རྩོམ་པ་པོ། དོལ་པོ་པ་སྐུ་བ་པདྨ་རྒྱལ་མཚན།
ཇི་ཙམ་བལྟས་ཀྱང་ངོམ་མེད་འཛུམས་མདངས་དེས།།
སྙིང་འདི་བཤགས་པའི་ཚད་གཅིག་མི་འདུག་སྟེ།།
ད་དུང་སེམས་འདི་ཉེ་སར་བཅར་རྐྱང་བྱེད།།
ང་ལ་བསམས་ན་རེ་བ་ཡོད་དམ་ཅི།།
ཁྱོད་ནི་འདབ་རྒྱ་བཞད་པའི་མེ་ཏོག་ཅིག།
ང་ནི་གཤོག་པ་མེད་པའི་གསེར་སྦྲང་སྟེ།།
རྩི་བཅུད་མྱོང་བའི་ལང་ཚོས་སྟོངས་པ་འདི།།
ང་ལ་བསམས་ན་རེ་བ་སྟོང་བསམ་རེད།།
ཁྱོད་ནི་གནམ་འཕང་གཅོད་པའི་བྱ་རྒྱལ་ཏེ།།
ང་ནི་ས་ལ་རྒྱུ་བའི་རུས་སྦལ་ཞིག།
གནམ་འཕང་གཅོད་པའི་གཤོག་རྩལ་མེད་པ་འདི།།
རྗེས་སྙོགས་བསམ་པའི་རེ་བ་སྟོང་བསམ་རེད།།
ཁྱོད་ནི་ཞལ་ཡས་ཁང་གི་ལྷ་མོ་སྟེ།།
ང་ནི་མི་ཡུལ་འཁྱམས་པའི་སྤྲང་ལྡོམ་ཞིག།
ཡིད་འོང་ལྷའི་བུ་མང་པོ་མཐའ་བསྐོར་འདི།།
ང་ལ་བསམས་ན་རེ་བ་སྟོང་བསམ་རེད།།
མ་བཅོས་སེམས་ཀྱི་རང་བཞིན་མངོན་སྟངས་དང་།།
ཡིད་ལ་མཛའ་བའི་ལུས་ངག་རྣམ་འགྱུར་དང་།།
བཞིན་གྱི་མཛུམས་མདངས་སྤྲོ་བ་ཁོལ་བ་ཡིས།།
བདག་གི་སེམས་ཀྱི་བརྟན་པ་དབང་མེད་འཕྲོགས།།
ཡོངས་ཁུངས། ངེད་དྲྭ་བ།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།