མཁན་ཆེན་གྱི་བྱིས་སྒྲུང་དེབ་ལྔ་ལ་ཕུལ་བའི་དྲྭ་དམངས་ཀྱི་སྙན་རྩོམ་ཆེད་འགོད།

མཁན་ཆེན་ཚུལ་ཁྲིམས་བློ་གྲོས་ཀྱི་བྱིས་སྒྲུང་གི་དེབ་གསར་ལྔ་ཐོན་མ་ཐག དྲྭ་ལམ་དུ་ཤིས་བརྗོད་དང་ཡི་རངས་ཀྱི་གཏམ་སྟོང་ཕྲག་མང་པོ་དུས་གཅིག་ཏུ་སྤེལ་བའི་ཁྲོད། སྙན་རྩོམ་ཁ་ཤས་ཤིག་འདིར་འོས་སྦྱོར་བྱའོ།། 

༡. དུས་ཀྱི་སྟོན་པ་ཚུལ་ཁྲིམས་བློ་གྲོས་ཡིན།

མྱི་རྐང་། (ཁྱུང་མཆུ།)

ཕྱོགས་ཞེན་དར་ཆེན་ཕྱར་ནས་མ་བརྒྱུགས་ཤིང་།།

གྲུབ་མཐའི་ལ་རྒྱ་ཟེར་ནས་མ་བསྲན་པའི།།

མཐུན་སྒྲིལ་དུང་དཀར་འབུད་པའི་དགེ་སློང་ཞིག།

དུས་ཀྱི་སྟོན་པ་ཚུལ་ཁྲིམས་བློ་གྲོས་ཡིན།།

རྟེན་བཞེངས་ཟེར་ནས་རང་དོན་མ་བསྒྲུབས་ཤིང་།།

ཆོས་ཚོགས་ཟེར་ནས་ཚོང་ལས་མ་སྤེལ་བའི།།

གཞན་དོན་ཁོ་ནར་བྲེལ་བའི་དགེ་སློང་ཞིག།

དུས་ཀྱི་སྟོན་པ་ཚུལ་ཁྲིམས་བློ་གྲོས་ཡིན།།

གསེར་ཁྲི་གང་མཐོ་བརྩད་ནས་མ་བཞུགས་ཤིང་།།

འཁོར་སློབ་སུའི་མང་འགྲན་ནས་མ་བསྡད་པའི།།

བསྟན་པའི་ཁུར་ཆེན་ཐེག་པའི་དགེ་སློང་ཞིག།

དུས་ཀྱི་སྟོན་པ་ཚུལ་ཁྲིམས་བློ་གྲོས་ཡིན།།

ནང་བསྟན་མཁྱེན་ཀྱང་ང་རྒྱལ་མི་བྱེད་ཅིང་།།

ཚན་རིག་རྟོགས་ཀྱང་རྒྱགས་པ་མི་འཕེལ་བའི།།

འཛམ་གླིང་རིག་པས་བསྐོར་བའི་སྐྱེས་ཆེན་ཞིག།

དུས་ཀྱི་སྟོན་པ་ཚུལ་ཁྲིམས་བློ་གྲོས་ཡིན།།

ཁ་བཤད་རྐྱང་བས་མི་སེམས་མ་བཏུལ་ཅིང་།།

ལག་ལེན་གནད་ཀ་སྤྱི་དོན་ལ་བརྩོན་པའི།།

སྤོབས་པ་རི་ལྟར་ཆེ་བའི་དགེ་སློང་ཞིག།

དུས་ཀྱི་སྟོན་པ་ཚུལ་ཁྲིམས་བློ་གྲོས་ཡིན།།

སྟོབས་འབྱོར་མངའ་ཐང་ཨེ་རྙེད་མ་བལྟས་ཤིང་།།

སྙན་དང་གྲགས་པ་ཨེ་རྒྱས་མ་བསམ་པར།།

བྱམས་བརྩེའི་གདུགས་དཀར་ཐོགས་པའི་དགེ་སློང་ཞིག།

དུས་ཀྱི་སྟོན་པ་ཚུལ་ཁྲིམས་བློ་གྲོས་ཡིན།།

འདི་ལྟར་སོ་སྐྱེས་ནང་གི་སོ་སྐྱེས་ངས།།

རྟོག་བཏགས་འཇའ་ཡི་ལང་ཚོ་དོར་དང་ནས།།

