གཞོན་ནུ་དོན་གྲུབ།

རྩོམ་པ་པོ། དོལ་པོ་ཚྭ་དགའ་བ་ཚེ་རིང་བསམ་གྲུབ།

འགྲན་གྱི་ཟླ་མེད་ཟས་གཙང་རྒྱལ་གཞིས་ཀྱི་དབང་ཐང་གིས་ཀྱང་།

ཚིམ་པར་མ་ནུས་པའི་འདོད་པ་དེ།

མཛེས་མ་འབུམ་གྱི་ཕུལ་བྱུང་ས་འཚོ་མའི་མཛེས་སྡུག་གི་ལང་ཚོས་ཀྱང་།

སྐོང་བར་མ་ནུས་པའི་འདོད་པ་དེ།

ཕོ་བྲང་གི་གསེར་ཁྲི་ནས་བབས་ཏེ།

དབེན་པའི་ནགས་ཁྲོད་ལ་གཤེགས་སོང་།

གསེར་དངུལ་རྒྱན་ཆ་དང་ཕུན་ཚོགས་འདོད་ཡོན་རྣམས།

སྐྲ་ལོ་དང་མཉམ་དུ་བྲེགས་ཏེ།

ཆོས་གོས་གཙས་པོས་ལུས་པོ་བཅིངས།

འཚོ་བ་ལྷུང་བཟེད་ལ་བརྟེན་ཅིང་།

བླ་གབ་ཤིང་གི་གྲིབ་བསིལ་ལ་བརྟེན།

སློབ་དཔོན་མང་པོའི་ཞབས་རྗེས་བསྙེགས་ཏེ།

ཐོས་བསམ་མང་དུ་བགྱིས་མཐར།

འཁོར་བའི་རྩ་བ་དང་།

སྡུག་བསྔལ་གྱི་སྙིང་པོ།

རེ་དོགས་ཀྱི་ལྟེ་བ་དང་།

འཁྲུལ་བའི་གཞི་མ་དེ།

སེམས་ཀྱི་ནང་རིམ་མཐར་ཐུག་དེར།

ཨ་འཐས་སུ་ཆགས་པའི་བདག་ཏུ་ལྟ་བའི།

བསམ་བློ་དེ་ཡིན་པར་ར་འཕྲོད་གཙང་མ་བྱུང་།

དེ་ནས་བཟུང་“བདག”སྤོང་བའི་དོན་ལ།

ཐབས་ལམ་ཡོད་དོ་ཅོག་ལག་ཏུ་བླངས་ཤིང་།

ལྷག་པར་ལོ་ངོ་ཧྲིལ་པོ་དྲུག་གི་རིང་།

ཚད་ལས་འདས་པའི་ཟས་བཅད་དཀའ་ཐུབ་ཀྱིས།

“བདག”་དང་འཐབ་རྩོད་མཐའ་རུ་འཁྱོལ་བར་བྱས།

འོན་ཀྱང་། ཤ་པགས་སྐམ་ཞིང་ལུས་གཟུངས་རྫོགས་ཏེ།

འཆི་བའི་ཚད་ལ་བསླེབས་རུང༌།

“བདག་”ལས་རྒྱལ་བར་མ་ནུས།

ཐབས་ལམ་ཡོད་ཚད་ལག་ཏུ་བླངས་ཤིང་།

བྱ་བ་ཐམས་ཅད་མཐའ་རུ་བསྐྱལ་མཐར།

བྱེད་རྒྱུ་གང་ཡང་ལྷག་མེད་པའི་མཐར་ཐུག་གི་ཡི་ཆད་ཆེན་པོའི་དེའི་སྣེ་མོ་ན།

གློ་བུར་དུ་སེམས་ཀྱི་བཙན་ས་རྟོགས་སད་ཤིག་གིས་བཟུང་སོང་།

དེ་ནི། “ད་བར་དུ་ཐབས་ཤེས་ཡོད་དགུ་བཏོན་ཏེ།

ཚད་ལས་བརྒལ་བའི་སྡུག་བཙིར་དང་མནར་གཅོད་ཀྱིས།

བདག་དང་འཐབ་རྩོད་མཐའ་གཅིག་དུ་བྱེད་མཁན་དེ་ཡང་།

བདག་ཉིད་ལས་གུད་དུ་མ་གྱུར་བར་རྟོགས་པ་”དེའོ།།

“བདག”སྤོང་བར་བརྩོན་པ་དེ་ཡང་།

