འབྲོག་མོའི་སྐོར་གྱི་སྙན་ངག་ཚན་པ་གསུམ། སེང་རྡོར།

འབྲོག་མོ་ངོ་མ། ཁག་སྔོན་མ།

 

ཤ་ཁ་ཅུང་ཟད་སྩོམ་པའི། །

འོག་དྲི་བག་ཙམ་ཁ་བའི། །

རྐང་སྣམ་ཁ་འདིག་ཞན་པའི། །

འབྲོག་མོ་ངོ་མ་ཨེ་མཚར། །

དོར་མ་གཅུས་ཏེ་གྱོན་པའི། །

དོར་ཁར་འཇར་འཇུར་མང་བའི། །

ནུ་ཐུམ་རྩ་ནས་མེད་པའི། །

འབྲོག་མོ་ངོ་མ་ཨེ་མཚར། །

བྲང་ག་བལྡགས་ན་བཙན་པའི། །

མཆན་འོག་འཇིབ་ན་སྐྱུར་བའི། །

འགོས་ནད་ཧ་ལམ་མེད་པའི། །

འབྲོག་མོ་ངོ་མ་ཨེ་མཚར། །

མཇེ་ནས་འཛིན་རྒྱུར་འཛེམ་པའི། །

རྐུབ་ལ་བལྟས་ན་འཕག་པའི། །

ཁུ་བ་མིད་རྒྱུར་ཞེད་པའི། །

འབྲོག་མོ་ངོ་མ་ཨེ་མཚར། །

གཡབ་ཁར་བཀྲུ་སྲོལ་མེད་པའི། །

གཡབ་རྗེས་འབྱིད་སྲོལ་མེད་པའི། །

གཙང་ཤོག་ཁྱོན་ནས་མེད་པའི། །

འབྲོག་མོ་ངོ་མ་ཨེ་མཚར། །

ཉལ་སར་རྩྭ་དྲི་བྲོ་བའི། །

སྐྲ་ལོར་ཨོང་དྲི་བྲོ་བའི། །

ཁ་ནང་རྩམ་དྲི་བྲོ་བའི། །

འབྲོག་མོ་ངོ་མ་ཨེ་མཚར། །

མཚན་སྤུ་རྡུལ་གྱིས་བཟུང་བའི། །

མཚན་ཁ་གཡའ་ཆུས་སྦྱར་བའི། །

འཕོངས་མགོར་ས་ཡང་སྲིད་པའི། །

འབྲོག་མོ་ངོ་མ་ཨེ་མཚར། །

ཐོག་ལ་ཞོན་རྒྱུར་འཇིགས་པའི། །

འོག་ནས་བསྣར་རྒྱུར་གོམས་པའི། །

རེམ་དང་དགོས་སོགས་མེད་པའི། །

འབྲོག་མོ་ངོ་མ་ཨེ་མཚར། །

ཐོད་པར་མར་དྲི་བྲོ་བའི། །

སྣ་སྒོར་འོ་དྲི་བྲོ་བའི། །

ལག་པར་གོར་དྲི་བྲོ་བའི། །

འབྲོག་མོ་ངོ་མ་ཨེ་མཚར། །

བཤང་སྒོར་སྣོམ་དུ་མི་འཇུག །

བསྣམ་ན་སྐྱག་དྲི་བྲོ་འོ། །

རྐང་པར་ཐུག་ཏུ་མི་འཇུག །

ཐུག་ན་རུལ་དྲི་བྲོ་འོ། །

འོན་ཀྱང་ཤ་ཁ་གང་བས། །

བདེ་ལ་སྐྱིད་ཅིག་ཡོད་དོ། །

གཟུགས་པོ་བཙན་གྱིས་བསྐམས་པའི། །

ཡི་དྭགས་སྔོ་སྐེ་མིན་ནོ། །

ནུ་ཟུང་མཁྲང་ཞིང་ཟླུམ་པས། །

འཕུར་ལ་སྐྱིད་ཅིག་ཡོད་དོ། །

རས་ཐུམ་མཁྲེགས་པོས་བཀླུབས་པའི། །

ཚོར་མེད་ཤུབ་སྟོང་མིན་ནོ། །

མིག་གིས་སྐད་ཆ་བཤད་པའི། །

ཉམས་ཀྱིས་ཡི་གེ་བསྐུར་བའི། །

ཤི་ཡང་བརྗེད་མཐའ་མེད་པའི། །

འབྲོག་མོ་ངོ་མ་ཨེ་མཚར། །

ཞེས་པ་འདི། དྲ་གྲོགས་མི་ཁོམ་པའི་རྒྱལ་སྲས་ཀྱིས་འབྲོག་མོའི་སྐོར་ལ་གཅིག་བྲིས་འདུག་པར་ཀུ་རེ་ཚུལ་དུ་མཆན་ཞིག་འབྲི་རྩིས་ཡིན་མོད། བྲིས་ཀྱིན་དུ་སྙན་ངག་ཅིག་ཏུ་ལངས་བྱུང་བ་འདིའོ།།

