ཤར་ཟླ་ནག་པོ།
མེ་ཏོག་ཐང་ལ་བབས་པའི་དེ་རིང་སྟེ།།
སེམས་པ་རྒྱང་ལ་གཏད་པ་ལན་གཅིག་མིན།།
རྣམ་ཤེས་ཤར་ལ་ལྡས་པའི་ཁ་སང་ཡང་།།
ཁྱོད་རང་ཆང་གིས་བཟིས་པའི་སྙན་ངག་སྟེ།།
ང་ཉིད་དེ་ལ་ཡན་པའི་སེམས་པ་ཞིག།
གང་ཞིག་ཤར་ལ་རྒྱུ་བ་མཐོང་ན་ཡང་།།
མིག་ཆུ་རེ་རེ་སེམས་ཀྱི་བར་ནས་མཆེད།།
ཐག་རིང་ཐག་རིང་ཡིན་པའི་ཤར་ཟླ་ཁྱོད།།
ང་ཡི་སེམས་པ་ནང་ན་ཉེ་ཤོས་ཡིན།།
འོན་ཀྱང་ཁྱོད་ཀྱི་འདོད་པ་གང་ཞིག་གིས།།
ང་ཡི་སེམས་པ་ཚིག་པ་ཤེས་ཡོད་དམ།།
ཚོར་སྣང་རི་མོར་བཀོད་དེ་བཤད་པ་དག།
ཆུ་ལ་རི་མོ་བྲིས་པའི་དཔེ་རུ་གྱུར།།
རྒྱ་ལ་ཤར་ཟླ་ང་ལ་དགའ་སྲིད་ན།།
ད་ཆ་ང་ཡང་ཁྱི་ཞིག་ཡིན་མདོག་མེད།།
ཕན་ཐོགས་མེད་པའི་སེམས་སྡུག་མྱོང་བ་འདི།།
ང་ལ་བསམས་ན་སེམས་ནད་གསར་པ་ཞིག།
༢༩།༠༨།༢༠༢༠།
ར་བཟི་བའི་ང་།
སྙིང་གཏམ་བཤད།ཝུ་ཆང་འཐུངས།ད་དུང་འཐུངས།སུ་ཞིག་དྲན་ནས་འཐུངས།སུ་ཞིག་བརྗེད་པར་འདོད་ནས་འཐུངས།ད་གཟོད།ང་ར་བཟི་སོང་།ར་བཟི་བའི་རྗེས་སུ།ཞེད་སྣང་ལང་བྱུང་།སེམས་པ་སྐྱོ་བྱུང་།མིག་ཆུ་ཤོར་བྱུང་།ལྷིང་འཇགས་པའི་འཁོར་ཡུག་དེ་ནས།ངོ་གདོང་རླུང་ལ་གཏད།གྲང་ངར་ཆེ་བའི་རླུང་བུ་དེ་ཚོས།ང་ཡི་ངོ་གདོང་ལ་རེད་ནས་ཕྱིན་སོང་།ད་དུང་ཡང་བཟི་དངས་མ་སོང་།གློག་ཁང་ཕྱོགས་སུ་རྒྱུ་བའི་ཆུ་མོ།སྲང་ལམ་གྱི་ལྕང་ལོ་སྐམ་པོ།དེ་དག་ཀྱང་ང་དང་མཚུངས།རང་དབང་མི་འདུགགྲོགས་པོ་མི་འདུགགང་ལྟར་ང་བཟི་ཡོད།ད་དུང་བཟི་ཡོད།གྲོགས་པོ་ཚོ་དགའ་སྐྱིད་ལ་རོལ་བཞིན་པའི་སྒང་རེད།ང་ཁེར་རྐྱང་།ཞེད་སྣང་དང་ངོ་ཚ། སྐྱོ་བ་དང་མིག་ཆུ་གང་ཞིག་གིས།ང་སྡོད་འདོད་མ་བྱུང་།དེ་བས་ང་ཡོང་ཡིན།ལོག་ནས་ཡོང་ཡིན།གང་ལྟར་ད་དུང་ང་ར་བཟི་ཡོད།༢༠༢༠།༡༡།༠༦། ཕྱི་དྲོ། ༡༠:༣༠
རྟག་ཏུ་དགོད་པའི་རྣམ་ཐར།
འུ་གཉིས་མཉམ་དུ་བྱུང་ན་བསམས་ནས་ཁྱོད་ཀྱིས་ང་ལ་ཁ་ཡ་བྱས།།
ང་ཡིས་ཁྱོད་རང་ཚ་བོ་མཐོང་ནས་དགའ་རོགས་རྐྱང་པ་བསྒྲིགས་པ་ལགས།།
འུ་རང་གཉིས་ཀྱི་བསམ་བློ་ཁྱེར་སྟངས་འདྲ་ཡི་མེད་པ་དངོས་ཡོད་རེད།།
ད་ལྟ་བསམས་ན་ཁ་པར་ནང་ནས་སྙིང་གཏམ་གླེང་ས་ངོ་མ་ཆགས།།
ལས་སྨོན་ཡོད་ན་བྱུང་ཡོང་ཟེར་བ་ཁྱོད་ཀྱི་སྐད་ཆ་བདེན་པ་རེད།།
ལས་སྨོན་ཙམ་གྱིས་འགྲིག་གི་མ་རེད་ང་ཡིས་ཁྱོད་ལ་ལབ་ཡིན་པ།།
གང་ལྟར་ང་གཉིས་ཨོ་ཚོད་མཐུན་གྱི་ད་དུང་མདུན་དུ་བསྐྱོད་ན་ཨ།།
ད་ནི་ང་རང་ཁྱོད་ལ་ངོ་མ་བརྩེ་བ་ཡོད་པའི་མནའ་སྐྱེལ་ཡ།།
སྐྱེ་བ་འདི་ལ་སྐྱིད་རུང་སྡུག་རུང་ངས་ནི་ཁྱོད་རང་བདམས་ཡིན་ལ།།
བྱུང་ན་སྐྱེ་བ་གང་མང་ཞིག་ལ་ཁྱོད་དང་ཕྲད་པའི་སྨོན་ལམ་ཡོད།།
དེ་དག་ཀུན་ཏུ་བརྩེ་བས་ར་བཟི་དགའ་བས་ཡིད་ཚིམ་ནས།།
འཇིག་རྟེན་འདིའི་བརྩེ་བའི་མཚོན་རྟགས་འུ་གཉིས་འགྱུར་བའི་ཡིད་ཆེས་ཡོད།།
རྩོམ་ཁུངས། རྩོམ་པ་པོ་ལགས་ཀྱི་ངོ་དེབ་དྲྭ་བ་ནས་བཤུས།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།