འཇིགས་བྱེད་ནག་མོ་ཁྲག་འཛག་མའི་མངོན་རྟོགས།

རྩོམ་པ་པོ། དོལ་པོ་བླ་མ་ཤཱཀྱ་རྒྱལ་མཚན།

༈ རྟོགས་ན་ལྷན་སྐྱེས་གཤིས་ཀྱི་མ། །

མ་རྟོགས་བདག་འཛིན་རུ་ཏྲའི་རྒྱུ། །

འཆོལ་ན་མི་ཡང་ཟ་བར་བྱེད། །

དུག་གསུམ་འབར་འཇིགས་ཁྲོ་གཏུམ་མ། །

འཇིགས་བྱེད་འདས་དུས་སྔོན་དུ་བྱུང་། །

རང་ངོ་ཡིན་པར་མ་ཤེས་ན། །

སྟོང་གསུམ་ཟ་ཞིང་སྲིད་གསུམ་འཐུང་། །

ཕུང་བྱེད་ནག་མོ་གཤེགས་བཞུགས་མཆོད། ། 

ནག་མོ་ཁྲག་འཛག་མ་ལ་བསྟོད། །

གདོད་མའི་བྲམ་ཟེའི་ཆོས་ལུགས་ལས། །

ལྷ་དང་ལྷ་མིན་གཡུལ་འགྱེད་སྒྲུང་། །

སྟོན་པས་གཤིས་དང་སྦྱར་བའི་གནད། །

ལྟ་བའི་ཀློང་ནས་ཁྱད་ཤེས་བྱ། །

ཡེ་ནས་རང་དང་འདུ་འབྲལ་མེད། །

གོལ་ཤོར་ནོར་བློའི་ངོ་ལོག་ལས། །

མ་རྒན་ཁྲོས་ཚུལ་དེ་ནས་བྱུང་། །

དེ་ཕྱིར་ཁྲོས་མ་ནག་མོ་ཟེར། །

ལོག་ལྟ་ཅན་ངོར་སྟོང་གསུམ་ཕུང་། །

ཡང་དག་ལྟ་རྣམས་བདག་འཛིན་འཇིག །

འཇིགས་བྱེད་སྲིན་མོ་མི་ཟད་མ། །

སྔགས་ཀྱི་འབྱུང་ཁུངས་ཁྱོད་ལས་ཅི། །

གཤིས་ངོའི་མ་རྒན་ཁྱོད་ལས་སུ། །

གཉིས་འཛིན་འཁྲུལ་ཚོགས་རུ་ཏྲ་རྣམས། །

ཞལ་དུ་བསྟབ་བོ་ཁ་རམ་ཁ་ཧི། །

ཨ་མ་ཨ་མ་དགྲ་བོའི་དགྲ། །

བུ་ལ་ཁྲོས་མ་དྲིན་ཁྲོས་སོ། །

དོལ་ཤཱཀ་གྲོལ་དུས་བབས་སམ་ཀྱེ། །

ཧ་ཧ་ཨ་ལ་ལ་ཧོ་མཚར། །

༈ གཤིས་མ་ཁྲོས་ནས་འཁྲུལ་བུ་གསོད། །

ཕྱི་ནང་དབྱེ་ལྟ་ཕོ་རབ་ལག །

འདི་ལས་ལྷག་པའི་དགོངས་གསང་མེད། །

དུག་སྦྲུལ་སྨྱུག་འཛུལ་འདི་ལས་ཅི། །

ཡར་མར་དབྱེ་དུས་ལམ་འདི་མཆོག །

༈ ཐོལ་བྱུང་བློ་རྡེག་ཕཊ་གཅིག་རྒྱབ། །

དྲག་ལ་ངར་ཐུང་ཨེ་མ་ཧོ། །

ཅི་ཡང་མ་ཡིན་ཧད་དེ་བ། །

ཧད་དེ་བ་ལ་ཟང་ཐལ་ལེ། །

ཟང་མ་ཐལ་བྱུང་རྗོད་དུ་མེད། །

འདིའི་དོན་ཤེས་ན་ཨ་མས་ཟ་མི་དགོས། ཧ་ཧ་ཧ་ཧ་ཧ།

༈ མ་རིག་འགྲོ་རྣམས་མ་ལས་སྐྱེས་སོ་ལོ། །

རིག་པའི་རིག་འཛིན་མ་ཡིས་ཟ་བར་ཤོག །

བྲམ་ཟེས་མ་ཡིས་བཟས་ན་ངན་སོང་ཟེར། །

གོའུ་ཏམ་ལུགས་མས་བཟས་ན་ཐར་པར་བཤད། །

དོན་དུ་ཞལ་བསྟབ་ཚུལ་སྟོན་དགོངས་པ་གཅིག །

གནས་ལུགས་ཡང་དག་སུ་ཡིན་ངས་མ་ཤེས། །

སྨྲོས་ལ་བོར།   

ཡོང་ཁུངས། དོལ་པོ་བདེ་དོན་ལྷན་ཚོགས་ཀྱི་འཕྲིན་ཚོམས།