-----------------------------------------------------------

འབྲོག་མོ་ངོ་མ། ཁག་རྗེས་མ།

མགོ་དཀྲིས་དམར་པོའི་གཏིང་ནས། །

མིག་ཟུང་ཁོ་ན་འགུལ་བའི། །

ཁ་ཐུམ་དཀར་པོའི་རྒྱབ་ནས། །

མཆུ་སྣའི་འབུར་ཞོམ་གསལ་བའི། །

འབྲོག་མོ་སྙིང་ལ་རྗེ་བོ། །

དགུན་ཁའི་བསང་མེ་ཡིན་རེད། །

ལུ་གུ་རྙང་རྔ་ཞིག་ལ། །

རྩམ་རྡོག་བཅད་མ་སྟེར་བའི། །

ན་ཆུ་དཀར་ཚུབ་དམར་ཚུབ། །

རི་སྐེད་ཟོག་རྗེས་གཅོད་པའི། །

འབྲོག་མོ་སྙིང་ལ་རྗེ་བོ། །

དཔྱིད་ཟླའི་ཁ་དོག་ཡིན་རེད། །

འབྲི་མོའི་ཕོ་འོག་འཛུལ་ནས། །

འགྲམ་པས་དབོ་རྩིད་གླན་ཏེ། །

འོ་མ་ཤག་ཤག་བཞོ་ཞིང་། །

སྐྱབས་འགྲོ་འུར་འུར་འདོན་པའི། །

འབྲོག་མོ་སྙིང་ལ་རྗེ་བོ། །

སྟོན་གྱི་རྩྭ་ར་ཡིན་རེད། །

འོ་ཟོ་སྦྲ་སྒོར་བསླངས་ཏེ། །

འོ་རྟ་ལག་པས་བསྐྱོར་བའི། །

གྲུ་མོར་ཐབ་དྲེག་འགོས་ཤིང་། །

ལྷམ་ཞབས་འདམ་སྙིགས་འབྱར་བའི། །

འབྲོག་མོ་སྙིང་ལ་རྗེ་བོ། །

དབྱར་མགོའི་མཚེར་ཆུ་ཡིན་རེད། །

ཕྱེ་ལེབ་དཔུང་ཐོག་ལྡིང་ཞིང་། །

བུང་བ་སྒལ་གཞུང་འཁོར་བའི། །

རྐང་བོལ་འབུ་ཆུང་ཟ་བའི། །

སྐེ་ཟུར་ཤིག་རྙིལ་གོག་པའི། །

འབྲོག་མོ་སྙིང་ལ་རྗེ་བོ། །

དུས་བཞིའི་ཇོ་དར་ཡིན་རེད། །

ཟླ་མཚན་ཐུ་བར་འགོས་ཤིང་། །

སྐྱག་གཞུག་རྡོ་བས་འབྱིད་པའི། །

རྐང་པའི་སེན་མོ་རིང་ཞིང་། །

ལག་པའི་སེར་ཀ་ཆེ་བའི། །

འབྲོག་མོ་སྙིང་ལ་རྗེ་བོ། །

མཛེས་པའི་མག་མོག་ཡིན་རེད། །

རྣ་འགྲམ་ཁ་རླངས་རྒྱག་བཞིན། །

རན་པས་སེན་ཐོགས་བྱས་ན། །

དབང་མེད་ཚུར་ལ་འཁོར་ཞིང་། །

རིམ་པས་ཁ་ལ་མཉན་པའི། །

