རྩོམ་པ་པོ། དོལ་པོ་ལྷོ་རི་བ་ཀརྨ་དབང་རྒྱལ།
࿑ ཨ་ཧོ།
གདོད་ནས་འབྲལ་མེད་གནས་ལུགས་དོན་གྱི་སྐུ།།
མ་འགག་རོལ་བའི་གསུང་དབྱངས་ལྷང་ངེ་བ།།
ཆོས་ཉིད་དྲན་པ་རིག་སྟོང་རྒྱ་མཚོའི་ནང་།།
རང་བྱུང་ལྷུན་གྲུབ་པདྨ་རྒྱལ་པོ་འཁྲུངས།།
ཀྱེ་ཧོ་སྣང་བའི་ཆོས་ལ་ཕར་བལྟས་པས།།
ཡོད་ཡོད་ཡིན་ཡིན་སྣང་ཡང་རྨི་ལམ་འདྲ།།
སྣ་ཚོགས་འགྲོ་བའི་རྒྱུད་ཀྱི་ཀུན་རྟོག་ནི།།
བྱིས་པའི་རྩེད་མོ་བཞིན་དུ་གཏད་སོ་བྲལ།།
འགའ་ཞིག་འཁོར་བའི་གནས་ནི་འཇིགས་སོ་ལོ།།
འགའ་ཞིག་དག་པའི་ཞིང་ལ་འགྲོ་དགོས་ཟེར།།
འགའ་ཞིག་ལྷ་དང་བླ་མས་སྐྱོབ་ཅེས་གྲག།
བདག་ནི་རང་བྱུང་དྲན་པའི་ངོ་ལ་ལྟ།།
ཤ་ཁྲག་རུས་གསུམ་འདུས་པ་ཕུང་པོའི་ནང་།།
རྩ་ཐིག་རླུང་གསུམ་སྒྱུ་མའི་ཟློས་གར་འཁྲབ།།
དེ་ལ་རྟེན་པའི་མེད་སྣང་རྟོག་ཚོགས་ཀྱིས།།
རང་བྱུང་དྲན་པའི་བུ་ཆུང་བསླུ་ཉེན་གདའ།།
དངོས་མེད་ནམ་མཁའི་ཀློང་ན་ཞིང་ཁམས་དང་།།
མི་བརྟན་འབྱུང་བཞིའི་དཀྱིལ་ནས་སྙིང་པོ་ཞིག།
འཚོལ་ལ་བྲེལ་བའི་གྲུབ་མཐའི་བློ་ཅན་དང་།།
སོ་སྐྱེས་འགྲོ་བ་འདི་རྣམས་སྙིང་རེ་རྗེ།།
ཚོགས་དྲུག་ཡུལ་དང་རྣམ་ཤེས་དྲུག་པོ་ཡི།།
བར་ནས་འགྲོ་དྲུག་འཁྲུལ་བའི་གནད་འགག་དེ།།
རང་བྱུང་དྲན་པ་རང་ངོ་མ་ཤེས་ཕྱིར།།
སྐྱབས་གནས་དམ་པ་དྲན་པའི་རྒྱལ་པོར་འདུད།།
འདུ་བྱེད་དྲན་པས་རང་གིས་རང་ལ་ལྟོས།།
ཅི་དྲན་ཅི་འདྲ་ཡང་ཡང་བྱ་ར་གྱིས།།
ཇི་ཙམ་རྩོལ་བས་དྲན་པ་བསྟེན་འགྱུར་ན།།
ཆོས་ཉིད་དོན་གྱི་དྲན་པ་ཤུགས་ལ་འཆར།།
མི་ལུས་རིན་ཆེན་ཐོབ་པའི་དོན་གོ་རུ།།
དགེ་སྒྲུབ་སྡིག་སྤོང་ངོ་ལྐོག་བྲལ་བ་ཡི།།
ཉམས་ལེན་རྟག་ཏུ་དྲན་པས་སྐྱོང་ནུས་ན།།
མེ་སྣང་འཁྲུལ་བའི་གནས་ལ་འཁྱམས་མི་སྲིད།།
རང་བཞིན་མེད་པ་སྒྱུ་ལུས་ཕུང་པོ་ནས།།
ངོས་ཟུང་བྲལ་བའི་རྣམ་ཤེས་དགྱེས་ངེས་པ།།
རྟག་ཏུ་དྲན་པའི་དཀྱིལ་དུ་འཛིན་ནུས་ན།།
ཆོས་ཉིད་སྟོང་པའི་དོན་ལ་ཉེ་བར་འགྱུར།།
བསླུ་མེད་རྟེན་འབྲེལ་སྣང་བའི་འཇིག་རྟེན་འདིར།།
