རོང་ཕྲུག་གམ་འཇིགས་མེད་རྣམ་རྒྱལ་གྱི་སྙན་རྩོམ་ཁག་གསུམ།

༼༡༽

འཁོར་འདས་སྣང་ཆ་སྒྱུ་མ་ལྟ་བུ་སྟེ།།

རྟེན་འབྲེལ་དབང་གིས་བསླུ་མེད་ཡོད་པས་ན།།

ཇི་སྲིད་གཟུང་འཛིན་འཇུག་པ་མ་ནུབ་བར།།

རྒྱུན་ཆད་མེད་པར་དགའ་སྐྱོ་ཡོད་པར་ངེས།།

དངོས་དངོས་མེད་པའི་འཛིན་པ་རྣམ་གསུམ་པོ།།

ཐོས་བསམ་སྒོམ་པའི་ཤེས་རབ་རལ་གྲི་ཡིས།།

ཚལ་པ་བརྒྱ་རུ་བཀས་ནས་སྒྲིབ་པ་གཉིས།།

ཞི་བར་བྱས་ཏེ་འཁོར་འདས་སྣང་བ་ཞིག །

སྙིང་རྗེའི་བདག་ཉིད་གཞོན་ནུ་དོན་གྲུབ་ཀྱིས།།

ལོ་དྲུག་དཀའ་ཚེགས་དྲག་པོ་བཟོད་བྱས་ཏེ།།

མ་ག་དྷ་ཡི་བྱང་ཆུབ་ལྗོན་ཤིང་མདུན།།

སྒྲིབ་གཉིས་ཟད་ཅིང་སྣང་སྲིད་དབྱིངས་སུ་ཐིམ།།

ཉིད་ཀྱང་འཁོར་བའི་བཙོན་ཁང་འདི་ཉིད་ལས།།

མ་དག་དྲི་མ་རྡུལ་ཙམ་མ་ལྷག་པར།།

གཞན་དོན་ཁོ་ནར་དམིགས་ཏེ་ཞིང་མཆོག་དེར།།

ཁྱེད་མཇལ་ཁྱེད་གསུང་ཐོས་ན་ཅི་མ་རུང་།།

༢༠༢༡/༠༤/༠༣ སྔ་དྲོ་དུས་འཁྱོལ་ཚུལ་དུ་རང་ཤག་ནས་བྲིས།།

༼༢༽

སྙིགས་མའི་དུས་ཀྱི་ལས་ངན་ཤེས་ཅན་འགའི།།

སྲེད་པའི་ཆུ་བོ་འཕེལ་ནས་རང་དོན་དུ།།

བསགས་པའི་རྒྱུ་ནོར་མ་ངོམ་ནགས་ཚལ་གྱི།།

རྐང་འཐུང་མཐའ་དག་རྩ་མེད་གཏོང་བཞིན་གདའ།།

སྨྲ་བ་བྲལ་བའི་ཉམས་ཆུང་སེམས་ཅན་གྱི།།

སྡོད་གནས་བཤིགས་ཏེ་རང་ཉིད་འཚོ་བར་རོལ།།

ལས་འབྲས་བསླུ་མེད་རྟེན་ཅིང་འབྲེལ་བའི་མཐུས།།

ཤེས་ཅན་དེ་དག་རྟ་བདུན་བདག་པོར་སྤྲད།།

པདྨའི་གཉེན་གྱིས་ཚ་བའི་གུར་ཕུབ་ནས།།

ལས་ངན་ལུས་ལས་རྔུལ་ཆུའི་ཐིགས་པ་ཟགས།།

འབྲོས་ས་མ་འབྱོར་སྔར་གྱི་སྡོང་པོ་དྲན།།

བྱེད་ཐབས་བྲལ་ནས་ཕྱིས་སུ་འགྱོད་པ་སྐྱེས།།

བཅད་པའི་སྡོང་པོ་སྦྱོར་བའི་དུས་ནི་མེད།།

མནོ་བསམ་སྔོན་ལ་མ་འཁོར་འགྱོད་པ་དེ།།

ཕྱིས་སུ་སྐྱེས་པ་ལས་ཀྱི་མཐའ་ཡིན་ཏེ།།

ད་ནས་མི་གཅོད་གསར་འཛུགས་བྱེད་དུ་ཆོས།།

ངོ་དེབ་ནང་གོང་གི་པར་མཐོང་མ་ཐག་

༢༠༢༡/༠༤/༠༢ ཉིན་རང་ཤག་ནས།

༣༽ ཁྱོད་མིན་སུ།

ཡ་གི་རྒྱལ་པོ་བླ་ཆེན་མན་ཆད་ནས།།

མ་གི་ཕྲུ་གུ་སྣབས་ཚར་ཡན་ཆོད་ཀྱི།།

རིན་ཆེན་གསེར་ལས་དཀོན་པའི་དུས་ཚོད་དེ།།

ཆུད་ཟོས་གཏོང་མཁན་ཁ་པར་ཁྱོད་མིན་སུ།།

ན་ཚོད་སྨིན་པ་ལྟ་ཞོག་མ་སྨིན་པའི།།

ཆུང་ཆུང་བྱིས་པ་དག་ལའང་བཙན་དབང་གིས།།