བདག་རང་གི་བྱ་རྩོལ་ཞིག་ཡིན་པར་རྟོགས་པ་དེ་མ་ཉིད་དུ།

གཉིས་སྣང་གི་ཆུ་བོ་རང་ས་ཉིད་དུ་སྐམ་སོང་།

འབད་རྩོལ་གྱི་རི་བོ་རང་ས་ཉིད་དུ་ཉིལ་སོང་།

གཞོན་ནུ་དོན་གྲུབ་ཀྱི་དོན་ཆེན་དེ་མ་བསྒྲུབས་པར་འགྲུབ་སོང་།

ཉི་མ་འབུམ་ཕྲག་དུས་གཅིག་ཏུ་ཤར་བ་ལྟ་བུའི།

རྟོགས་སད་ཀྱི་འོད་སྣང་དེས།

མུན་པ་མ་ལུས་རྨེག་མེད་དུ་བཅོམ་སོང་།

ཟིན་དུ་མེད་པའི་རྩོལ་བ་དང་།

གྲོལ་དུ་མེད་པའི་བསམ་བློའི།

རང་འཚང་དེ་རྗེན་གཅེར་དུ་བཏོན་སོང་།

གཟུང་བ་དང་འཛིན་པ།

བྱ་བ་དང་བྱེད་པོ།

སྒྲུབ་པ་དང་སྒྲུབ་པོ་སོགས།

“བདག་”གི་ཆོ་འཕྲུལ་ཏེ།

གཉིས་སྣང་གི་འཁྲུལ་བ་དེའི་སྦུབས་ནས།

ཉི་མ་སྤྲིན་ལས་ཐར་བ་ལྟར་ཐར་སོང་།

རྩོལ་བ་ཐམས་ཅད་ལས་བརྒལ་པའི་ཕ་མཐའ་དེ་ནས།

སྒྲུབ་ཏུ་མེད་པའི་དོན་ཆེན་དེ་མ་བསྒྲུབས་པར་འགྲུབ་སོང་།

བསམ་བློ་ཐམས་ཅད་ལས་འདས་པའི་ཕ་མཐའ་དེ་ནས།

བགྲོད་ལམ་མེད་པའི་ས་ཆ་དེར་མ་བགྲོད་བར་བསླེབས་སོང་།

སྤང་བླང་མེད་པའི་ཞི་བའི་གོ་འཕང་དེ་བརྙེས་རྗེས།

བྱ་རུ་མེད་པའི་བྱ་བ་འབད་རྩོན་གྱིས་སྒྲུབ་ཅིང་།

བློ་ལས་འདས་པའི་གནས་ལུགས་བསམ་བློ་ཡིས་འཚོལ་བའི།

རྨོངས་འཐོམ་གྱི་སྐྱེས་བུ་རྣམས།

རྨོངས་གཉིད་ལ་སློང་བའི་སྙིང་རྗེ་དེ་ཡོད་མོད།

འཇིག་རྟེན་ཐ་སྙད་ཀྱི་ནང་ལ་མེད་པའི་བློ་འདས་ཀྱི་གནས་ལུགས་དེ།

ཇི་ལྟར་བཤད་ཀྱང་།

གོ་ནོར་ཐེབས་རྒྱུ་ཉག་ཅིག་ཏུ་དགོངས་ནས།

དང་ཐོག་མི་སྨྲ་བར་ནགས་ཁྲོད་དུ་བཞུགས་རྒྱུའི་བློ་ཐག་བཅད།

འོན་ཀྱང་མུན་ནག་ཁྲོད་སྦར་གཡོབ་རྒྱག་པའི།།

རྨོངས་པ་རྣམས་སྙིང་རྗེས་བཟོད་པར་མ་ནུས་པས།

མཐར་སྨྲ་བསམ་བརྗོད་མེད་ཀྱི་དམ་ཆོས་དེ།

སྨྲ་བརྗོད་ཀྱི་ལམ་ལ་མ་ཞུགས་ཐབས་མེད་བྱུང་།

བླ་མ་དང་སློབ་མ་མེད་པའི་དམ་ཆོས་དེ།

དད་པ་དང་འཇིགས་སྐྲག་ལ་མ་བརྟེན་པའི་བདེན་པ་དེ།

དེ་སྔ་སུས་ཀྱང་མ་བཤད་ཅིང་སུས་ཀྱང་མ་ཐོས་པའི་སྐད་ཆ་དེ།