དྲིན་ལྡན་བླ་མའི་མཛད་པའི་ཆ་ཤས་ཙམ།།

ཆུ་བུར་མིག་གིས་མཐོང་ཚད་ཤར་མར་བྲིས།།

༢. ཤེས་རབ་ཀྱི་འཐུས་མི་སྣ་བོ་ཆེ།  

འགན་འཁྲི།

ངུར་སྨྲིག་གོས་ཀྱི་གྲིབ་བསིལ་འོག་ནས་ཚུལ་ཁྲིམས་དྲི་བཟང་ངད་པར་འཐུལ།།

སྣ་མང་རིག་པའི་གཞུང་ལུགས་ཁྲོད་ནས་དོན་དམ་དཔྱོད་པའི་བློ་གྲོས་རྒྱས།།

ཆོས་རིག་གནད་ཀྱི་སྙིང་པོ་མ་ལུས་རིག་བརྩོན་ཧུབ་ཀྱིས་རྔུབ་པ་པོ།།

མཁས་བཙུན་བཟང་བོའི་གོ་ཆ་ཅན་ཁྱོད་བྱང་ཆུབ་བར་དུ་སྐྱབས་སུ་བསྟེན།།

བསྟན་པ་འདི་ལ་ཉམས་གུད་བྱུང་དུས་ཁྱེད་ནི་སྟོན་པ་ཁེར་བྱོན་ཞིག།

སྐད་ཡིག་གན་ལ་གོད་ཆག་ཤོར་དུས་ཁྱེད་ནི་དབྱངས་གསལ་འཕྲུལ་གྱི་མཛོད།།

གངས་རིའི་ལས་དབང་གུད་ལ་ཕྱོགས་དུས་ཁྱེད་ནི་ཁ་བའི་སྲུང་མ་སྟེ།།

བསྟན་དོན་ཟབ་ལ་རིགས་ཞེན་མཐོ་བའི་བུ་རྒོད་ཁྱོད་འདྲ་མང་པོ་མིན།།

ངན་པའི་ཇུས་ཀྱིས་སྐུ་ལ་བདོ་རུང་མི་འཇིགས་སྟག་གི་སྙིང་ཤ་ཅན།།

བསམ་སྦྱོར་སྡང་བས་གསུང་ལ་སྒྲིབ་ཀྱང་ཡོལ་མེད་སྣང་བའི་འོད་པོ་ཆེ།།

ལོག་ལྟ་དུག་ལྕེས་ཐུགས་ལ་གུས་ཀྱང་ཞུམ་མེད་དཔའ་བོ་ཁེར་འགྲོས་ཤིག།

སྤོབས་པའི་གཡུ་རལ་གངས་ལ་གསིག་དུས་མཁས་རློམ་ཝ་ཚོགས་ཟིལ་གྱིས་གནོན།།

ཐུ་བྷོད་བཙན་པོའི་ཤུལ་རྗེས་སྙེག་སྟེ་ཁ་བ་རི་པའི་སྲོལ་བཟང་སྐྱོང་།།

ཤར་ནུབ་བཅད་པའི་ཐིག་མཚམས་བརྒལ་ནས་གཉིས་ཕན་དབུ་མའི་ས་བོན་བཏབ།།

གླིང་ལྔ་མཚོ་བཞིར་ཞབས་ཀྱིས་བཅགས་ཏེ་འགྲོ་ཕན་སྙིང་རྗེའི་ཆོས་སྐལ་སྩོལ།།

རླབས་ཆེན་མཛད་པ་གངས་ལ་བསྟིམ་པའི་རིགས་ཀྱི་ཁྱུང་ཆེན་སྲིད་ན་མཐོ།།

བསྟོད་བཀུར་ངག་གིས་ཕྲེང་བར་བརྒྱུས་རུང་ངར་རྒྱལ་མགོ་བོ་མ་འཕར་ཟིག།

ངན་གཡོའི་གཏམ་གྱིས་སྲིད་པར་འགེང་རུང་རིགས་འདི་ཐུགས་ཀྱིས་མ་བོར་ཟིག།

ཡོད་ཚད་མིང་དང་ཐོབ་ལ་འདུར་བའི་ཉེར་གཅིག་དུས་ཀྱི་སྒལ་གཞུང་ནས།།

ཁྱེད་ནི་དེ་སོགས་ཀུན་གྱིས་དབུལ་བའི་གདོང་དམར་མི་ཡི་ཁ་ལོ་པ།།

༣.

