སློབ་ཆུང་སློབ་མའི་རྩོམ་འབྲིའི་ཤེས་བྱ་སྐོར་གླེང་བ།

རྩོམ་པ་པོ། ལྷ་ལུང་འཚོ། (བོད་མཚོ་སྔོན་རྩེ་ཁོག་རྫོང་།)

སློབ་ཆུང་སློབ་མ་ཞིག་ལ་མཚོན་ན། རྩོམ་ཡིག་འབྲི་བ་དེ་ནི་ཧ་ཅང་དཀའ་ཁག་ཆེ་བའི་ངལ་རྩོལ་ཐེངས་ཤིག་ཡིན། རྩོམ་ཡིག་འབྲི་བ་དེ་ལ་གོ་རིམ་ལྡན་པའི་སློབ་གསོ་དང་སྤྱི་ཚོགས་འཚོ་བའི་སྦྱོང་བརྡར་ཡོད་དགོས་པར་མ་ཟད། རང་ཉིད་ཀྱི་བརྩོན་འགྲུས་དང་བློ་གྲོས་ཀྱི་འཇོན་ཐང་ཡང་ངེས་པར་དུ་ཡོད་དགོས། ཁོ་མོས་བལྟས་ན་སློབ་ཆུང་སློབ་མའི་རྩོམ་འབྲིའི་ནུས་པ་དེ་མཐོར་འདེགས་སུ་གཏོང་བ་ལ། གཤམ་གསལ་གྱི་དོན་ཚན་འགའ་ནས་མགོ་འཛིན་དགོས་སྙམ།

དང་པོ། བརྗོད་བྱ་མི་རྙེད་པའི་དཀའ་ངལ།

སློབ་ཆུང་སློབ་མ་ཞིག་ལ་མཚོན་ན་ཅི་ཞིག་འབྲི་བསམ་དུས། འབྲི་རྒྱུ་ཅི་ཡང་མི་རྙེད་པ་དེ་ལ་བརྗོད་བྱ་མི་རྙེད་པའི་དཀའ་ངལ་ཟེར། དཀའ་ངལ་དེ་སེལ་དགོས་ན་ངེས་པར་དུ་སློབ་ཆུང་སློབ་མར་ཆེད་དུ་བསྐྲུན་པའི་དུས་དེབ་དང་ཚགས་པར་ལ་ལྟ་ཀློག་མང་ཙམ་བྱེད་དགོས་པར་མ་ཟད། དམངས་ཁྲོད་ཀྱི་གླུ་དང་གཏམ་དཔེ། སྒྲུང་གཏམ་སོགས་འཚོལ་སྡུད་བྱེད་པའི་བྱ་འགུལ་ལ་ཞུགས་ཏེ། རང་ཉིད་ཀྱི་རྩོམ་འབྲིའི་ནུས་པ་མཐོར་འདེགས་སུ་གཏོང་བར་རྨང་གཞི་བརྟན་པོ་ཞིག་བསྐྲུན་དགོས། དམངས་ཁྲོད་རྩོམ་རིག་འཚོལ་སྡུད་བྱེད་པ་དེ་སློབ་ཆུང་སློབ་མ་ཞིག་ལ་མཚོན་ན་རྩོམ་རིག་གསར་རྩོམ་གྱི་གོམ་པ་དང་པོ་ཡིན། སློབ་མས་དམངས་ཁྲོད་རྩོམ་རིག་འཚོལ་སྡུད་བྱེད་པ་བརྒྱུད་དེ་རང་ཉིད་ཀྱི་ལྟ་རྒྱ་དང་ཐོས་རྒྱ་ཇེ་ཆེར་བཏང་ན། རྩོམ་རིག་གསར་རྩོམ་ཁྲོད་ཀྱི་བསམ་གཞིག་གི་ནུས་པ་འདོན་སྤེལ་བྱེད་པ་དང་མཉམ་དུ། དོན་དག་ཅི་ཞིག་ཚུལ་ཇི་ལྟར་དུ་འབྲི་རྒྱུ་ཡིན་པའི་བསམ་བློ་འཁོར་སྲིད་པས་བརྗོད་བྱ་མི་རྙེད་པའི་དཀའ་ངལ་ཡང་རིམ་བཞིན་སེལ་ཐུབ་པ་རེད།