འགག་མེད་སྒྱུ་མའི་འཁོར་ལོ་འཁོར་ངེས་པ།།
ལེགས་པར་གོ་ནས་དྲན་ཤེས་བརྟན་པོ་ཡིས།།
འཚེ་བ་མེད་པའི་འཚོ་བ་བསྟེན་པ་གཅེས།།
བདག་བདེ་འདོད་དང་སྡུག་བསྔལ་མི་འདོད་བཞིན།།
ལུས་ཅན་ཀུན་ལ་བྱམས་བརྩེའི་ཏིང་ངེ་འཛིན།།
ཉིན་མཚན་དུས་དྲུག་དྲན་པས་སྒོམ་འགྱུར་ན།།
ཐར་བ་ཆེན་པོ་སེམས་ཉིད་ངང་ལ་ཡོད།།
ལྷ་སྔགས་ཏིང་འཛིན་སྤྲོས་བཅས་ཉམས་ལེན་ཀུན།།
དག་མཉམ་ཆོས་སྐུ་རྫོགས་པའི་རིམ་པ་ལ།།
མེད་ཐབས་མེད་པ་ཏིང་འཛིན་རྡོ་རྗེ་ཡི།
སྲོག་ལྟར་དྲན་པ་འདི་ལ་རྒྱུན་སྐྱོང་གཅེས།།
འདུ་བྱེད་དྲན་པས་དང་པོ་ཀུན་རྟོག་རྣམས།།
རབ་ཏུ་གཅུན་ཞིང་རྩེ་གཅིག་ངང་ལ་ཞོག།
བཟང་རྟོག་ངན་རྟོག་ཅི་འདྲ་ལྷགས་འགྱུར་ཀྱང་།།
མེ་སྣང་སྒྱུ་མར་དྲན་ཙམ་ངང་ལ་ཞོག།
བཟང་རྟོག་འཕྲོ་འཐུད་མི་དགོས་ངོ་ཤེས་པའི།།
དྲན་པ་ཙམ་གྱི་ངང་ལ་ལྷོད་དེ་སྡོད།།
ངན་རྟོག་སྤོང་བའི་ངལ་རྩོལ་མི་བྱེད་པར།།
ངོ་ཤེས་དྲན་པ་ཙམ་གྱིས་ཞི་བར་ངེས།།
འདུ་བྱེད་དྲན་པ་འཁྲུལ་རྟོག་མགོ་ལ་རྒྱོབ།།
ཆོས་ཉིད་དྲན་པས་སེམས་ཉིད་ངལ་གསོ་གྱིས།།
དྲན་པ་རྣམ་གཉིས་རེ་མོས་ངང་ལ་བསྟེན།།
རྩལ་ཆེན་རྫོགས་ཚེ་ཆོས་ཉིད་དྲན་པས་ཆོག།
རིག་སྟོང་རྗེ་བཙུན་མཚོ་སྐྱེས་རྡོ་རྗེ་དང་།།
འགག་མེད་སྒྱུ་འཕྲུལ་རོལ་བ་རིག་འཛིན་ཚོགས།།
འབྲལ་མེད་གནས་ལུགས་དོན་གྱི་དྲན་པའི་ངང་།།
དབྱེར་མེད་ངོ་བོ་གཅིག་ཏུ་ལྷུན་གྱིས་གྲུབ།།
དྲན་པས་སེམས་ཀྱི་མེ་ལོང་ངོས་ལ་ལྟོས།།
དྲན་པས་འཁྲུལ་སྣང་གཟུགས་ལ་དཔྱད་པ་ཐོངས།།
དྲན་པས་རང་བཞིན་རྩལ་བྲལ་རྟོགས་པར་གྱིས།།
རྟག་ཏུ་དྲན་པའི་ངང་དུ་མཉམ་པར་ཞོག།
ཅེས་ཧོར་ཟླ་དྲུག་པའི་ཚེས་བཅུའི་ཉིན་ལྷོ་རི་བ་ཀརྨ་དབང་རྒྱལ་༼མི་གནས་རང་བྱུང་༽གིས་རང་ཉམས་དང་སྦྱར་ནས་གླུ་འདི་ནུབ་ཧྥ་རན་སིའི་གྲོང་ཁྱེར་ཆེན་པོ་ཕེ་རི་སིར་
29/07/2020 ཉམས་གྱིས་བླངས་པའོ།།
ཡོང་ཁུངས། ངོ་དེབ་ནང་གི་«དོལ་པོའི་རང་དབང་གླེང་སྟེགས་»ཚོམས།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།