ཞི་བདེ་ཉི་མའི་སྙན་ངག་ཁག་གཉིས།

ཡོང་ཁུངས།: སྒང་ལམ་པའི་རྩོམ་རིག་འཕྲིན་སྟེགས།

⊰ མི། ⊱

ཕ་བོང་ཟླུམ་པོ་འདི།
ང་ལས་ལྡབ་འགྱུར་གྱིས་ཆེ།
ངས་རི་གཤམ་ནས་རི་རྩེ་རུ་སྒྲིལ་གྱིན་ཡོད།
འདི་ནི་སུ་ཞིག་གི་བཀའ་ཁྲིམས་ཡིན་མིན།
ངས་ཁྱོད་ལ་གསལ་བཤད་བྱ་མི་སྲིད།
དུས་ནམ་ཞིག་གི་ཚེ།
ངས་ཕ་བོང་ཟླུམ་པོ་འདི་སྒྲིལ་ནས།
རིའི་རྩེ་མོ་རུ་བསླེབ་ངེས།
དེ་དུས། ང་དང་ཕ་བོང་ཟླུམ་པོ།
ངས་གང་ལ་འཇོག

རི་གཤམ་གྱི་མི་ལགས།
ཁྱོད་ལ་བློ་ཐབས་ག་འདྲ་འདུག

༢༠༢༡/༠༩/༡༨ 

⊰ སྐྱ་ཀ་ཁྱུ་ཞིག ⊱

སྟོན་ཚུགས་སོང་། སྐྱ་ཀ་ཁྱུ་ཞིག 
རི་གྲོང་འདིར་འཕུར་ཡོང་།
ངའི་གཞིས་མཁར་ལ་བབས་ནས།
ཀྱུར་ཀྱུར་ཅར་ཅར་བར་མེད་སྒྲོག་གིན།
ང་ལ་གསང་ཚིག་ཅི་ཞིག་བརྟོལ་སོང་བ།
ནམ་མཁས་ང་ལ་འགྲེལ་མ་སོང་།
སྐྱ་ཀ་ཁྱུ་ཞིག ངའི་མཁར་ཁ་རུ།
བསྟར་ཕྲེང་དུ་བསྒྲིགས།
ང་རང་སྤྲོ་སྣང་ཅན་གྱི་མི་ཞིག་ལ་བཟོས།
ངས་ཀྱང་རང་ལ་མཁོ་བའི་བཟོ་ལྟ་ཞིག
ནམ་མཁའ་ལ་སྟོན་འདོད་བྱུང་།

རེ་ཞིག་ངང་། སྐྱ་ཀ་དེ་དག
རླུང་དང་བསྡེབས་ནས་འཕུར་སོང་།
ཁོ་ཚོ་ངའི་མགོ་ཐོག་ཏུ།
སྐབས་རེར་དམའ་ཞིང་སྐབས་རེར་མཐོ། 
ཁོ་ཚོས། ངའི་མཁར་ཁ་ལ།
རྟུག་པ་ཞོ་ལྟར་སྤུངས།
དེ་དོན  ངས་ཀྱང་ནམ་མཁའ་ལ་ལབ་མྱོང་མེད།

སྐྱ་ཀ་ཁྱུ་ཞིག
འདི་ལྟར་ཕར་འཕུར་ཚུར་འཕུར་བྱེད་ཀྱིན་འདུག
སྟོན་ཀའི་ཁྲོད་ཀྱི་ལོ་ལེགས་ཀྱང་།
འདི་ལྟར་སྨིན་གྱིན་འདུག
གསེར་མདོག་ལ་དགའ་བའི་མི་རྣམས་ཀྱང་།
འདི་ལྟར་རྒས་ཀྱིན་འདུག

༢༠༢༡/༠༨/༠༩