རྩོམ་པ་པོ། མཁན་པོ་པདྨ་དབང་ཆེན།
གངས་རིའི་ཞིང་ཁམས་འདྲེ་ཡིས་འཇོང་།།
ལ་དང་ལུང་པ་བེམ་རོས་བཀང་།།
མེས་པོའི་རུས་རྐང་དོང་དུ་ལྷུང།།
རྔམ་བརྗིད་རི་བོ་ཁོག་ནས་སྔོག།
རིན་ཆེན་གཏེར་ཁ་རྒྱང་དུ་དབོར།།
མཛེས་པའི་ནགས་ཚལ་སྐེད་ནས་གཏུབ།།
དྭངས་པའི་འབབ་ཆུ་བཙན་གྱིས་བཀག།
འབྱུང་བཞི་འཁྲུག་པའི་ཐན་ལྟས་ཤར།།
སད་དང་སེར་བས་ལོ་ཐོག་བཅོམ།།
ནད་དང་མུ་གེའི་འཇིགས་པ་མང་།།
ལེགས་ཉེས་འབྱེད་པའི་བློ་མིག་ལྡོངས།།
ལྷ་འདྲེའི་གསོལ་མཆོད་རླུང་རྟ་དར།།
གྲུབ་མཐའི་ཕྱོགས་ཞེན་མེ་ལྕེ་འབར།།
ཆོས་ཀྱི་སྙིང་པོ་ཐལ་བར་གྱུར།།
དམ་པའི་ལུགས་ཀྱི་མཆོད་སྡོང་རུལ།།
ཆོས་རྒྱལ་མཇལ་བའི་འདས་ལོག་དང་།།
གཤིན་པོ་མཐོང་བའི་མངོན་ཤེས་ཅན།།
རང་སྐུང་དངོས་རྫས་གཏེར་སྟོན་སོགས།།
རྨོངས་པའི་དབུ་ལ་གདུགས་ལྟར་འཁོར།།
ཆབ་སྲིད་ཀ་བ་ཐང་ལ་འགྱེལ།།
དཔལ་འབྱོར་རིག་པ་འདམ་དུ་ཟུག།
རིག་གནས་པ་ཡིས་ཚེ་མཐའ་བསྡུས།།
རིག་གཞུང་ནང་དུ་དུག་ཆུས་བསླད།།
སྡོད་ཐབས་བྲལ་བས་ཕྱི་ལ་གྱར།།
འཐབ་རྩོད་ཐུག་པ་ནང་དུ་བསྐོལ།།
མགོ་གཉིས་པ་ཡིས་ཌ་རུ་དཀྲོལ།།
མཐུན་སྒྲིལ་ལག་ཟུང་རིམ་གྱིས་ལྷོད།།
མེས་པའི་ཞབས་རྗེས་འཚོལ་ན་ཡང་།།
ལོག་སྤྱོད་དད་པའི་ཐོ་བས་རྡུང་།།
རྒྱུག་ཁྱིའི་ཐག་པ་སྐེ་ལ་འདོགས།།
རྗེས་འབྲངས་པ་ཡི་ཆོ་ལོ་བསྩལ།།
བྱས་རྗེས་འཇོག་པའི་མཐུ་མེད་ཀྱང་།།
ཞེན་པ་དཀར་པོ་རིགས་ལ་ཆགས།།
རོ་རུལ་འབུ་ཡིས་བཟས་ཀྱང་རུང་།།
རྣམ་ཤེས་ཕྲ་མོ་རུས་ལ་འབྱར།།
ཕྱི་ལོ་ ༢༠༢༡/༡/༡༡ ཉིན།
ཡོང་ཁུངས།: རྩོམ་པ་པོའི་ངོ་དེབ་དྲྭ་བ་ལས་དྲངས།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།