མྱི་ལྡོམ་པོའི་སྙན་ངག་ཁག་ལྔ།

ཡོང་ཁུངས།: རྩོམ་རིག་པའི་གཞིས་ཀ

༡. དྲན་པའི་འཕག་འཚག

སྤྲིན་ནག་ལྡིང་ཞིང་གནམ་གཤིས་ནག་ནོག་འདི།།

ཁེར་རྐྱང་ས་མཐར་རྒྱུ་བའི་ལས་དབང་ཡིན།།

འབྲུག་སྒྲ་སྒྲོགས་ཤིང་སེར་རྒོད་བབས་སོང་ན།།

མཐོངས་ལ་མིག་ལོག་བལྟ་ནས་མ་གཤེ་ཞིག།

ཆུ་འཛིན་ལོང་ལོང་འོག་གི་ཆར་འབྲུ་དག།

སེམས་འདི་དྲན་གདུང་མནར་བའི་མིག་ཆུ་ཡིན།།

གལ་སྲིད་ཁྱོད་ཀྱི་ཁ་ངོར་ལྷུང་སོང་ན།།

ལག་གི་ཨར་ཚོར་འཇམ་པོས་འབྱིད་རོགས་བྱོས།།

དྲན་གདུང་ཀློང་གི་སེམས་པ་ཁེར་རྐྱང་འདི།

བདག་གིས་ཁྱེད་ལ་བཅངས་པའི་བརྩེ་བ་ཡིན།།

ཨུ་ཚུགས་དབང་གིས་སུན་པོ་བཟོས་སོང་ན།།

མི་རྐྱང་ང་ལ་བཟོད་པ་སྒོམ་རོགས་བྱོས།།

༢༠༢༡/༠༦/༢༦ མྱི་ལྡོམ་པོས།

༢. མཇལ་སྐོར་ཕེབས།

འདི་ན་རྗོད་པར་དཀའ་བའི་བརྗོད་བྱ་ཡོད།།

རིན་ཐང་གཞལ་དུ་མེད་པའི་གཅེས་ནོར་ཡོད།།

སྔོན་བྱོན་ལོ་ཙཱ་རྣམས་ཀྱི་བྱིན་རླབས་ཡོད།།

གྲོགས་ཚོ་པར་ཁང་ཆེན་མོར་མཇལ་སྐོར་ཕེབས།།

གནའ་བོའི་རིག་གཞུང་ལྗིད་ཚད་སྔར་ལས་ལྕི།།

གནའ་མྱི་རྒན་རྒོན་གཤིས་ཀ་བལ་ལས་འཇམ།།

དེང་གི་གསར་སྐྱེས་ལྷག་བསམ་དུང་ལས་དཀར།།

གྲོགས་ཚོ་པར་ཁང་ཆེན་མོར་མཇལ་སྐོར་ཕེབས།།

གནའ་དེང་ཤེས་རིག་འབྱུང་གནས་ཆུ་གཏེར་ཆེ།།

གཅིག་ཏུ་བསྐྱིལ་བའི་ཁ་བ་བསིལ་ལྗོངས་ཀྱི།།

གནས་འདིའི་གཟི་བརྗིད་ཉིན་མོར་བྱེད་དང་མཉམ།།

གྲོགས་ཚོ་པར་ཁང་ཆེན་མོར་མཇལ་སྐོར་ཕེབས།།

འདི་རུ་གནའ་དེང་ཤེས་རིག་ནོར་གྱིས་ཕྱུག།

པར་ཁང་ཆེན་མོའི་བྱིན་རླབས་སྔར་ལས་ཆེ།།

སྡེ་དགེ་པར་ཁང་ཤེས་རིག་འབྱུང་གནས་ཆེ།།

རྟག་བརྟན་མི་ཤིགས་གཡུང་དྲུང་ངོ་བོར་སྨོན།།

༢༠༢༡/༠༨/༠༥ མྱི་ལྡོམ་པོས།

༣. འཁྱགས་པ་སིལ་སིལ།

ཆང་དང་ཨ་རག་ཟེར་བ།།

འཐུང་རྒྱུའི་སྐལ་བ་མ་བྱུང་།།

གྲང་ཆུ་མངར་སྐྱུར་འདྲེས་མ།།

བཏུངས་བའི་གྲངས་ཀ་མེད་རེད།།

འཁྱགས་པ་སིལ་སིལ་ལྡན་དུ།།

ཀུ་ཤུ་ནར་ནར་བསྲེས་པ།།

འདི་གའི་ཇ་ཁང་ནང་དུ།།

འདི་འདྲའི་ཞིམ་ཟས་ཡོད་རེད།།

ཕྱི་ནས་གྲང་བས་གཙེས་ཤིང་།།

ཡུལ་ལུང་ནད་ཀྱིས་ཁྱབ་ཀྱང་།།

དགོན་འདིའི་ཐུགས་རྗེས་བཀའ་དྲིན།།

ང་རང་བདེ་བར་གནས་ཡོད།།

༢༠༢༡/༠༨/༠༥ མྱི་ལྡོམ་པོས།

༤. ཟགས་པ་སྔ་སོང་།

ལྟག་པ་གནམ་ལ་དགྱེ་ཞིང་།།