འབྲོག་མོ་སྙིང་ལ་རྗེ་བོ། །

མུན་ནང་ལུང་བསྟན་ཡིན་རེད། །

རྡོ་རྗེའི་ཚིག་རྐང་སྦྲེལ་ལུགས། །

འཆམ་པོ་ཞེ་གཅིག་འབྱུང་ན། །

ཆ་ཡོད་དང་ཆ་མེད་ཅི་ཁྱད། །

འཇིག་རྟེན་སྣང་བ་བསོར་ཟེར། །

འབྲོག་མོ་སྙིང་ལ་རྗེ་བོ། །

སྐོམ་སེལ་འཁྱག་དར་ཡིན་རེད། །

སེམས་སོང་དགའ་ལོའི་ཆེད་དུ། །

རང་ལུས་རྡུལ་དུ་བརླགས་པའི། །

བྲག་ཐོག་ཁྲག་དམར་འཕོ་བའི། །

ཆུ་ནང་དོན་ལྔ་འདེབས་པའི། །

འབྲོག་མོ་སྙིང་ལ་རྗེ་བོ། །

ནང་གསལ་ལྕགས་ཐམ་ཡིན་རེད། །

མེ་ཏོག་ཡུ་བ་བཅད་དེ། །

སྣེ་ལ་ཁ་ཕུ་འདེབས་དུས། །

ཐོད་སྐྲ་རླུང་གིས་འཕྱོས་སོང་། །

མིག་ནང་ཆུ་ཡིས་བསྐོར་སོང་། །

འབྲོག་མོ་སྙིང་ལ་རྗེ་བོ། །

ཚེ་གཅིག་དྲན་ཤིང་ཡིན་རེད། །

ཟ་འགྲམ་ཉི་མས་ཚིག་ཡོད། །

ཨམ་ཅོག་ཙག་གིས་ཕྱིད་ཡོད། །

མིག་ཟུང་ཁངས་ཀྱིས་བསྣད་ཡོད། །

པུས་ཚིགས་ས་ཆུས་སྐྲངས་ཡོད། །

འབྲོག་མོ་སྙིང་ལ་རྗེ་བོ། །

འབྱུང་བའི་བརྩམས་ཆོས་ཡིན་རེད། །

སྙན་ངག་འདིའི་ཁག་སྔ་བའི་མཆན་དུ་རྒྱལ་ཁམས་པ་ཀླུ་སྨྱོན་དང་སྐུ་ཞབས་བདེ་གྲོལ་གཉིས་ཀྱིས་ཡི་གེ་ཚོར་ཤུགས་སློང་བ་རེ་བྲིས་འདུག་པས་འདི་འདྲ་ཞིག་ཀྱང་ཐོལ་གྱིས་བབས་སོང་། 

མཆན། མཁས་དབང་ནམ་མཁའི་ནོར་བུ་སོགས་ཀྱིས་༼ཡོད་པ་རེད་༽ཅེས་པའི་ཚིག་སྡུད་དུ་༼ཡོད་རེད་༽ཅེས་བྲིས་ཡོད་པ་བཞིན། ཁོ་བོས་ཀྱང་འདིར་༼ཡིན་པ་རེད་༽ཅེས་པའི་ཚིག་སྡུད་དུ་༼ཡིན་རེད་༽ཅེས་གསར་དུ་སྦྱར་ཡོད། ཚིག་འགྲོས་གསར་པ་བློ་ངོར་བདེ་ཐབས་མེད་པ་དག་གིས་ཁོ་བོར་༼ཡོད་རེད་༽ཅེས་སྡུད་བརྒྱབ་ཆོག་ན་༼ཡིན་རེད་༽ཅེས་སྡུད་བརྒྱག་མི་ཆོག་པའི་རྒྱུ་མཚན་འདྲེན་དགོས།