བོད་ལྕེ།

བླ་མ་མཆོག་གིས་མཛད་པ་ཡི།།

ཚིག་མཛོད་རིག་པའི་བསྡུས་དོན་དང་།།

བྱིས་སྒྲུང་གསར་པའི་དཔེ་དེབ་ལྔ།།

པར་སྐྲུན་བྱུང་བ་དགའ་བ་ལ།།

ཁྱིམ་བདག་དགེ་རྒན་ཚོང་པ་ཚོས།།

མ་བསླུས་ཆག་སྒོའི་དེད་ལེ་རེད།།

ཕ་མ་བྱིས་པ་བུ་རྫི་ཚོས།།

མ་བལྟས་བསོད་ནམས་ཟད་ལེ་རེད།།

བསམ་ཞིང་བླ་མའི་ཐུགས་རྗེ་དྲན།།

དད་གདུང་ཁོག་པའི་དྲོད་ལ་སིམ།།

དཔྱད་ཅིང་བླ་མའི་ཡོན་ཏན་དྲན།།

མོས་གུས་མིག་མཐའི་ཆུ་དང་འདྲེས།།

སྐུ་ཚེར་བར་ཆད་མི་འབྱུང་བའི།།

གསོལ་འདེབས་མགྲིན་པའི་དབྱངས་ལ་བསྒྱུར།།

མཛད་འཕྲིན་མཐའ་རུ་ཕྱིན་པའི་ཕྱིར།།

སྨོན་ལམ་དད་པའི་སོར་རྩེས་སྐྱོར།།

༤.

རྟ་ནག་ལུང་རིགས།

ཉམ་ཐག་དུད་འགྲོའི་མགོན་དང་དཔུང་གཉེན་དུ།།

བསམ་བཞིན་བྱོན་པའི་རྒྱལ་སྲས་སེམས་དཔའ་ཆེ།།

བཟོད་དང་བརྩོན་པའི་གོ་ཆ་བཙན་པོ་ཅན།།

མཁན་ཆེན་ཚུལ་ཁྲིམས་བློ་གྲོས་ཕྱག་གི་ཡུལ།།

ཕྲག་དོག་མདའ་དང་དམོད་པའི་ཚིག་ལན་ལ།།

ཁྲོ་བའི་ཚིག་ཙམ་སྨྲ་བར་མི་ནུས་ཤིང་།།

སྡང་བའི་ཟུར་མིག་གིས་ཀྱང་མི་བལྟ་བ།།

ཤཱཀྱའི་དགེ་སྦྱོང་ཁྱེད་ཉིད་སྙིང་རྗེ་ཡུལ།།

གང་དང་གང་དུ་སྟོང་ཆ་ཡོད་ས་དེར།།

དེ་དང་དེ་རུ་ཁྱེད་ཀྱི་འཕྲིན་ལས་ཡོད།།

དམོད་དང་སྤྱོ་བས་ཕམ་པར་མི་ནུས་པ།།

བོད་ཀྱི་རུ་འདྲེན་ཆེན་མོར་སྐྱབས་སུ་མཆི།།

བྱིས་སྒྲུང་བྲིས་ནས་བྱིས་པའི་སློབ་གསོ་སྒྲུབ།།

ཨེ་འགོག་གསུངས་ནས་ནད་ཡམས་སྔོན་འགོག་མཛད།།

ལག་རྩལ་བསླབས་ཏེ་དམངས་ལ་སོ་ཚིས་སྒྲུབ།།

སྤྱི་ཕན་ཟླ་བ་དཀར་བོར་སྐྱབས་སུ་མཆི།།

ད་དུང་ཁྱེད་ཀྱི་སྐུ་ཚེ་བརྟན་དགོས་ཡོད།།

ཁྱེད་ཀྱི་འཕྲིན་ལས་མུ་རུ་རྒྱས་དགོས་ཡོད།།

ཁྱོད་དང་ཁྱོད་འདྲའི་ལུགས་གཉིས་ཁ་ལོ་བ།།

མེད་ན་མི་ཆོག་ཉུང་ནའང་མི་འགྲིག་གོ།།

ཁྱེད་སྐུ་ཉི་མ་གསར་བའི་སྒོ་དྲུང་ན།།

ལྷེམ་ལྷེམ་འདར་བའི་སྲིན་བུ་མེ་འཁྱེར་ཚོ།།

བཤད་རྒྱུ་མང་ལ་ལས་རྒྱུ་མེད་པ་དག།

གཉིས་ནི་མི་དགོས་གཅིག་ཀྱང་མི་མཁོའོ།།

༥.