འདྲེན་བྱེད་ཟུང་གི་གསལ་བྱེད་འོད་ཕུང་ཡང་།།

འཕྲོག་པར་བྱེད་པོ་ཁ་པར་ཁྱོད་མིན་སུ།།

སྡེར་མ་ནང་གི་ཁ་ལག་ཟ་བཞིན་དུ།།

ཁྱོད་ཀྱི་གདོང་པར་འཁྲུལ་སྟེ་ཁམ་གཅིག་རྗེས།།

ཁམ་གཞན་བརྗེད་དེ་འདུག་ས་དེ་ཉིད་དུ།།

འཁྱག་པ་ཆགས་སུ་འཇུག་མཁན་ཁྱོད་མིན་སུ།།

འགྲོ་ལམ་སྡོད་ས་འཛིན་གྲྭ་གསང་སྤྱོད་སོགས།།

འགྲོ་འདུག་ཅི་བྱས་ཁྱོད་དང་འབྲལ་མེད་རེད།།

མདོར་ན་ཉིན་གྱི་ལས་དང་མཚན་གྱི་གཉིད།།

རྐུ་བར་བྱེད་པོ་ལས་ངན་ཁྱོད་མིན་སུ།།

ཡུན་རིང་མཇལ་མ་མྱོང་བའི་ཕ་མ་དང་།།

མཛའ་བའི་གྲོགས་པོ་ཕན་ཚུན་གདོང་ཐུག་ཀྱང་།།

དགའ་སྐྱོའི་གཏམ་གླེང་མེད་པར་ཁྱོད་ཉིད་ཀྱི།།

དབྱིངས་སུ་ནུབ་ཏུ་འཇུག་པོ་ཁྱོད་མིན་སུ།།

ང་དང་ང་འདྲའི་སློབ་ཕྲུག་མི་ཉུང་ཞིག།

བསླབ་པ་སློབ་གཉེར་རྦད་དེ་བརྗེད་ནས་ཐལ།།

ཉིན་མཚན་གཡེལ་བ་མེད་པར་ཁྱོད་རང་འཁོལ།།

བདུད་སྤྲུལ་ཁྱོད་ལ་བརྫུས་ཏེ་བསླེབས་སམ་ཅི།།

རབ་འབྱུང་ཕལ་ཆེར་ཁ་འདོན་དགེ་སྦྱོར་རིགས།།

ཕ་རིའི་རྒྱབ་ཏུ་འཕངས་ཤིང་སྔ་དགོང་ཀུན།།

ཁྱོད་དང་འབྲལ་མེད་ཡིན་ཚུལ་ལ་བལྟས་ན།།

བདུད་ངན་ཁྱོད་ལ་བརྫུས་ནས་བསླེབས་སྙམ་གྱི།།

སྤྱི་ཚོགས་ནང་གི་རྙོག་དྲ་ཆུང་ཆུང་ཡང་།།

དོན་མེད་སྐར་མ་འགའི་རིང་འཛམ་གླིང་ཀུན།།

ཁྱབ་ནས་ཡར་དཀྲུག་མར་དཀྲུག་བྱེད་མཁན་ཡང་།།

བདུད་སྤྲུལ་ཁ་པར་ཁྱོད་མིན་གཞན་སུ་ཡིན།།

ཇི་ཙམ་ཉོས་རུང་དེ་ཙམ་སྲེད་པ་འཕེལ།།

རྒྱུན་དུ་བཀོལ་ན་སོ་སོར་གནོད་པ་ལས།།

ཕན་པ་ཅུང་ཟད་མེད་པའི་ཁ་པར་ཁོའི།།

ཡང་སྲིད་ཡོང་ཡ་མེད་ན་ཅི་མ་རུང་།།

མདོར་ན་ཁ་པར་ཁོ་ཡི་གཞན་དབང་དུ།།

འཆོར་ཐབས་མེད་པའི་ཐབས་ལམ་ཡག་ཤོས་དེ།།

རྣམ་པ་ཁྱེད་ཚོས་མཁྱེན་ན་ཁོ་བོ་ལ།།

སྦས་གསང་མེད་པར་འཐད་ཀ་ཤོད་དང་ཀྱེ།།

༢༠༢༡/༠༣/༣༠ སྔ་དྲོ་མལ་ས་ནས་ཅི་དྲན་ཐོལ་བྱུང་དུ་བྲིས།

_______________

རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་ཟིན་བྲིས་དྲྭ་བ།

ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང།

རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-རོང་ཕྲུག་གམ་འཇིགས་མེད་རྣམ་རྒྱལ་གྱི་སྙན་རྩོམ་ཁག་གསུམ།

࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།