 |
| མཛད་པ་པོ། དོལ་པོ་བླ་མ་ཤཱཀྱ་རིན་པོ་ཆེ། |
༄༅། །རྙིང་མའི་ཐུན་མོང་མ་ཡིན་པ་གཞན་དུ་གྲགས་མ་མྱོང་བའི་རྫོགས་ཆེན་སྟོན་པ་བཅུ་གཉིས་ཀྱི་སྒོ་ནས་བཀྲ་ཤིས་སྤེལ་ཚིག་ནི། དེ་ཡང་དོལ་པོ་ཤཱཀྱར་འབོད་པའི་བླ་དྭགས་མིང་ཅན་ནས་ཐོག་མར་ཡེ་གཞི་གདོད་མའི་གཤིས་ཀློང་ནས་རང་བྱུང་རང་ཤར་ཆེན་པོའི་རང་ངོའི་འདུག་ཚུགས་མ་ཤོར་བའི་ངང་ནས། གུ་རུ་པདྨའི་སྐུ་འཁྲུངས་ཚེས་བཟང་པོ་སྤྲེལ་ཟླའི་ཚེས་བཅུ་ཆེན་མོ་ལ་ལེགས་སྐྱེས་ཀྱི་ཚུལ་དུ་བདེ་ལེགས་ཞུ་ཚིག་རྫོགས་པ་ཆེན་པོའི་སྤྲུལ་སྐུ་སྟོན་པ་བཅུ་གཉིས་ཀྱི་མཚན་དོན་དང་སྦྱར་ནས་དེ་རིང་གི་ཚེས་བཅུ་ལ་བཀྲ་ཤིས་བདེ་ལེགས་ཞུ་བ་ནི།
ཀ༽
ཨ།
ནང་གསལ་གཞོན་ནུ་བུམ་སྐུའི་ཞིང་ཁམས་ན།།
ངོ་བོ་རང་བཞིན་ཐུགས་རྗེའི་བདག་ཉིད་ཅན།།
ཁྱད་ཆོས་དྲུག་ལྡན་དབྱིངས་སུ་སངས་རྒྱས་པ།།
ཆོས་སྐུ་ཀུན་བཟང་ཡབ་ཡུམ་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་སྩོལ།།
ཁ༽
ལྷུན་གྲུབ་ངེས་པ་ལྔ་ལྡན་ཞིང་ཁམས་ན།།
མཚན་རྫོགས་དཔེ་བྱད་ཡོན་ཏན་འབར་བའི་དཔྱིད།།
ཁ་སྦྱར་བདེ་ཆེན་ཡན་ལག་བདུན་གྱི་དངོས།།
ལོངས་སྐུ་རིགས་ལྔའི་སངས་རྒྱས་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་སྩོལ།།
ག༽
རིགས་བརྒྱ་རིགས་ལྔ་གསང་ཆེན་རྡོ་རྗེ་འཛིན།།
རྒྱལ་ཀུན་ཐུགས་མཆོག་ཡེ་ཤེས་སྙིང་པོ་ཅན།།
འབུམ་ཕྲག་དྲུག་ཅུའི་བཀའ་ཡི་བསྡུ་བ་མཛད།།
སྤྲལ་སྐུ་རྡོ་རྗེ་སེམས་དཔའི་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་སྩོལ།།
ང༽
དགའ་ལྡན་བརྩེགས་པར་ཚེ་ལོ་དཔག་མེད་དུས།།
རང་སྣང་སྤྲུལ་པའི་སངས་རྒྱས་སྟོང་རྩ་ལ།།
ཐལ་འགྱུར་རྩ་རྒྱུད་ཆོས་ཀྱི་འཁོར་ལོ་བསྐོར།།
ཁྱེའུ་སྣང་བ་དམ་པའི་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་སྩོལ།།
ཅ༽
མི་མཇེད་འཇིག་རྟེན་ཚེ་ལོ་བྱེ་བའི་དུས།།
མཁའ་འགྲོའི་འཁོར་ལ་བསྟན་པ་སྐུ་གསུང་ཐུགས།།
ཡོན་ཏན་ཕྲིན་ལས་རྒྱུད་ཀྱི་ཆོས་འཁོར་བསྐོར།།
སྟོན་པ་འོད་མི་འཁྲུགས་པའི་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་སྩོལ།།
ཆ༽
དྲོད་གཤེར་འདུས་པར་ཚེ་ལོ་འབུམ་པའི་དུས།།
སེམས་དཔའི་འཁོར་ལ་རྒྱུད་གསུམ་གསང་བ་ཆེ།།
ཟུར་ཕུད་གསུམ་པའི་སྐད་ཀྱིས་ཆོས་འཁོར་བསྐོར།།
སྟོན་པ་འཇམ་དཔལ་འཇིགས་སྐྱོབས་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་སྩོལ།།
ཇ༽
ཆགས་འབྱུང་མངལ་སྣང་ཚེ་ལོ་བརྒྱད་ཁྲིའི་དུས།།
གནོད་སྦྱིན་འཁོར་ལ་བསྟན་པ་རྒྱུད་ལྔ་དང་།།
ཡན་ལག་རྒྱུད་དྲུག་ཆོས་སྟོན་གཞོན་ནུ་རོལ།།
རྣམ་པར་བརྩེ་བ་སྟོན་པའི་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་སྩོལ།།
ཉ༽
འཚོ་བྱེད་ལྡུམ་རར་ཚེ་ལོ་བདུན་ཁྲིའི་དུས།།
རབ་བདུན་འཁོར་ལ་ཕར་ཕྱིན་དྲུག་ལ་སོགས།།
ཞི་བ་བསིལ་བའི་ཆོས་ཆར་འབེབས་མཛད་པ།།
དྲུག་པ་རྡོ་རྗེ་འཆང་ཆེན་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་སྩོལ།།
ཏ༽
མེ་རི་འབར་བར་ཚེ་ལོ་དྲུག་ཁྲིའི་དུས།།