མི་འཇིགས་གདོང་ལྔའི་ང་རོ་ལྟར་ས་སྟེང་དུ་བསྒྲགས་པ་ན།

ཡ་གི་ཁྲི་ཐོག་ལ་བཞུགས་པའི་རྒྱལ་པོ་ནས།

མ་གི་སྲང་ལམ་ན་ཉུལ་བའི་སློང་མོ་བའི་བར།

རྐང་གཉིས་ཅན་གྱི་འགྲོ་བ་ཡོངས་རྫོགས་ཀྱི་དབུ་འཕང་དེ།

ཁྱེད་ཀྱི་ཞབས་དྲུང་དུ་དུད་སོང་། །

ཡིན་ན་ཡང་ཁྱེད་ནི་སྔར་ལྟར་བླ་གབ་གྲིབ་བསིལ་ལ་བརྟེན་ཅིང་།

འཚོ་བ་ལྷུང་བཟེད་ལ་བརྟེན་པ་མ་གཏོགས།

དབུ་གདུགས་གསུམ་བརྩེགས་ཀྱི་འོག་དང་།

སེང་གེའི་ཁྲི་འཕང་དཔང་གི་སྟེང་ལ་ནམ་ཡང་བཞུགས་མ་མྱོང་།

རང་གི་མགོན་སྐྱབས་རང་ཉིད་ཡིན་པ་དང་།

རང་གི་ཐར་པ་རང་ཉིད་ལ་རག་ལས་པ་སོགས།

ཐོག་མཐའ་བར་གསུམ་དུ།

བཅིངས་གྲོལ་རང་བཞིན་ཅན་གྱི་གསུང་བཤད་འབའ་ཞིག་གནང་བ་མ་གཏོགས།

ཐམས་ཅད་མཁྱེན་པའི་ཆོ་ལོ་དེ་ཁྱེད་ཀྱིས་མ་བཞེས་ཤིང་།

འཇིག་རྟེན་མགོན་པོའི་འགན་ཁག་དེ་ཁྱེད་ཀྱིས་མ་ཁུར་བས།

ཁྱེད་ཉིད་མི་རྣམས་ཀྱི་སྤྱི་བོའི་གཙུག་ཏུ་ནམ་ཡང་བཞུགས་པ་མེད།

འདུས་བྱས་ཐམས་ཅད་མི་རྟག་པ་ཡིན་པ་དང༌།

བདག་དང་བཅས་པ་ཐམས་ཅད་ནི་སྡུག་བསྔལ་བ་ཡིན་པ།

ཆོས་ཐམས་ཅད་ནི་བསམ་བློ་ལས་འདས་པ་ཡིན་པ་དང་།

རེ་དོགས་དང་བྲལ་པ་ནི་ཞི་བ་ཡིན་པ་སོགས།

སྣང་སྲིད་ཀྱི་གནས་ལུགས་ངོ་མ་དེ་ངོ་སྤྲོད་པའི་ཐབས་ལ་བཞུགས་པ་མ་གཏོགས།

འགྲོ་བའི་སྡུག་བསྔལ་ཕྱག་གིས་བསལ་བའི་རྣམ་ཐར་མ་བཞག་ཅིང་།

ཉིད་ཀྱིས་རྟོགས་པ་གཞན་ལ་འཕོ་བའི་འཆོ་འཕྲུལ་ཡང་མ་བསྟན།

བཅིངས་པ་ཐམས་ཅད་ཀྱི་མཐར་ཐུག

བདག་ཏུ་ལྟ་བའི་བསམ་བློའི་བཅིངས་བ་ལས་ཀྱང་གྲོལ་བའི་ཐབས་ལ་གཞུགས་པ་ཡིན་པས།

ཆོས་ལུགས་དང་སྒྲུབ་སྡེའི་བཅིངས་པ་གསར་གཏོད་མ་བྱས།

ལྷག་པར་དུ་ཐ་སྙད་ཀྱིས་ནམ་ཡང་མཚོན་པར་མི་ནུས་པའི་གནས་ལུགས་དེ།

ཐ་སྙད་ཀྱི་གཞུང་ལུགས་སུ་མ་བཞག་ཅིང་།

གསུང་བཤད་འབྲུ་གཅིག་ཀྱང་ཡི་གེར་མ་བཀོད་ལ་འགོད་དུ་ཡང་མ་བཅུག

འཇིགས་པ་ཐམས་ཅད་ལས་ཐར་བའི་སེམས་པ་དེ།

གང་གིས་ཡང་འཇིགས་པར་མི་ནུས་མོད།