བསམ་གཞིག་ཐོད་དུ་སྤུངས་ན།།

ཡ་ཆུང་སེམས་ཀྱི་དབུས་སུ།

ཁྱེད་རང་ལྷ་ཞིག་ཡིན་འདྲ།།

བྱ་ཚོགས་ཚང་དུ་ལོག་གི།

ལོ་མ་སེར་ལོ་མ་དག།

ཤག་ཤག་ཤག་ལ་ཟགས་སོང་།།

སྐྱོ་བའི་ཟློས་གར་ཡིན་འགྲོ།

གྲིབ་གཟུགས་ཞེད་སྣང་ཚ་པོས།།

ཁོ་ར་ཁོར་ཡུག་བཏུམས་སོང་།།

སྲིན་བུས་ཀྱུར་གྱུར་འབྱིན་པ།།

སྐྱོ་བའི་གླུ་ཆུང་ཡིན་འགྲོ།།

དབྱར་རྔ་མ་ལྡིར་གོང་དེར།།

དྲག་ཆར་མ་བབས་སྔོན་དེར།།

ང་རང་སླེབས་པ་འཕྱིས་སོང་།།

ཁྱེད་རང་ཟགས་པ་སྔ་སོང་།།

༢༠༢༡/༠༨/༠༦ མྱི་ལྡོམ་པོས།

༥. ཚོར་འདུའི་རི་མོ།

འཁོར་འདས་མཉམ་པར་བལྟ་བའི་ཤེས་རབ་མེད་ཀྱང་།

སྣང་བ་དགྲ་རུ་ལང་བའི་སྤོབས་པ་མི་འདུག།

སྣོད་བཅུད་ལྷ་སྐུར་ཤེས་པའི་རྣམ་དཔྱོད་མེད་ཀྱང་།།

མཐོང་ཐོས་ཐན་དུ་བལྟ་བའི་རྣམ་རྟོག་མི་འདུག།

བདག་གཞན་རྗེ་བའི་བྱང་སེམས་ཉམས་ལེན་མེད་ཀྱང་།།

འགྲོ་དྲུག་ཕ་མར་ཡིན་པའི་གཏམ་དེར་ཡིད་ཆེས།།

སྙིང་ཆུང་ལུས་ཕུང་འདི་དང་ལྷན་དུ་ཡོད་པས།།

ཚོར་བའི་རི་མོ་ལག་པས་འབྲི་སྙིང་འདོད་ཀྱི།།

ཟླ་བ་མཚོ་ངོགས་ཟག་པའི་དོ་དགོང་དུས་སུ།།

གྲོགས་ཁྱོད་ཞལ་རས་ནམ་ཞིག་མཇལ་བར་སྒུག་དགོས།།

ད་ནི་ལྕགས་སྒོ་ཆེན་པོས་ཁྲོག་སྒྲ་བསྒྲོགས་སོང་།།

འགྲོ་ཡུལ་ལམ་ཐག་རིང་ཐུང་སུ་ཡིས་བཤད་ཐིགས།།

འདས་དོན་མང་པོའི་རྗེས་སུ་ངལ་བ་མ་བྱེད།།

དུས་ཚོད་ལྟག་ལོག་རྒྱག་པའི་རྒྱུ་མཚན་མེད་རེད།།

མ་འོངས་རེ་བའི་མདུན་ལམ་སྣང་མེད་མ་བསྐྱུར།།

ཡ་གི་དྲིན་ཆེན་བླ་མར་སེམས་ཐོག་སྒོམས་ཤོག།

ཆུ་འཁོལ་ཕོར་བ་གང་ཙམ་འཐུང་རེས་མེད་ཅིང་།།

རྩམ་སྐྱ་ཐུར་མ་གང་གིས་ཟ་རེས་མེད་ཀྱང་།

དམ་ཚིག་གཅིག་པའི་སྐལ་མཉམ་མཆེད་གྲོགས་ཡིན་དུས།།

སེམས་ཀྱི་ཚོར་བ་འབྲི་ལ་ངལ་དགོས་མི་འདུག།

འདུས་བྱས་སྐད་ཅིག་གློག་གི་གར་སྟབས་སོམས་དང་།།

འདྲ་མིན་རྣམ་རྟོག་སྣ་དགུ་འཇའ་བཞིན་ཡལ་འགྲོ།།

བདག་པས་གཞན་གཅེས་སྙིང་རྗེའི་དམིགས་རྣམ་སྐྱོངས་དང་།།

ན་ཚའི་ཟུག་རྔུ་དེ་ཡང་ག་ལེར་ཡལ་འགྲོ།

ཟླ་བ་དགྲ་ཅན་ཁ་རུ་ཆུད་པ་མང་མོད།།

ཐར་བ་དེ་ཡང་གྲངས་མེད་ཡིན་པ་ཤེས་དགོས།།

སྐར་ཚོགས་སྤྲིན་གྱིས་བཀབ་པ་དངོས་ཡོད་རེད་དེ།

སྤྲིན་ནག་ཡོལ་བ་གཏོར་བ་གྲངས་ཀ་མེད་པ།།

གྲོགས་ཁྱོད་སེམས་ལ་གོ་ཆ་མཐུག་ཙམ་བགོས་ཤོག།

༢༠༢༡/༠༨/༠༧ མྱི་ལྡོམ་པོས།