རྩོམ་པ་པོ། གངས་སེང་དཀར་མོ།
ཉི་ཟླ་སྐར་གསུམ་གཅིག་ཏུ་བསྡུས་པའི་གཟུགས།།
ཞི་བསིལ་བདུད་རྩིའི་རྒྱ་མཚོ་འཁྱིལ་བ་ཡི།།
ཕན་བདེའི་རྩ་ལག་ཆོས་ཀྱི་གདུགས་དཀར་ཅན།།
ཆུང་ཆུང་བྱིས་པའི་དུས་ནས་བརྩེ་ཞིང་བྱམས།།
ངང་ཆུང་མདའ་ཡིས་ཟིན་པ་དེ་ཡང་བསྐྱབས།།
ཞབས་པད་འཁོར་ལོས་མཚོན་པའི་རི་མོ་དེས།།
འཁྲུངས་མ་ཐག་ནས་གྲགས་པ་མངོན་དུ་རྒྱས།།
ས་འཚོ་བུ་མོའི་སྙིང་གི་ཐིག་ལེར་གྱུར།།
གཞོན་ནུའི་ཁྲོད་ན་འགྲན་པའི་ཟླ་མེད་དོ།།
སེར་སྐྱའི་གྲོང་གི་ཨུ་དམ་ཝ་ར་བཞིན།།
དྲང་སྲོང་ཚོས་ཀྱང་སྤྱི་བོའི་གཙུག་གིས་མཆོད།།
རྒྱལ་སྲིད་ལོངས་སྤྱོད་མཆིལ་མ་བཞིན་དུ་དོར།།
དབེན་པའི་ནགས་སུ་ཞི་བའི་ལམ་ཞིག་བཙལ།།
བདེན་བཞིའི་ཆོས་ཀྱི་སྒྲ་ཆེན་ཀུན་ཏུ་བསྒྲགས།།
གསེར་མདོག་ཅན་པའི་ཡོན་ཏན་སྲིད་འདིར་སྙན།།
ལྷས་བྱིན་བདུད་ཀྱི་སྒྱོགས་རྡོས་ཅང་མ་གནོད།།
མུ་སྟེགས་ཚོགས་ཀྱིས་ཀྱང་ནི་གླགས་མ་རྙེད།།
ཕྱག་ན་མཚོན་དང་རྒྱབ་ན་དཔུང་མེད་པར།།
བདུད་ཀྱི་འཇིགས་པ་ལས་ཀྱང་ཐར་པར་གྱུར།།
ཞབས་ལ་ལྷམ་ཡང་མེད་པའི་སློང་མོའི་ཚུལ།།
འདོད་ཆུང་ཆོག་ཤེས་ཉིད་ལས་ངོམ་མ་གྱུར།།
ཆགས་པའི་ཟུར་མིག་གིས་ཀྱང་མ་ཐུབ་པའི།།
རྡོ་རྗེ་གདན་གྱི་སྟོན་པ་ཁྱེད་གཅིག་ཙམ།།
དཀའ་ཐུབ་དང་ནི་བསམ་གཏན་ཁོ་ན་ཡིས།།
གྲོལ་བར་མ་གཟིགས་ཤེས་རབ་དོན་ལ་བྱོན།།
ཟབ་ཞི་རྡུལ་བྲལ་འོད་གསལ་ཆོས་ཀྱི་དབྱིངས།།
མངོན་དུ་མཛད་པས་ས་ཡང་དྲུག་ཏུ་གཡོས།།
གཞན་གྱི་ལུགས་ལ་སྡང་ཟུག་མ་ཡིན་ཡང་།།
རྟེན་འབྱུང་གཏམ་གྱི་སྒོ་ཆེན་ཁྱེད་ཀྱིས་ཕྱེས།།
མཐུ་དང་རྫུ་འཕྲུལ་ཅི་ཡང་མ་བསྟན་པར།།
བཀའ་གསུང་གསེར་དུ་གྱུར་པ་འདི་རེ་རྨད།།
རིགས་མེད་རིས་མེད་འགྲོ་བའི་དོན་མཛད་པའི།།
སྟོན་པ་དེ་ཡང་ཁྱེད་ལས་གཞན་མ་མཆིས།།
ཆོས་གོས་སེར་པོའི་འོད་ཟེར་འདི་གཅིག་ཀྱང་།།
འཇིག་རྟེན་འདི་ན་ད་དུང་འོད་དུ་འབར།།
རྩོམ་ཁུངས། རྩོམ་པ་པོའི་ངོ་དེབ་དྲྭ་བ།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།