མཁན་རིན་པོ་ཆེ་བཀྲ་ཤིས་ཚེ་རིང་མཆོག་གི་འཁྲུངས་སྐར་ལ་བཀྲ་ཤིས་བདེ་ལེགས་ཞུ།

རྩོམ་པ་པོ། གོ་འཇོ་བུ་ཆུང་།

རུས་ཀྱི་དྭངས་མ་གངས་རིའི་འདབས་ལ་ཟུག།

སྐུ་ཡི་མཚན་དཔེ་ནུབ་རིའི་ལྗོངས་སུ་བཞད།།

མཁྱེན་བརྩེའི་གཤོག་ཟུང་རྣམ་གྲོལ་གླིང་ནས་རྒྱས།།

དྲིན་ལྡན་གཤེས་གཉེན་མཆོག་ལ་གུས་ཕྱག་འཚལ།།

རྨད་བྱུང་བསླབ་གསུམ་ནོར་གྱི་མཛོད་འཆང་ཞིང་།།

དམར་སེར་ངུར་སྨྲིག་རྒྱལ་མཚན་གྱིས་བརྗིད་པའི།།

འདྲེན་པ་མཆོག་གི་འཁྲུངས་སྐར་དུས་བཟང་ལ།།

འགྱུར་མེད་སྙིང་སྟོབས་བཙན་པོའི་ཐུགས་བསྐྱེད་ལ།།

 

ཐབས་མཁས་ཕྲིན་ལས་སྟོང་གི་འོད་སྣང་ཅན།།

བསྟན་འགྲོའི་དོན་ཆེན་སྒྲུབ་ལ་ཆས་པ་ནི།།

ངང་དཀར་རྒྱ་མཚོའི་ངོགས་སུ་འཇུག་དང་མཚུངས།།

སྐྱབས་རྗེ་གྲུབ་དབང་པདྨ་ནོར་བུ་མཁྱེན།།

ཐོས་བསམ་སྒོམ་པའི་ཡོན་ཏན་ཕུལ་བྱུང་ཞིང་།།

བསྟན་ལ་སྨན་པའི་མཛད་བཟང་བསམ་ཡས་ལ།།

ཁྱད་པར་ཉམ་ཆུང་སློབ་ཕྲུག་སྟོང་ཉེ་བར།།

ཕྱི་ནང་ཤེས་ཡོན་ནོར་གྱིས་ཕྱུག་པར་མཛད།།

 

དུས་མཐའི་རླུང་ནག་འཚུབ་མའི་མུན་ཁྲོད་ནས།།

འདུལ་བསྟན་སྣུམ་ཟད་མར་མེའི་རྗེས་ཕྱོགས་དུས།།

བཅས་རང་ཉེས་པའི་ཚོགས་ལས་ཡོངས་གྲོལ་བའི།།

འདུལ་འཛིན་བཤེས་གཉེན་ཁྱེད་འདྲ་བསྟན་པའི་རྒྱན།།

བསླབ་གསུམ་ནོར་བུའི་ཏོག་གིས་མངོན་མཐོ་ཞིང་།།

རྣམ་གསུམ་ངུར་སྨྲིག་རྒྱལ་མཚན་གྱིས་བརྗིད་བཞིན།།

རྒྱལ་བསྟན་བླ་རུ་འདེགས་པའི་དེད་དཔོན་དུ།།

གང་སྐུ་བསྐལ་པ་རྒྱ་མཚོར་བཞུགས་གསོལ་འདེབས།།

མདོ་སྔགས་སྟོང་ཆེན་དགའ་མའི་ཁྱོན་ཡངས་སུ།།

ལུང་རྟོགས་བསྟན་པའི་གྲུ་ཆར་འཇོ་བཞིན་དུ།།

ཟབ་དོན་དབྱངས་སུ་འགུགས་མཁས་རྔ་གསང་དབང་།།

གང་གསུང་ཚངས་དབྱངས་དྲུག་ཅུའི་དཔལ་དུ་བཞུགས།།

ཀ་ལྷུན་དབྱེར་མེད་ཐེག་མཆོག་ལྟ་བའི་དཔྱིད།།

ཟུང་འཇུག་མཉམ་སྦྱོར་བདེ་ཆེན་ཆོས་སྐུའི་མཁར།།

གང་ཐུགས་འཕོ་མེད་རྟག་པའི་རྒྱན་བཞུགས་ཏེ།།

མཐའ་ཡས་བསྟན་འགྲོའི་དོན་ཆེན་ལྷུན་འགྲུབ་ཤོག།

ཅེས་སྔ་འགྱུར་མཐོ་སློབ་མདོ་སྔགས་རིག་པའི་འབྱུང་གནས་གླིང་གི ལོ་རིམ་དགུ་པའི་སློབ་ཚན་ཕལ་ཆེར་གྱི་བཀའ་ཁྲིད་ཞིབ་རྒྱས་ནོད་སའི་དགེ་བའི་བཤེས་གཉེན་བཀའ་དྲིན་ཅན། མཁན་རིན་པོ་ཆེ་བཀྲ་ཤིས་ཚེ་རིང་མཆོག་གི་སྐུའི་འཁྲུངས་སྐར་ལ། ཚིགས་སུ་བཅད་པ་བཀྲ་ཤིས་རྟགས་བརྒྱད་ཀྱི་གྲངས་ལྡན་འདི་ཉིད། གདན་ས་ཆེན་པོ་རྣམ་གྲོལ་གླིང་གི་གྲལ་མཐར་སོན་པའི་སྐལ་བཟང་ཐོབ་པ་བཀྲ་ཤིས་ཚེ་བརྟན་དུ་འབོད་པས། བོད་རྒྱལ་ལོ་ ༢༡༤༧ བོད་ཟླ་ ༦ ཚེས་ ༤ ཆོས་འཁོར་དུས་ཆེན་ཉིན་གུས་ཕུལ། བཀྲ་ཤིས་བདེ་ལེགས།