བརྩི་བཀུར་གྱིས་ང་ཚོ་ཕན་ཚུན་ཡར་རྒྱས་གཏོང་ཐུབ།

རྩོམ་པ་པོ། འོད་ཟེར་དཀར་པོ།

དང་པོ།

མི་ཚེའི་གོ་རིམ་ཁྲོད་དུ་ང་ཚོས་ནུས་པ་ཅི་ལྕོགས་ཀྱིས་འབད་འབུང་ཆེར་བསྐྱེད་དོན། མ་འོངས་པར་རང་ཉིད་ཁྱད་ནུས་ལྡན་པའི་སྐྱས་བུ་ཞིག་བྱ་བའི་སླད་དུ་ཁོ་ན་ཡིན། ཤེས་རིག་འགྲན་རྩེད་ཀྱི་དུས་རབས་འདིར་ཅིས་ཀྱང་རང་ལམ་ཞིག་འཚོལ་བཏུབ་དགོས་པ་སྨོས་མེད་ཀྱི་སྐད་ཆ་ཞིག་རེད། རང་ཉིད་གང་ལ་འཇོན་ནུས་བདོག་པ་དེར་འབད་བརྩོན་གྱི་རྒྱུན་མ་ལྷོད་པར་འབྲས་རྟགས་ཤིག་གྲུབ་ན། རང་ཉིད་གང་དུ་གནས་པའི་ཁོར་ཡུག་དེར་གོ་ཆོད་པ་ཡིན་ལ་དྲིན་བཟོས་པའང་ཡིན། བྱ་བ་ལ་བཟང་ངན་དང་གྲུབ་འབྲས་ལ་མཆོག་དམན་ཡོད་མོད། ང་ཚོས་རེ་བ་ཆེ་ས་ནས་བཟུང་སྟེ་བྱ་བ་ཆུང་ས་ནས་སྒྲུབ་བཞིན། སྔར་གྱི་རང་ཉིད་ལས་ཡར་རྒྱས་གཏོང་བའི་ཕྱོགས་སུ་འབད་ན། ང་ཚོ་གཞོན་སྐྱེས་དག་ལ་རེ་བ་ཡོད་པ་དང་ཡར་རྒྱས་བདོག་པ་ནི་བཤད་པ་ཙམ་མ་ཡིན་པར་ཆོས་ཉིད་ཀྱིས་ཐག་བཅད་པ་ཞིག་རེད་དོ།།

གཉིས་པ།

ང་ཚོས་རང་ཉིད་ཀྱིས་གཉེར་བའི་ལས་དཀའ་ལ་སུས་ཀྱང་འགྲེལ་བཤད་ཡག་པོ་ཞིག་རྒྱག་ཐུབ། སྐབས་རེར་མཁྲེགས་འཛིན་གྱི་ལྟ་བས་བསླུས་ཏེ་གཞན་གྱི་ཡོན་ཏན་དང་ལེན་མེད་པའི་ཁར། མཐོང་ཆུང་གི་མིག་གིས་ལྟ་བ། ཁྱད་གསོད་ཀྱི་སྐད་ཆ་མོལ་བ་ནི། ཡར་རྒྱས་འགྲོ་བའི་བགེགས་ཉིད་ཡིན་གཤིས། ང་ཚོས་ཡོན་ཏན་གྱི་ཧེ་བག་ལ་མི་ལྟ་བར། ཕན་ཚུན་དབར་དུ་འདྲ་མཉམ་གྱི་ཁ་བརྡ་ཡོད་པ་དང་། བརྩི་བཀུར་གྱི་གཤིས་སྤྱོད་ཡོད་པ་ནི། མི་ཞིག་གི་གཞི་རྩའི་འགྲོ་སྟངས་ཡིན་པས། དེ་རང་ཉིད་ལ་ཆགས་ཐུབ་པ་བྱེད་དགོས། ཉན་རེས་བཤད་རེས་དང་བསམ་ཚུལ་སྣ་མང་གི་ལྟ་བ་མཉམ་གནས་ཤིག་ཡོད་ན། ང་ཚོའི་མདུན་ལམ་གྱི་ལམ་ཁ་ཇེ་ཡངས་སུ་འགྲོ་བ་ལས། ལྟ་ཚུལ་གཅིག་པུ་ཅན་དང་། སྒེར་སེམས་ཆེ་བ། བཀོལ་ཤེས་མ་གཏོགས་སྐྱོང་ཤེས་མེད་པ། རང་ཁེ་རང་རྒྱལ་གྱི་ལྟ་བས་བཟི་དྲགས་ན་སྔར་འགྲོགས་ཀྱི་འབྲེལ་བ་ཇེ་ལྷོད་དང་། ཨ་གསར་གྱི་རྔ་མ་ཇེ་ཐུང་དུ་འགྲོ་བ་གདོན་མི་ཟ་ལ། ཡར་རྒྱས་དང་མདུན་ལམ་ཟེར་བ་ཡང་དེ་ཙམ་ཡིན། དེའི་ཕྱིར་ཀུན་དང་མཐུན་པའི་དཀྱེལ་ཡངས་ཀྱི་བསམ་བློ་ཞིག་ཡོད་ན་ཡག་པ་ལས། རང་ལྟ་མཆོག་ཏུ་གཅེས་པ་ནི་མཐར་རང་ཉིད་ལ་ཤིན་ཏུ་གནོད་པའི་འགད་རྫས་ཤིག་འཁྲིས་སུ་བཟུང་བ་དང་ཕྱོགས་ཀུན་ནས་མཚུངས་སོ།།

