གངས་སེང་དཀར་མོ།
ནད་དང་མུ་གེ་འཐོན་ཉིན་ཅི་ཡང་མེད།།
ས་ཡོམ་ཆུ་ལོག་བསླེབས་ཉིན་ཅི་ཡང་མེད།།
སྡུག་གི་མུན་པ་འཐིབས་ཀྱང་ཅི་ཡང་མེད།།
མ་ཉེས་ཁ་གཡོག་འཕོག་ཉིན་ཅི་ཡང་མེད།།
ཉེས་མེད་བཙོན་ལ་བདའ་ཉིན་ཅི་ཡང་མེད།།
ས་ཁད་མིག་ཆུས་བཤལ་ཡང་ཅི་ཡང་མེད།།
གསོལ་བ་འདེབས་སའི་སྐྱབས་དེ་གང་ན་ཡོད།།
མདའ་ཆེན་ཆར་བཞིན་འབབ་ཉིན་ཅི་ཡང་མེད།།
བཙན་པོས་དབང་ཡོད་བྱེད་ཉིན་ཅི་ཡང་མེད།།
མི་སྲོག་འབེན་ལ་བཞག་ཀྱང་ཅི་ཡང་མེད།།
འཆི་ཁར་གཟིགས་པའི་སྐྱབས་དེ་གང་ལ་ཡོད།།
རྒྱ་མཚོའི་རླབས་ཀྱིས་དྲིལ་ཉིན་ཅི་ཡང་མེད།།
མེ་དཔུང་གནམ་ལ་འཕྱུར་ཉིན་ཅི་ཡང་མེད།།
མི་རོའི་བམ་མཁར་བརྩིགས་ཀྱང་ཅི་ཡང་མེད།།
མཆོད་མཆོད་ཁ་ཡི་སྐྱབས་དེ་གང་ན་ཡོད།།
ནད་པ་མལ་སར་ལྷུང་ཉིན་ཅི་ཡང་མེད།།
མི་ཤི་རྟ་འགྱེལ་འབྱུང་ཉིན་ཅི་ཡང་མེད།།
ས་གནམ་ཅིག་ཅར་རྡིབ་ཀྱང་ཅི་ཡང་མེད།།
ཐུགས་རྗེ་ཅན་གྱི་སྐྱབས་དེ་གང་ན་ཡོད།།
བྱུར་གྱི་གོད་ཁ་ལྡང་ཉིན་ཅི་ཡང་མེད།།
རྐྱེན་དང་ཆག་སྒོ་བུད་ཉིན་ཅི་ཡང་མེད།།
བརྒྱ་བརྒྱ་སྟོང་སྟོང་བོས་ཀྱང་ཅི་ཡང་མེད།།
གླེགས་ཐག་བར་གྱི་སྐྱབས་དེ་གང་ན་ཡོད།།
གངས་ཐང་ཁྲག་གིས་འགེབ་ཉིན་ཅི་ཡང་མེད།།
ལྷ་ཁང་བདུད་ཀྱིས་གཞོམ་ཉིན་ཅི་ཡང་མེད།།
ལོ་བསྒྲུབས་ཟླ་བསྒྲུབས་ཞུས་ཀྱང་ཅི་ཡང་མེད།།
བྱིན་རླབས་ཅན་གྱི་སྐྱབས་དེ་གང་ན་ཡོད།།
༢༠༢༡/༥/༢༡
_______________
རྩོམ་ཁུངས།: མཚོ་བྱུང་ཨུཏྤལ་ནེའུ་གསིང་།
ཐུགས་སྣང་།: འདི་གའི་རྩོམ་ཡིག་བཤུ་སྤེལ་བྱེད་ཚེ་རྩོམ་ཁུངས་ངེས་པར་འགོད་རོགས་གནང།
རྩོམ་འདིའི་དྲྭ་ཐག: མཚོ་བྱུང་ཨུཏྤལ་ནེའུ་གསིང་།-«གང་ན་ཡོད།»མགྱོགས་བྲིས་མ།
࿐ སྐུ་ཉིད་ནས་ངེད་དྲྭ་བར་རྩོམ་ཡིག་ཡག་པོ་རེ་བསྐུར་གནང་མཛད་པར་ཐུགས་རྗེ་ཆེ་ཞུའོ།།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།