འདོད་ཡོན་ལམ་དུ་ཁྱེར་བའི་སྙན་ངག

གངས་སེང་དཀར་མོ།

སྦྲང་མའི་གར་གྱིས་དྲི་ཞིམ་ཆིལ་ཆིལ་ཁུར།།

བརྩེ་བའི་རྒྱ་མཚོ་ཟད་པ་མེད་པར་བརླན།།

མི་ཁོག་གྲུབ་པའི་ཚུགས་དེར་མ་འགོངས་ན།།

ཇི་ལྟར་འགྱེལ་ཡང་བདེ་བ་མཆེད་པའི་ཚུལ།།

མེ་ཏོག་ཚོགས་ཀྱི་དབུ་རྒྱན་ཤིག་གེར་སྒྲོན།།

དལ་བུར་འཁྲིལ་བའི་སྙིང་གི་སྡུག་གུ་མ།།

སྙན་ངག་ཁ་ལ་དལ་ཅིག་ཕེབས་རོགས་དང་།།

རྨི་ལམ་ནང་ནས་འཁོར་བའི་སྙིང་པོ་ལེན།།

ཞེ་དང་སྙིང་ལ་ཡི་གེའི་ཕྲེང་ཆུང་བསྟར།།

འཛུམ་པའི་མདངས་ལ་ཅུང་ཟད་འོད་དུ་ལང་།།

ལྷ་ཚོགས་ཐམས་ཅད་ཁྲོས་པ་ཅང་མེད་ན།།

མུན་པའི་དཀྱིལ་ཡང་ཟླ་འོད་བསིལ་བ་འོ།།

ཕྱེ་ལེབ་སྒེག་མོའི་མཛེས་པ་ལྷམ་མེར་བཏེག།

ཁུ་སིམ་དཀྱིལ་གྱི་ཞལ་ངོ་ཡང་ཡང་དམུལ།།

སྡིག་པ་མེད་པའི་གཤིས་དེས་ཅི་ཞིག་གློད།།

སྙིང་ཤ་གཙབ་པའི་ཚོར་བ་མ་གཏོང་ཅིག།

བྱི་རུའི་འཁྲི་ཤིང་མཚོ་ལ་བཞད་པ་བཞིན།།

འཇམ་ཞིང་མཉེན་པ་པདྨའི་ཚུལ་དུ་འགུལ།།

བདུད་རྩིའི་ཆར་དང་ག་བུར་སྨན་གྱིས་ཀྱང་།།

སྒྲིན་དུ་མེད་དོ་དཔལ་སྟེར་འདོད་རྒུའི་དབྱིག།

ཤ་དང་རུས་པའི་ན་ཟུག་ཆོམ་པའི་གྲོགས།།

སྡུག་གི་རྒྱ་མཚོ་བདེ་བར་བསྒྱུར་བའི་གཉེན།།

སུན་པ་ཅང་མེད་ལྷས་ཀྱང་འདུད་བྱེད་པའི།།

སྒྱུ་འཕྲུལ་གཡོ་བའི་རྣམ་པ་རྩེ་དགའི་གཉེན།།

བྱ་དང་རི་དྭགས་ཆུ་ཀླུང་བདེ་དགའི་ཚལ།།

ཨེ་མ་ངོ་མཚར་ཡིད་འོང་བརྗོད་ལས་འདས།།

དེ་ན་ལྟ་ཡང་བདེ་དགུའི་ཡུམ་གཅིག་པུ།།

གཞན་ན་ཅང་མེད་ཟུར་མིག་གཡོ་བའི་གཏེར།།

༢༠༢༡/༠༤/༠༤

_______________

རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་ཟིན་བྲིས་དྲྭ་བ།

ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང།

རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-འདོད་ཡོན་ལམ་དུ་ཁྱེར་བའི་སྙན་ངག

࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།