སྤྲིན་གྱི་ཤུག་འཆང་སེམས་དཔའི་འཁོར་རྣམས་ལ།།
ཕ་མ་བླ་མེད་རྒྱུད་ཀྱི་ཆོས་སྟོན་པ།།
གཞོན་ནུ་དཔའ་བོ་སྟོབས་ལྡན་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་སྩོལ།།
ཐ༽
རུ་ལུའི་སྒྲ་ལྡན་ཚེ་ལོ་ཁྲི་པའི་དུས།།
སྲིན་པོའི་རིག་འཛིན་བྱེ་བ་ཕྲག་གཅིག་ལ།།
རགས་པ་འདུལ་བའི་བརྒྱད་བཅུའི་ཆོས་འཁོར་བསྐོར།།
དྲང་སྲོང་ཁྲོས་པའི་རྒྱལ་པོའི་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་སྩོལ།།
ད༽
བྱ་རྒོད་ཕུང་པོར་ཚེ་ལོ་ལྔ་སྟོང་དུས།།
རྫུ་འཕྲུལ་ལྡན་པའི་ཉན་ཐོས་འཁོར་རྣམས་ལ།།
དམ་ཆོས་འདུལ་བ་དཔག་ཏུ་མེད་པ་གསུངས།།
དགྲ་བཅོམ་གསེར་འོད་དམ་པའི་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་སྩོལ།།
ན༽
གཡུ་ཡི་སྨིན་གནས་ཚེ་ལོ་སྟོང་གི་དུས།།
སར་གནས་འཁོར་ལ་འཕྲ་རྒྱུད་བདུན་ལ་སོགས།།
ཟབ་པ་ཞི་བའི་ཆོས་ཀྱིས་ཚིམ་མཛད་པ།།
བརྩེ་བ་རོལ་པའི་བློ་གྲོས་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་སྩོལ།།
པ༽
བྱ་རྒོད་སྤུངས་པོར་ཚེ་ལོ་ལྔ་བརྒྱའི་དུས།།
ཁམས་གསུམ་དགྲ་བཅོམ་འཕགས་པའི་འཁོར་རྣམས་ལ།།
མདོ་སྔགས་ཟུང་འཇུག་ཆོས་ཀྱི་འཁོར་ལོ་བསྐོར།།
སྟོན་པ་འོད་སྲུང་བགྲེས་པོའི་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་སྩོལ།།
ཕ༽
བྱང་ཆུབ་འབྱུང་བར་ཚེ་ལོ་སུམ་བརྒྱའི་དུས།།
རིགས་གསུམ་མགོན་པོ་སྤྲུལ་པའི་འཁོར་ཚོགས་ལ།།
ངེས་པ་དོན་གྱི་སྙིང་པོ་ཆོས་ཆར་འབེབས།།
སྟོན་པ་མངོན་རྫོགས་རྒྱལ་པོའི་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་སྩོལ།།
བ༽
ཟས་སྦྱིན་ར་བར་ཚེ་ལོ་བརྒྱ་བའི་དུས།།
རྣམ་བཞི་འཁོར་ལ་བདེན་བཞིའི་ཆོས་འཁོར་བསྐོར།།
འགྲོ་རྣམས་ཡང་དག་ལམ་དུ་དྲངས་མཛད་པ།།
སྟོན་པ་ཤཱཀྱ་ཐུབ་པའི་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་སྩོལ།།
མ༽
འཛམ་གླིང་ནུབ་ཕྱོགས་ཨོ་རྒྱན་རྒྱལ་ཁབ་ནང་།།
སིནྡྷུ་རྒྱ་མཚོར་རོལ་ས་འཇོག་པོའི་སྟེང་།།
དྲི་མེད་པདྨར་རྫུ་འཕྲུལ་བཀོད་པས་འཁྲུངས།།
སྤྲེལ་ཟླའི་ཚེས་བཅུའི་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་སྩོལ།།
ཙ༽
རྔ་ཡབ་དཔལ་རི་པདྨ་འོད་གླིང་གི།
རིང་ལུགས་འཛིན་པ་གཙོར་སྟོན་འཛམ་གླིང་འདིར།།
ལེགས་དགུ་སྤྱད་སྤེལ་ཕན་བདེའི་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་སྩོལ།།
ཚ༽
བསྟན་དང་བསྟན་འཛིན་གང་ན་སུ་བཞུགས་པ།།
སངས་རྒྱས་ཆོས་དང་གཞན་ཡང་རིས་མེད་པའི།
བཟང་པོར་སྤྱད་མཛད་ཀུན་གྱི་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་སྩོལ།།
ཛ༽
བཀྲ་ཤིས་དཔལ་གྱི་ས་གསུམ་ཀུན་ཁྱབ་ཕྱིར།།
མཚམས་འདྲིའི་སྐྱེལ་བཟང་རྫོགས་ཆེན་སྟོན་པའི་གཏམ།།
ཐེག་མཆོག་མཛོད་ནས་ཚིག་སྒྱུར་ལེགས་བཀྲམ་བཀྲ་ཤིས་གང་ལགས་པ།།
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག། །།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།