ཕ་མ་དྲན་པའི་སྐད་གསང་།

མདའ་སྨྱུག་བཞུར་པོ། སྔ་འགྱུར་མཐོ་སློབ་ཆེན་མོ།

ཟླ་སུམ་པང་གི་སྡུག་བསྔལ་མ་ལས་ཤར།།

ཉིན་མཚན་རེ་སྒུག་དུང་བ་ཕ་ཡིས་ཁྱེར།།

ཤ་ལྕེ་འཇམ་པོ་ཁྱོད་ཀྱིས་ང་ལ་སྤྲོད།།

ང་ཡི་ཆེད་དུ་ཁྱོད་གཉིས་ཁྱི་ལྟར་རྒྱུག།

སྙིང་གི་གསེབ་ན་བཞག་ཡོད་ཕ་དང་མ།།

ཟླ་དགུ་ལུས་ཀྱི་ངལ་དུབ་མ་ཡིས་ཤེས།།

རྒྱང་ནས་སྨོན་ལམ་བཟང་པོ་ཕ་ཡིས་འདེབས།།

ངའི་སྒྲ་འཇིག་རྟེན་གླིང་ལ་གཏོར་དུས་འདིར།།

ཁྱེད་གཉིས་ང་ལ་འཐམས་ཏེ་རེ་བ་བཞག།

ཐོད་ལ་དམིགས་འདུན་སྐོ་མཁན་ཕ་དང་མ།།

འོ་ནུ་ཁ་ལ་ཕངས་མེད་མ་ཡིས་གཏབ།།

གོས་ཆེན་ཡག་ཤོས་ཕ་ཡིས་ང་ལ་བཀྱོན།།

སྐབས་རེ་ངུ་སྐད་འདོན་དུས་ཁྱོད་གཉིས་སྐྲག།།

ད་དུང་ཁྱོད་གཉིས་ལོ་བརྒྱ་བརྟན་དགོས་སྨོན།།

ང་ལ་ཚེ་སྲོག་སྲིང་མཁན་ཕ་དང་མ།།

གང་ལ་འདུག་ཚེ་སེམས་པ་མ་ཡིས་འཚོས།།

གོམ་སྟབས་གཉོམ་མོ་ལམ་ཁར་ཕ་ཡིས་དྲངས།།

ས་རུ་འགྲེ་ནས་དམེ་དྲི་ཁེངས་ན་ཡང་།།

ད་དུང་ལག་འཇམ་ཁྱོད་གཉིས་ང་ལ་སྤྲོད།།

རང་གི་བྲང་ཤ་འཛིན་མཁན་ཕ་དང་མ།།

དྲག་ཤུགས་ན་ཚ་སྔོན་རྟགས་མ་ཡིས་ཤེས།།

སྨན་དང་རིམ་གྲོ་གང་དགོས་ཕ་ཡིས་ཕབ།།

དུས་མེད་ཉལ་ཁྲི་སྒང་ལ་ལུས་ན་ཡང་།།

བྲན་གཡོག་འཁོར་བཅས་བཞིན་དུ་འཕྲི་ལ་སྡོད།།

ཐང་ཆད་མེད་མདོག་འདྲ་བོ་ཕ་དང་མ།།

གྲུ་བཞི་ཉལ་ཁྲི་བདེ་མེད་མ་ཡིས་རྟོགས།།

སློབ་གྲྭར་འཛུལ་བཞུགས་འདི་སྐོར་ཕ་ཡིས་དྲན།།

བདུད་གྲོགས་མཉམ་དུ་ལག་མཐུན་འགྲོགས་ན་ཡང་།།

མ་རྡུངས་ཞལ་དཀར་ཁ་འཇམ་ང་ལ་བཏོན།།

དགེ་རྒན་ལྷག་པའི་སློབ་མཁན་ཕ་དང་མ།།

བྲལ་བར་མ་ཕོད་མིག་ཆུ་མ་ཡིས་ཤོར།།

མི་ཚེ་ཁ་ཕྱོགས་འདི་ནི་ཕ་ཡིས་ཕྱེས།།

སྤྲུན་མེད་མི་ཡུལ་གྲོང་ལ་གཏོང་མི་འདོད།།

མི་ཡུལ་ཅི་འདྲ་ཡོད་པ་ཁྱེད་གཉིས་བསམས།།

མིག་ཆུ་རྒྱུན་མ་འབབ་མཁན་ཕ་དང་མ།།

དེ་རིང་ཅི་འདྲ་འདུག་ཡོད་མ་ཡིས་བསམ།།

འགྱུར་མདོག་ཅི་འདྲ་ཐེབས་སམ་ཕ་ཡིས་བརྗོད།།

ཉིན་མཚན་མེད་པར་རེ་སྒུག་ངང་ལ་སྡོད།།

འཁོགས་ཤིང་རྒས་ཀྱང་ང་ལ་བརྗེད་མེད་ཟེར།།

རང་ལས་ལྷག་པ་བསྐྱངས་བའི་ཕ་དང་མ།།

མི་ཡུལ་བརྒལ་ནས་ཡོང་བ་མ་ཡིས་ཚོར།།

གཏམ་བཟང་ཁ་མཐུན་ཁྱེ་བ་ཕ་ཡིས་ཤེས།།

དགའ་བའི་འཛུམ་གྱིས་བསུ་འདོད་ཁྱེད་གཉིས་ཆེ།།

འཚམས་འདྲི་ང་བྱས་ཁྱོད་བྱས་རྩོད་པ་རྒྱབ།།

ང་ལ་དེ་འདྲ་ཉར་མཁན་ཕ་དང་མ།།

ང་ལ་སྲུང་བསྲུང་ངང་ནས་རང་ལུས་ཕོངས།།

ད་ལྟ་ནད་ཀྱིས་མནར་བའི་མ་མ་ལགས།།

ཁྱེད་ལ་ཅི་བྱས་འདི་བྱས་ཐབས་མ་བརྙེས།།

ལོ་གཅིག་ཉལ་ས་སྒང་ལ་ལུས་མཐོང་དུས།།

གཅེས་ཕྲུག་རྨ་ཁ་མ་བཟོད་མིག་ཆུ་ཤོག།

   ཨ་མ་ལགས། དགོངས་དག་ད་ལྟ་ཁྱེད་ལ་ནད་ཀྱིས་མནར་མཐོང་དུས་ངའི་སེམས་གཏིང་ནས་མི་བཟོད་འདུག འོན་ཀྱང་དངོས་སུ་ཁྱེད་ལ་ཕན་ཞིག་ཀྱང་མ་ཐོགས་སོང་། ༢༠༢༡/༠༣/༢༦ དགོང་མོར་མིག་ཆུ་ཤོར་བའི་ངང་བྲིས།

_______________

རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་ཟིན་བྲིས་དྲྭ་བ།

ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང།

རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-ཕ་མ་དྲན་པའི་སྐད་གསང་།

࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།