རྩོམ་པ་པོ། སློབ་དཔོན་བཀྲ་ཤིས་དོན་གྲུབ།
རྫུན་དང་ལྷན་དུ་འུད་བརྗོད་འདྲེས་པ་ཡིས།།
མི་རྣམས་མགུ་བའི་ཞར་ལ་མགོ་བསྐོར་བའི།།
ཧར་བཤད་ལུགས་ཀྱི་ས་བཅུ་མཐར་སོན་པའི།།
ཧར་གྱི་ལྷ་ཚོགས་རྣམས་ལ་ཧར་ཕྱག་འཚལ།།
ཧར་འདི་དང་པོ་ལྷ་ཡི་ཡུལ་ནས་བྱུང་།།
ལྷ་ཡི་དབང་པོ་ཚངས་པ་ཟེར་བ་དེས།།
འཇིག་རྟེན་བག་ལེབ་འདྲ་བ་ངས་བྱས་ཞེས།།
ཧམ་རྫུན་བླ་མེད་ཅན་གྱི་ཧར་ཞིག་བཤད།།
ཧར་བསྟན་བྱུང་ས་ལྷ་ཡི་ཡུལ་ཡིན་ཡང་།།
ཧར་བསྟན་དར་ས་མི་ཡི་ཡུལ་ཡིན་ཏེ།།
མི་ཚོས་ཧར་ཞིག་བཤད་དང་མ་བཤད་ལ།།
མང་པོས་ལྷ་ཆོས་མི་བྱེད་ཧར་ཆོས་བྱེད།།
མི་ལོ་དགུ་བརྒྱ་བཞུགས་པའི་བཱན་དེ་དང་།།
པདྨའི་སྦུབས་ལས་འཁྲུངས་པའི་ཨ་ཙརྱ།།
མཚར་གཏམ་ཧར་གཏམ་ཅི་ཡིན་མི་ཤེས་པའི།།
སྒྲུང་གཏམ་དག་གིས་དངོས་ཡོད་རྫུན་པར་བཏང་།།
མི་ཡི་མགོ་ལ་གླང་ར་ཡོད་ལུགས་དང་།།
མི་རོ་གནམ་ལ་འཕུར་བའི་ཧར་དག་ནི།།
ཧར་གྱི་ནང་ནས་ཆུང་ཤོས་ཆུང་ཤོས་ཡིན།།
མི་མགོ་བསྐོར་བའང་འཚབ་ཆུང་འཚབ་ཆུང་རེད།།
ཡི་དམ་ལྷ་ཡིས་ཚུར་ཞལ་མ་གཟིགས་སྔོན།།
སྒྲུབ་པ་པོ་ཡིས་ཕར་ཞལ་གཟིགས་ཟིན་པའི།།
ཧར་གཏམ་དག་ནི་ད་གཟོད་ཧར་ཆེན་ཏེ།།
དེ་ཡིས་མི་སེམས་མི་ཚད་དངུལ་སྒོར་འཕྲོག།
གླང་རྒན་གནམ་ལ་འཕུར་བ་མཐོང་ཚུལ་དང་།།
གཡུ་འབྲུག་ས་ལ་ལྷུང་བ་ཚོར་ཚུལ་སོགས།།
བྱིས་པའི་རུམ་གྱི་བུ་རམ་བསླུ་བྱེད་ལས།།
ཧར་གཏམ་མཚན་ཉིད་པ་ཞིག་ཡིན་སྟངས་མེད།།
ཟངས་མདོག་དཔལ་རིར་འཕུར་བའི་མཐོངས་མཆན་ཞིག།
ཌོ་ལོར་སྤྲད་ནས་ཉོ་རྒྱུ་ཡོད་རབས་ཏེ།།
ཞིང་ཁམས་ཟ་ཁང་གང་ཡིན་མི་ཤེས་པའི།།
ཧར་སྒྲུང་ཅན་རྣམས་ཧར་གྱི་དེད་དཔོན་ཡིན།།
རང་གི་ཁ་ཟས་བླ་མའི་དངོས་གྲུབ་དང།།
གཞན་གྱི་ཁ་ཟས་དཀོར་ནག་ཡིན་ཚུལ་གྱི།།
ཧར་གཏམ་ཧམ་གཏམ་ཅི་ཡང་འཆད་ནུས་པའི།།
དཔའ་བརྟུལ་དེ་ཚོ་ཧར་གྱི་དཔའ་བརྟུལ་ཡིན།།
དམ་ལྡན་སྐྱེས་བུ་ང་རང་ཡིན་དགོས་ཤིང་།།
མཁས་པའི་དབང་པོའང་ང་རང་ཡིན་དགོས་པ།།
ང་ཡི་སྡེ་ལས་ང་གཞན་མི་མཐོང་བའི།།
ང་དཔོན་དེ་ཚོ་ཧར་གྱི་ང་དཔོན་ཡིན།།
མཛངས་མི་ཟེར་ཡང་རང་ལས་གཞན་མེད་ལ།།
རང་རྣམ་ཡོད་ཚད་བྱས་རབས་འཇོན་རབས་ཀྱིས།།
རང་བསྟོད་རང་གིས་བྱེད་པའི་ཧར་གོང་དག།
ཧར་གནས་ལྔ་ལ་མཁས་པའི་པཎ་ཆེན་ཡིན།།
ཧར་གྱི་བསྟན་པ་དར་བའི་རྩེར་སོན་ཏེ།།
བླ་མས་ལྷ་ཆོས་མི་འཆད་ཧར་ཆོས་འཆད།།
སློབ་མས་དམ་ཆོས་མི་སྒྲུབ་ཧར་ཆོས་སྒྲུབ།།
བླ་སློབ་མཚན་ཉིད་ཧར་ཟུར་དགུ་ལྡན་ཡིན།།
ཧར་འདི་ཤེས་ན་ཅི་ཡང་བྱེད་ནུས་ཤིང་།།
ཧར་ལ་འཇོན་ན་ཀུན་ཀྱང་འཇོན་ངེས་པས།།
ཧར་གྱི་ཤེས་བྱ་སྦྱོང་སའི་འཇིག་རྟེན་ནས།།
ང་ཡང་ཧར་མཁས་ཞིག་ནི་ཡིན་པ་འདྲ།།
ཧར་གཏམ་རིག་པའི་ཕ་རོལ་ཕྱིན་པ་ཚོས།།
ཧར་བཀའ་སྣ་ཚོགས་ཕབ་ནས་མི་རྣམས་བཀོལ།།
ཧར་དང་ཧབ་དང་ཧམ་སོགས་མི་ཤེས་པའི།།
གཉོད་ཆུང་དག་ནི་མ་སྐུལ་བྲན་གཡོག་ཡིན།།
༢༠༡༣།༠༥།༡༠།
ཡོང་ཁུངས། ངོ་དེབ་ནང་གི་བོད་ཡིག་རིག་གནས་གླེང་སྟེགས་ལས་བཤུས།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།