གསུམ་པ།

མི་ཆེ་ཆུང་སུ་ཡིན་ཡང་ནུས་པ་འཇོན་ཚོད་ཀྱིས་རང་གི་ཁོར་ཡུག་ལ་ཕན་པའི་བྱ་བ་ཞིག་བསྒྲུབས་ན། དེ་ལ་སྒེར་གྱི་འབྲེལ་བ་བཟང་ངན་ཙམ་གྱི་རྗེས་སུ་མ་འབྲངས་པར། ཕན་ཚུན་རོགས་རམ་དང་། ལེགས་པའི་ཆ་ལེན་རེས་བྱེད་པ། དེར་རྒྱབ་སྐྱོར་དང་བསྟོད་འོས་ཀྱི་སྐད་ཆ་བསྙད་ན། རིམ་པས་མཐུན་སྒྲིལ་དང་ཡར་རྒྱས་ཡོང་བ་མ་ཟད། ཐ་ན་རང་གི་ནང་སེམས་སུའང་ཞི་ལྷོད་བགས་ཡངས་ཀྱི་བདེ་བ་ཞིག་ངང་གིས་སྐྱས་འོང་ངོ་། །དེ་ལས་ལྡོག་སྟེ་རང་རང་གིས་རང་ཉིད་ཁོ་ན་ཡོན་ཏན་གྱི་གོང་བུར་བསམས་ཏེ། འདྲ་མཉམ་གྱི་ལྟ་བ་མེད་པ་དང་གཞན་གྱི་ཡོན་ཏན་ཁས་ལེན་པའི་སྙིང་སྟོབས་མེད་པར། འཕྲལ་དུ་འབུར་འཇོམས་བྱེད་པ་དེས་མི་སོ་སོའི་འཇོན་ནུས་མང་པོ་ཞིག་གི་སྒོ་བཅད་ཡོད་ལ། དོན་གྱིས་ཚོགས་སྤྱི་ལ་གནོད་པའི་ཆ་མང་བོ་ཞིག་ཀྱང་དེ་གར་གནས་ཡོད། དེའི་ཕྱིར་ང་ཚོས་མི་ཆེ་ཆུང་དང་རྒྱུ་ནོར་དབང་ཐང་ཡོད་མེད་ལ་མ་ལྟོས་པར་ཐམས་ཅད་ཀྱི་འཇོན་ནུས་ལ་བརྩི་བཀུར་དང་ཁོར་ཡུག་སྤྲད་དགོས།

བཞི་བ།

ང་ཚོས་རང་ཉིད་ཀྱི་ཚོར་བ་ཙམ་དང་། རང་གི་འདུན་པ་དང་རྗེས་སུ་མ་མཐུན་ན། གཞན་གྱི་གཤིས་སྤྱོད་ངན་དུ་བརྩིས་ཏེ། བཟང་ངན་གྱི་དབྱེ་བ་དགར་དྲགས་ན། དེ་ནི་རང་ཉིད་ཀྱི་མཚང་དུ་འགྲོ་བའི་ཉེ་རྒྱུ་ཁོ་ནར་ཡིན་གཤིས། དེ་ལས་རང་གི་བགོ་སྐལ་གྱི་བགྱི་བར་འབད་དེ་གྲུབ་འབྲས་ཤིག་མཆིས་ན། སོ་སོའི་མི་ཚེ་དོན་ལྡན་དུ་གྱུར་བ་རེད་ཅེས་བསྙད་ཆོག་སྙམ། རབ་བྱུང་བའི་སྡེ་ཞིག་ལ་མཚོན་ན། དགེ་འདུན་པ་ཞེས་པའི་ཐ་སྙད་ཡིད་དུ་འོང་བ་དེ་ཁོ་ནར་གཞིགས་ནའང་། ཕན་ཚུན་བར་ལ་གོང་བཀུར་ཡོད་པ། འཚོ་བར་ལྷོད་ཆ་ལྡན་པ། སྒམ་དཀྱེལ་གྱི་བསམ་བློ་བདོག་པ། ཀུན་སྤྱོད་གཞན་གྱི་ཡིད་དུ་འཐད་པ་ཞིག་མི་སྒེར་སྟེང་ནས་འབད་ཐུབ་བྱུང་ན། ཟུར་ཐམས་ཅད་ནས་འཐུས་ཚང་བའི་འཚེ་མེད་ཞི་བདེའི་ཚོགས་སྤྱི་ཞིག་ཀྱང་གྲུབ་པ་རེད་སྙམ་ཡོད།

 

ཡོང་ཁུངས། ལུག་ཚང་དཔལ་ཡོན་སྤྱི་སྟེགས།