---------------------------------------------------------------------

འབྲོག་མོར་བྲིས་པའི་སྙན་ངག་སྔ་ཕྱིའི་ལྷན་ཐབས།

སྦྲ་རྒན་ནག་ལྡང་འཁྲིས་ཀྱི། །

རས་གུར་དཀར་མདུང་སྦུག་ཏུ། །

འབྲོག་མོ་སྟན་ཐོག་བསྡད་དེ། །

སྐྲ་རྔའི་ཁ་བཏགས་བལྟ་དུས། །

གནམ་ངོར་སྐར་ཁྱུ་བཀྲམ་ཡོད། །

རྫ་མགོར་མུན་ཆེན་འདལ་ཡོད། །

བསང་སྐྱོགས་ནང་གི་མེ་སྟག །

སྒོ་སྲུབས་བརྒྱུད་ནས་འཕུར་སོང་། །

ཁ་བའི་ནང་ལ་སྤོས་ཏེ། །

སྤེན་མའི་གསེང་ནས་ཐོན་ཏེ། །

འབྲོག་མོས་ཕྱུར་སྐམ་ལྡོད་ཀྱིན། །

ཐབ་ལ་རིལ་ལུད་དེད་བྱུང་། །

གོ་ཁུང་དུ་ལྷོག་འཕྱུར་ཏེ། །

མཆོད་སྒམ་འབའ་ཞིག་གཏིབས་པས། །

དོ་ཐོག་བྱི་ལ་བསྒོངས་ནས། །

ཉི་ཐིག་བཅད་དེ་ཐལ་སོང་། །

གསེབ་ཅིག་རྒོད་མ་དེད་ནས། །

ཀི་ཧུའི་ཆགས་སྐད་འདོན་དུས། །

འདྲེ་ཟོག་གདོན་ཟོག་ཟེར་ནས། །

འབྲོག་མོ་འཚུབ་ཆ་ལངས་སོང་། །

ས་ལ་སྒུར་ཐེངས་གཅིག་གིས། །

ལྕི་རློན་མགོ་ཙམ་འཕྱར་ཏེ། །

འབུ་ནག་བསེ་བོའི་ཐོག་ལ། །

ཆིལ་སྒྲ་དང་བཅས་བརྒྱབ་ཐལ། །

གད་པའི་ཁ་རྒྱུད་བསྣར་ཏེ། །

གྲོག་མའི་སྐྱེལ་འདྲེན་གཟིགས་ཤིང་། །

སྣ་ཆུ་ལག་པས་བསལ་བཞིན། །

འུར་ཆའི་སྣེ་མོ་སེལ་བའི། །

འབྲོག་མོ་གསེར་རྣ་ཅན་ཞིག །

ཁང་པའི་རྒྱབ་རོལ་གཡེལ་དུས། །

རླུང་གིས་རྩྭ་རྐང་བཅག་སྟེ། །

སྣ་ཁུང་ནང་ལ་བྲོ་བྱུང་། །

ཐལ་སྤུང་ལོགས་སུ་ཕྱིན་ཏེ། །

ལྭ་འདབས་ཨོང་མགོར་བརྫིས་ཏེ། །

དོར་མ་སྒྱིད་ཁུག་འཕངས་ནས། །

གཅིན་པ་ཤག་ཤག་གཏོང་དུས། །

རྐང་བར་ཆུ་ཆུང་འཁྱིལ་བྱུང་། །

ཆུ་ནང་སྡོམ་མང་འཕག་བྱུང་། །

ཁྱི་རྒན་ཚུར་ལ་བལྟ་ཞིང་། །

རྔ་མ་ལྡེམ་ཙམ་བྱེད་དོ། །

ཚིག་རྩེད་ཐུང་ངུ་ཞིག་གིས། །

གསོད་ལ་ཁད་ཅིག་བྱེད་ཅིང་། །

སླར་ཡང་ཐུང་ཞིག་བསྣན་ཏེ། །

ཤི་སོས་དབུགས་དབྱུང་སྦྱིན་པའི། །

འབྲོག་མོ་ཁ་རྒོད་མ་ཁྱོད།

མཁུར་བ་ཅུང་ཟད་དམུལ་བས། །

ཡི་དྭགས་སློག་སྐྱ་ཅན་དག །

ཡ་ཆུང་བཟི་བེར་བྱས་སོང་། །

བྲག་རྩི་སེར་པོས་གཡོགས་པའི། །

རྡོ་སྐུ་ཆག་པོའི་དྲུང་དུ། །

མགོ་བོ་ལན་གསུམ་དུད་ནས། །

ལག་པ་སྙིང་གར་འཇོག་པའི། །

འབྲོག་མོའི་སྨིན་མཚམས་རང་དུ། །

ཡི་གེ་ལྗང་ཁུའི་ཕྲེང་བ། །

ནམ་མཁའི་འོད་དང་བསྡེབ་སྟེ། །

གོར་གོར་དུམ་དུམ་ཡོང་ངམ། །

ཞེས་སྤྱི་ལོ་ཉིས་སྟོང་བཅུ་གཉིས་ལོའི་ཟླ་དང་པོའི་ཚེས་གསུམ་ལ་བྲིས།