཆེན་གྱི་ཨ་མ།།

སྐུ་ཁམས་བདེ་མོའི་ངང་དུ་བདེ་མོ་རུ་བཞུགས་དང་།།

བཀྲ་ཤིས་གཟའ་སྐར་ཕུན་སུམ་ཚོགས་པ་ཡི་ཉིན་མོར།།

མ་བུ་ལྷན་ཅིག་མཇལ་བའི་སྐལ་བཟང་དེ་ཤར་ཡོང་།།

༼༣༽
ཨ་མ།

ལམ་བཟང་པོ།

ཉིན་འདིའི་སྣང་བ་རབ་གསལ་ཡང་།།

བདག་གི་སེམས་ལ་མུན་པ་འཁྲིགས།།

ནམ་རྒྱུན་སྙན་པའི་ཡིག་འབྲུ་གཉིས།།

དེ་རིང་སྙིང་ལ་ཟུག་རྔུ་འབྱིན།།

མཚམས་རེར་ལས་ལ་འཁང་ར་བྱེད།།

མཚམས་རེར་རང་ལ་དྲན་པ་གཟེར།།

མཚམས་རེར་ཅི་ཡང་སྙིང་པོས་སྟོང་།།

མཚམས་རེར་འདུ་འབྲལ་ཆོས་ཉིད་དྲན།།

སེམས་ཀྱིས་བསྒྲོན་པའི་མར་མེ་འདིས།།

ཁྱེད་ཉིད་གང་བཞུད་ལམ་གསལ་ཤོག།

དགེ་བའི་བྱས་པ་སྣ་རེས་ཀྱང་།།

རྒྱབ་ནས་སྐྱོར་དང་མདུན་བསུ་ཤོག།

ཁྱེད་ཉིད་གཞན་དུ་གཤེགས་པ་ཡིས།།

ཨ་མ་ཀུན་གྱི་ཚབ་མཚོན་ཤོག།

བདག་གི་སེམས་ཀྱི་སྐྱོ་བ་ཡིས།།

ཀུན་གྱི་གདུང་བ་སེལ་བར་ཤོག།

༢༠༢༡/༠༥/༠༩

༼༤༽
དྲིན་ཆེན་ཨ་མ།

པདྨ་ཆོས་དར།

བྱམས་བརྩེའི་རིན་ཐང་གླེང་སའི་གར་སྟེགས་མ།།

ཤེས་རབ་གོ་ཆས་བརྒྱན་པའི་འཇོ་སྒེག་མ།།

བྱམས་དང་ཤེས་རབ་མངའ་བའི་དྲང་སྲོང་མ།།

འགྲོ་བའི་སྒྲོན་མེ་གསེར་གྱི་ཀོང་བུ་མ།།

ལུས་ཀྱི་གོམ་སྟབས་སློབ་པའི་གར་མཁན་མ།།

ངག་གིས་གསུང་དབྱངས་སྒྲོག་པའི་སྙན་འཇེབས་མ།།

ཡིད་སེམས་དུང་ལས་དཀར་བའི་ལྷག་བསམ་མ།།

སྒོ་གསུམ་གཞན་ལས་འཕགས་མ་སྙིང་གི་མ།།

སྦྲང་དཀར་རྩམ་པའི་དྲི་བསུང་ལྷད་མེད་མ།།

འོ་ཞོ་མངར་སྐྱུར་ལྡུད་པའི་དྲིན་ཆེན་མ།།

སྦྲ་གུར་གྲུ་བཞིའི་ཁྱིམ་གྱི་དྲོད་ཁོལ་མ།།

ལོ་ཟླ་རིང་མོའི་ནང་གི་དྲན་ཐེངས་མ།།

སྐྱབས་འཇུག་ཆོས་ལ་ཞུ་བའི་དད་འདུན་མ།།

ཡིད་ཆེས་བུ་ལ་བཅོལ་བའི་གཉོམ་ཆུང་མ།།

རྟག་ཏུ་བློ་ངོར་སྣང་བའི་གཟུགས་བརྙན་མ།།

ཁམས་བདེ་ལུས་སྐྱིད་ཚེ་རིང་ལོ་བརྒྱ་མ།།

༢༠༢༡/༠༥/༠༩ རྨེ་རང་གྲོལ།

༼༥༽
དྲིན་ཆེན་མ།

བཀྲ་ཤིས་དོན་གྲུབ།

ལུས་ཀྱི་ནུས་ཤུགས་མཐེན་ཞིང་ན་ཟུག་སྟེར།།

ཉིན་མཚན་དབྱེར་མེད་སེམས་ལ་གདུང་བས་བཀང་།།

རྣ་བ་སུན་པའི་ངུ་སྐད་སོགས་གྲགས་ཀྱང་།།

བྱམས་དང་བརྩེ་བས་སྐྱོང་བའི་དྲིན་ཆེན་མ།།

གོས་ཀྱི་རྩེ་ཕུད་བུ་ཆུང་ང་ལ་གཡོག།

ཟས་ཀྱི་རོ་བཅུད་བུ་ཆུང་ང་ལ་སྤྲད།།

དྲོ་འཇམ་ལྡན་པའི་རུམ་དུ་ང་རང་ཉལ།།

འཚོ་བའི་བདེ་སྐྱིད་སྐྲུན་པའི་དྲིན་ཆེན་མ།།

ཆུང་དུས་ཟས་གཙོག་ཤོར་བའི་སེམས་ཁུར་དང་།།

ལོངས་དུས་ལུས་སྟོབས་ཉམས་པའི་སེམས་ཁུར་དང་།།

ཆེ་དུས་མདུན་ལམ་ཤོར་བའི་སེམས་ཁུར་སོགས།།

བདེ་སྐྱིད་ཡོངས་ཀྱི་མཐུན་རྐྱེན་དྲིན་ཆེན་མ།།

མི་ཚེའི་དོན་ལྡན་མདུན་ལམ་ང་ལ་སྦྱིན།།

གནས་ཆེན་སྐྱེ་ཆེན་དམ་པའི་དགོན་དུ་བཏང་།།

དམ་ཆོས་ཟབ་མོ་སྦྱོང་བའི་བསྐལ་ཆེན་ཐོབ།།

དོན་ལྡན་ཐེམ་སྐས་བཙུགས་པའི་དྲིན་ཆེན་མ།།

སོ་སོའི་དམིགས་ཡུལ་རེ་འདོད་མ་བལྟས་པར།།

ཡོད་ཚད་ང་ཡི་དོན་དུ་བློས་གཏོང་མ།།

གང་དགོས་ཐོབ་པའི་རིན་ཆེན་ནོར་བུའི་དཔེ།།

མཚུངས་དཔེ་ཐོག་མ་དྲིན་ཆེན་ཨ་མ་ཡིན།།

_______________

རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་།

ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནངམཚོ་བྱུང་ཨུཏྤལ་ནེའུ་གསིང་།།

རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-རྒྱལ་ཡོངས་ཨ་མའི་ཉིན་མོའི་སྙན་རྩོམ་ཆེད་བསྒྲིགས།

࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།