མཁན་པོ་ཀར་འགྲུབ།

རིགས་ཀྱི་སྤྱོད་བཟང་བོར་ལ་ཉེ་དུས་ཁྱེད་ནི་སྟོན་པ་ཤཱཀ་ཐུབ་ཡིན།།

མགོན་མེད་དུད་འགྲོའི་ཚེ་སྲོག་སྐྱོབ་ཉིན་ཁྱེད་ནི་སྤྱན་རས་གཟིགས་དབང་ཡིན།།

གསོ་མེད་ཨེ་ཛི་སྒོ་ལ་ཐོན་ཉིན་ཁྱེད་ནི་སངས་རྒྱས་སྨན་ལྷ་ཡིན།།

མདོ་མེད་བོད་པས་རང་སྐད་དོར་ཉིན་ཁྱེད་ནི་རྗེ་བཙུན་འཇམ་དབྱངས་ཡིན།།

བསམ་མེད་བྱིས་པ་གཞན་དུ་འགྱུར་ཉིན་ཁྱེད་ནི་ཐོན་མི་ཨ་ནུ་ཡིན།།

རིགས་ཀྱི་བདེ་སྡུག་ཕྲག་ལ་ལེན་ཉིན་ཁྱེད་ནི་གེ་སར་སེང་ཆེན་ཡིན།།

ནང་གི་ཕུ་ནུའི་སྡང་མིག་འོག་ན་ཁྱེད་ནི་སྡར་མ་ཁྲོ་ཐུང་ཡིན།།

ཕྱི་ཡི་དགྲ་བོས་ཐུབ་ཚོད་གཏོང་ཉིན་ཁྱེད་ནི་རྒྱ་ཚ་ཞལ་དཀར་ཡིན།།

གལ་ཆེན་དོན་གྱི་ཐབས་ལམ་བཙལ་ཚེ་ཁྱེད་ནི་ཨ་ཁུ་སྤྱི་དཔོན་ཡིན།།

༦. དགུན་ཟླ་བཅུ་བའི་འོ་ཐུག 

རྫ་པད།

གཙག་སེར་བུས་ས་གས་རྡོ་བ་གས།། 

ཕོ་རི་སྤྱང་གདོང་པ་གས་དུས་འདིར།།

དྲོད་སྣང་བ་བག་ཙམ་སྟེར་བ་ཡི།།

རྗེ་ཁྱེད་ཀྱི་མཛད་པ་བཀའ་དྲིན་ཆེ།། 

ཁུ་ན་བུན་རྨུགས་ཤིང་འཐིབས་པ་དང་།། 

རླུང་ལྷགས་པ་ཆེ་ཞིང་གྲང་བ་དང་།། 

སྐྱི་སེར་བུའི་རེག་བྱ་ཚ་བའི་དུས།། 

གོས་སློག་པ་བྱིན་ན་སུ་མི་དགའ།།

འདི་དགུན་ཟླ་བཅུ་བའི་འོ་ཐུག་ཡིན།། 

ཆུང་བེའུ་རྣམས་ཀྱིས་འདི་ཐུངས་ཤིག། 

ཕྱུག་རུ་མ་གཉིས་ཀྱི་རྩ་བ་རྣམས།། 

རྐྱེན་གོད་ཀ་མེད་པར་ལག་ཆགས་དགོས།།

ངས་རྫ་བེ་རྫོབ་བེ་ལར་མི་ཤེས།།

གཡོ་ཁྲམ་གཤོམ་དེ་བས་ཅང་མི་ཤེས།།

ཞེར་དྲན་ཚད་ཁ་ནས་ཐོན་པ་ཡིན།། 

འཕྲོད་མེད་ས་ཡོད་ན་དགོངས་དག་ཞུ།།

_______________

རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་ཟིན་བྲིས་དྲྭ་བ།

ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང།

རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-མཁན་ཆེན་གྱི་བྱིས་སྒྲུང་དེབ་ལྔ་ལ་ཕུལ་བའི་དྲྭ་དམངས་ཀྱི་སྙན་རྩོམ་ཆེད་འགོད།

࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།