1. ཁུ་ནག་འཐུང་ཞོར།
ང་རང་རླུང་བུ་ལ་ཕྲག་དོག་ལངས་པར་གྱུར།
རླུང་བུས་ཁྱེད་ཀྱི་སྐྲ་ལོ་བྱུང་རྒྱལ་དུ་གཡུགས་པར་བྱེད།
ང་རང་སྦྲང་མ་ལ་ཁོང་ཁྲོ་ལངས་པར་གྱུར།
སྦྲང་མས་ཁྱེད་རང་སུན་པོ་བཟོས་པ་ལན་ཅིག་མིན།
སྐབས་འདིར།
ངས་ཉི་འོད་ཁོ་ན་ལ་སེམས་གཏིང་ནས་བཀའ་དྲིན་ཞུ་འོས་ཏེ།
ཉི་འོད་ཀྱིས་ཁྱེད་ཀྱི་མཁུར་ཚོས་ལ་དམར་མདོག་གིས་བརྒྱན་པར་བྱས་པས་སོ།།
ཁོར་ཡུག་འདི་ཧ་ཅང་འུར་སྒྲ་ཅན་ཞིག་ཡིན་ནའང་།
ང་རང་།
དེ་ལ་དོ་སྣང་བྱེད་ཁོམ་གཏན་ནས་མེད།
དུས་ཚོད་འདི་ཐུང་ཐུང་ཞིག་ལས་མེད་ནའང་།
ཧ་ཅང་རྩ་ཆེན་པོའི་སྒོ་ནས་ལོངས་སུ་སྤྱོད་པར་འགྱུར།
ཉི་མ་ནི་ནུབ་རིར་ཕྱོགས་པར་བྱེད་ལ།
མི་ཚོགས་དག་ཀྱང་རང་སར་ལོག་པར་འགྱུར།
ང་རང་ཅི་ཞིག་བོར་སོང་བ་ལྟར།
འབབ་ཚུགས་དེ་ན་ད་དུང་ཁུ་སིམ་མེར་ལྷག་འདུག་ཨང་།
༡༢།༠༧།༢༠༢༠།
___________________
2. ཡུལ་དུས་ལ་སྦྱར་བའི་སྐད་ཅ།
“ནད་འབུ།”
མི་དག་འཆོལ་བར་གྱུར་པ་ནས།
འཇིག་རྟེན་འདིར་སྐབས་དང་མཚམས་སུ།
ནད་འབུ་སྣ་ཚོགས་རེས་མོས་སུ་འབྱུང་བར་གྱུར།
ནད་འབུ་དག་གཅིག་རྗེས་གཉིས་མཐུད་དུ་སླེབས་ནས་ཕྱིན་ཟིན་ནའང་།
ཁྱོད་ད་དུང་མི་ཡོང་བ་ཅི་ཞིག་ཡིན་ནམ།
“བར་ཐག”
འགྲུལ་བཞུད་ཀྱི་ལམ་ནས་བར་ཐག་འཇོག་པ་ནི།
དེ་ཙམ་དཀའ་ལས་མ་ཡིན་གྱི།
སེམས་དང་སེམས་ལ་བར་ཐག་འཇོག་པ་ནི།
དངོས་གནས་དཀའ་ལས་ཁག་པོ་རེད་ཨང་།
“ཁ་རས།”
སེམས་ནང་གི་སྐད་ཅ་ཚིག་གསུམ་དེ།
བློ་སྟོབས་ཆེན་པོས་ཁྱོད་ལ་ཞུ་བར་འདོད་མོད།
འོན་ཀྱང་ཁྱོད་ཀྱི་གམ་ན་སླེབས་དུས།
ཁ་ལ་ཁ་འཐུམ་བརྒྱབ་པ་ནང་བཞིན།
སྨྲ་བ་འཁྲོལ་རྒྱུ་ནི་ཅི་འདྲའི་དཀའ་བ་ལ་ཨང་།
“སྨན་ཆུ།”
སྨན་ཆུས་ལག་པ་ཙམ་གཙང་མ་བཟོ་ངེས་ན།
སྐྱོ་གདུང་གིས་མནར་བའི་སེམས་པ་འདི།
སུ་ཞིག་གིས་གཙང་བར་བྱེད་ཨང་།
ལག་པ་ནི་ཆུ་ལ་བཀྲུས་ནའང་ཆོག་མོད།
འོན་ཀྱང་སེམས་པ་འདི་ཆུ་ཡིས་བཀྲུས་ན་འགྲིག་གམ།
༡༥།༠༧།༢༠༢༠།
___________________
3. སྐོར་བྲོ་ཞིག་ལ་བལྟས་རྗེས།
ཟོམ་པ་ཡུ་རིང་མས་ས་གཞི་བརྡུང་བའི།
ཕུ་དུང་དཀར་ཕྲ་མས་སྤྲིན་པ་འཕྱག་པའི།
ནམ་མཁར་འཕུར་ལ་ཁད་པའི།
ས་གཞིར་འབྱར་ལ་ཁད་པའི།
ཕོད་ཀ་དམར་སིང་སིང་གི་བདག་པོ།
ལན་བུ་ནག་ཤིག་ཤིག་གི་བདག་མོ།
རླུང་གི་རྒྱུ་ཕྱོགས་ལ་འཁན་པའི།
སྤྲིན་པའི་ལྡིང་ཕྱོགས་ལ་སྙེག་པའི།
གདངས་ཀྱི་རྩེ་ནས་འགུལ་བའི།
གར་གྱི་གསེབ་ནས་འཕགས་པའི།
ཕྱག་རྒྱ་ལྡེམ་ལྡེམ་གྱི་བདག་པོ།
བྲོ་ར་འཁྲིགས་འཁྲིགས་ཀྱི་བདག་མོ།
ནམ་མཁའི་སྤྲིན་པ་ལ་བྱིལ་བྱིལ་བྱེད་མཁན།
ས་གཞིའི་མེ་ཏོག་ལ་ལག་འཇུ་གནང་མཁན།
རོལ་དབྱངས་ཀྱི་རྩེ་ནས་འཕུར་བའི།
བྲོ་ར་ཡི་གཏིང་ནས་འཕྱོ་བའི།
ཕ་ས་ཕ་ཡུལ་གྱི་བདག་པོ།
རི་ཆུ་ནགས་གསུམ་གྱི་བདག་པོ།
གླུ་དང་གར་གྱི་བདག་པོ།
༡༨།༠༧།༢༠༢༠།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།