གཉིས་པ། རྗོད་བྱེད་ཚིག་གི་དཀའ་ངལ།

སློབ་ཆུང་སློབ་མས་རྩོམ་ཡིག་འབྲི་དུས་སྐད་ཆ་ཅི་ཞིག་ཚུལ་ཇི་ལྟར་དུ་བཤད་པ་དང་། དོན་དག་དེ་ཡི་གེའི་ལམ་ནས་ཇི་ལྟར་འབྲི་བར་དུས་ཚོད་ཧ་ཅང་རིང་པོ་ཞིག་ལ་བསམ་བློ་གཏོང་དགོས་པ་རེད། སློབ་གྲོགས་འགའ་རེར་བརྗོད་བྱ་ཡོད་རུང་འབྲི་རྒྱུ་ཅི་ཡང་མི་རྙེད་པ་དེ་ལ་རྗོད་བྱེད་ཚིག་གི་དཀའ་ངལ་ཟེར། སློབ་ཆུང་སློབ་མར་མཚོན་ན་རྗོད་བྱེད་ཚིག་གི་དཀའ་ངལ་དེ་གཙོ་བོ་སྐད་ཆ་དང་ཡི་གེའི་སྟེང་ནས་འབྱུང་བ་རེད། དེ་བས་སློབ་མ་རྣམས་ཀྱིས་རྒྱུན་དུ་དུས་དེབ་དང་ཚགས་པར་སྟེང་གི་སྒྲུང་ཐུང་དང་ལྷུག་རྩོམ་སོགས་ཀྱི་རྗོད་བྱེད་ཚིག་གི་ཁྱད་ཆོས་དང་ཉམས་འགྱུར་ལ་སློབ་སྦྱོང་ནན་ཏན་བྱེད་དགོས་པར་མ་ཟད། རང་ཉིད་གནས་སའི་སྤྱི་ཚོགས་ཀྱི་ཁོར་ཡུག་ལ་དེ་བས་ཀྱང་མཉམ་འཇོག་བྱེད་དགོས། དེའི་རྒྱུ་མཚན་ནི། རྩོམ་རིག་ནི་སྤྱི་ཚོགས་ཀྱི་འཚོ་བའི་ཁྲོད་ནས་བྱུང་ཞིང་རྩོམ་རིག་གི་སྐད་ཆའང་མི་དམངས་མང་ཚོགས་ཀྱི་ཁ་ན་ཡོད་པས་སོ། །རྗོད་བྱེད་ཚིག་གི་དཀའ་ངལ་སེལ་བ་དེ་གཙོ་བོ་དོན་འདི་འདྲ་ཞིག་ལ་དགོངས་ནའང་། ད་དུང་བློ་སྒོ་འབྱེད་པའི་ཤེས་བྱ་གང་མང་ཞིག་སྤྱི་ཚོགས་ཀྱི་འཚོ་བའི་ཕྱོགས་དང་ཟུར་དུ་མར་འཐིམ་ཡོད་པ་ཤེས་དགོས་སོ།།

གསུམ་པ། སྒྲིག་གཞི་དོ་མི་མཉམ་པའི་དཀའ་ངལ།

སྒྲིག་གཞི་དོ་མི་མཉམ་པ་དེ་སློབ་ཆུང་སློབ་མ་ལ་ལ་ཞིག་ལ་མཚོན་ན་ཏག་ཏག་འཕྲད་སྲིད་པའི་རྩོམ་འབྲིའི་དཀའ་ངལ་གཞན་ཞིག་ཡིན། དེ་ནི་རང་ཉིད་ཀྱིས་དོན་ཅི་ཞིག་ཚུལ་ཇི་ལྟར་དུ་འབྲི་བ་དེ་རང་གི་བློ་ཁོག་ཏུ་མ་ཤོང་བའི་མངོན་རྟགས་ཤིག་རེད། དེ་བས་རང་གིས་དོན་ཅི་ཞིག་འབྲི་ཡང་དེ་ལ་དུས་ཡུན་རིང་བོ་ཞིག་གི་གྲ་སྒྲིག་དང་བློ་སྦྱོང་ཡོད་དགོས། ལྷག་པར་དུ་མགོ་ཇི་ལྟར་འཛུགས་པ་དང་རྒྱུན་ཇི་ལྟར་སྐྱོང་བ། མཇུག་ཇི་ལྟར་སྡུད་པ་སོགས་ཀྱི་གོ་རིམ་ཡིད་ལ་ངེས་དགོས་པར་མ་ཟད། གོ་རིམ་དེ་དག་གི་ནང་དུ་རང་གིས་དོན་ཅི་ཞིགུ་ཚུལ་ཇི་ལྟར་དུ་འབྲི་བའི་བསམ་བློ་དེ་གཏན་ནས་མ་འཆོལ་མ་ནོར་ན་སྒྲིག་གཞི་དོ་མི་མཉམ་པའི་དཀའ་ངལ་དེ་ཡང་རིམ་གྱིས་སེལ་ཐུབ་ངེས་ཡིན་ནོ།།

ཡོང་ཁུངས། མཚོ་སྔོན་མི་རིགས་དཔེ་སྐྲུན་ཁང་ནས་ཕྱོགས་བསྒྲིགས་བྱས་པའི་«རྩོམ་ཡིག་ལ་འཇུག་པའི་སྒོ་»ཞེས་པའི་དེབ་ལས་ཚན་བཤུས་བྱས།