སྒྱུ་ལུས་འདུས་བྱས་ཀྱི་ཕུང་ཁམས་དེ།

ན་སོ་དང་མཉམ་དུ་འཇིགས་འགྲོ་བ་ལྡོག་མེད་ཀྱི་ཆོས་ཉིད་ཅིག་ཡིན་པས།

མི་ཚེ་གཅིག་གི་རིང་བགྲོ་གླེང་དང་གསུང་བཤད་སོགས་ཀྱི་ལམ་ནས།

སྐྱེས་བུ་རྣམས་བཅིངས་པ་ལས་གྲོལ་བའི་བྱ་བ་ཁོ་ན་ལ་འབུངས་མཐར།

དགུང་ལོ་བརྒྱད་ཅུ་རྩ་གཅིག་ལ་སོན་པ་ན།

སྒྱུ་ལུས་ཀྱི་ཕུང་པོ་དེ་རང་བྱུང་ཁམས་ལ་ཕྱིར་སློག་གནང་སོང་།

ཟབ་ཅིང་ཞི་ལ་འོད་གསལ་འདུས་མ་བྱས་ཀྱི་ནོར་བུ་ཞིག

འཛམ་བུའི་གླིང་གི་སྐྱེས་བུ་རྣམས་ལ་ལེགས་སྐྱེས་སུ་བསྩལ་མོད།

ཁོང་ཚོས་བཀའ་བསྡུས་པའི་“སྡེ་སྣོད་”ཅེས་པའི་ཡིག་ནག་གི་ཕུང་པོ་ཞིག་ལས།

གཞན་གང་ཡང་བདག་པོ་རྒྱག་མ་ནུས།

ཁོང་ཉིད་འཇིག་རྟེན་འདི་ནས་གཤེགས་པ་དང་མི་རིང་བར།

ཁོང་གིས་ཡིག་ཐོག་ཏུ་འགོད་དུ་མ་བཅུག་པའི་བདེན་པ་དེ།

རྗེས་འཇུག་པ་རྣམས་ཀྱིས་ཡིག་ཐོག་ཏུ་བཀོད་ནས།

གྲུབ་མཐའ་དང་གཞུང་ལུགས་སུ་གཏན་འབེབས་བྱས་སོང་།

ཁོང་གིས་ཁྱིམ་སྤངས་ནས་འབྲོག་དགོན་དང་སྡོང་ནགས་འགྲིམས་མོད།

ཁོང་འདས་པ་དང་རྗེས་འབྲངས་པ་ཚོས།

དབེན་གནས་དེ་དག་དགོན་པ་ཞེས་པའི་ཁྱིམ་ཚང་རེ་རེ་རུ་འཛུགས་སྐྲུན་བྱས་སོང་།

ཁོང་གི་ལྷུང་བ་བཟེད་པའི་ལྷུང་བཟེད་དེ།

ཁོང་ཚོས་ཟས་ཀྱི་ཕུད་ཁོ་ནས་བཀང་ཞིང་།

ཁོང་གིས་དུར་ཁྲོད་ནས་བཙལ་བའི་ཆོས་གོས་དེ།

ཁོང་ཚོས་སྒོར་མོའི་ཕོན་པོ་རེ་རེ་འཐུམ་བསྒྲིལ་བརྒྱབས་སོང་།

ལྷག་པར་དུ་“བཀའ་བསྡུ་”ཞེས་པའི་བྱས་ཉེས་ཆེན་པོ་དེས།

ཐ་སྙད་ཀྱིས་མཚོན་པར་མི་ནུས་པའི་བདེན་པ་དེ།

ཐ་སྙད་ཀྱིས་དམར་གསོད་དུ་བཏང་འདུག

མདོར་ན་ཁོང་གིས་ཐར་པའི་ལམ་དུ་བསྟན་པའི་དམ་ཆོས་དེ།

ང་ཚོས་ལྕགས་ཀྱི་སྒྲོམ་དུ་བཅོས་ནས་རང་ཉིད་བཙོན་དུ་བཅུག་ཡོད།

འདི་ནི་ང་ཚོར་མཚོན་ན་ནམ་ཡང་གུན་གསབ་མི་སྲིད་པའི།

ཕམ་ཁ་ཆེན་པོ་ཞིག་ཡིན།

༡༠།༡༠།༢༠༡༧།

ཡོངས་ཁུངས། རྩོམ་པ་པོ་ཉིད་ཀྱི་ངོ་དེབ་དྲྭ་བ་ལས་ཕབ་བཤུས་བྱས།