འཇིགས་མེད་རྣམ་རྒྱལ།(རོང་ཕྲུག) སྔ་འགྱུར་མཐོ་སློབ་ཆེན་མོ།
གཞི་ལ་གཞི་སྣང་ཤར་བའི་དུས་དེ་རུ།།
འཁྲུལ་བའི་དབང་གིས་རང་སྣང་མ་ཤེས་ཏེ།།
ཁམས་གསུམ་སྲིད་པ་འདི་ན་འཛད་མེད་དུ།།
སྐྱེ་འཆི་བུམ་ནང་སྦྲང་འབུ་བཞིན་དུ་འཁོར།།
རང་སེམས་ངོ་བོ་གསལ་བའི་མཁའ་དབྱིངས་སུ།།
ལས་ངན་བག་ཆགས་ཆུ་རླངས་འཕྱུར་བ་ལས།།
གློ་བུར་རྣམ་རྟོག་སྒྲིབ་པའི་སྤྲིན་ནག་འཁྲིགས།།
སྨག་རུམ་དེ་ཡིས་རང་ངོ་ཤེས་པར་གཡོགས།།
བདེན་མེད་ཤེས་པའི་བློ་ཡིས་བསལ་བར་ཤོག།
གཟུགས་ནས་རྣམ་མཁྱེན་འདུས་པའི་ཆོས་ཀུན་ལ།།
བདེན་འཛིན་མཚན་འཛིན་གཉིས་འཛིན་ཞེན་པ་སྐྱེས།།
དེ་ཡིས་ངང་ལས་ཁམས་གསུམ་སྲིད་པ་འདིར།།
ཟོ་ཆུན་འཁྱུད་མོ་བཞིན་དུ་འཁོར་བར་བྱེད།།
འཁོར་བའི་ཕྲེང་ཐག་མྱུར་དུ་ཆད་པར་ཤོག།
ཇི་སྲིད་གཟུང་འཛིན་དབྱིངས་སུ་མ་ནུབ་བར།།
དེ་སྲིད་འཁོར་བའི་ཆོས་རྣམས་བདེན་པར་སྣང་།།
དཀའ་སྡུག་སྣ་ཚོགས་གཟུགས་བརྙན་ཇི་བཞིན་དུ།།
རང་གི་རྗེས་སུ་འབྲངས་ཤིང་རྟག་ཏུ་གཙེས།།
འཁྲུལ་པར་ཤེས་ཏེ་གཟུང་འཛིན་ཞི་བར་ཤོག།
མི་གཙང་སོ་དྲུག་སོགས་ཀྱི་ཆོལ་ཟངས་ལ།།
ཇི་ཙམ་སྦགས་པར་བསྒོམས་ཀྱང་ཐོག་མེད་ཀྱི།།
གོམས་པ་སྟུག་པོས་གཙང་མར་སྣང་བའི་ཚེ།།
བག་ཆགས་འཇོག་སྣོད་ཀུན་གཞི་རྣམ་ཤེས་ཉིད།།
སྟོང་པར་གྱུར་ཏེ་གཙང་གཙོག་མིང་མེད་ཤོག།
བདེན་པར་མེད་པའི་ཆོས་ལ་བདེན་པ་དང་།།
སྡུག་བསྔལ་ཉིད་ལ་བདེ་བར་རློམ་པ་ཉིད།།
མི་རྟག་ཆོས་རྣམས་རྟག་པའི་ངོ་བོར་འཆར།།
མི་གཙང་གཙང་མའི་རྣམ་པར་འཛིན་པ་ཀུན།།
དེ་རིང་ཉིད་ནས་རང་འཚང་མཐོང་བར་ཤོག།
མཁས་དབང་རྣམས་དང་དགེ་བའི་བཤེས་གཉེན་གྱི།།
མཛད་ཕྲིན་བསམ་གྱིས་མི་ཁྱབ་དེ་དག་ལ།།
རྨོངས་པའི་དབང་ལས་མ་ཤེས་མ་གུས་པ།།
བག་མ་མཆིས་པས་སྐྱོན་དུ་སྣང་བ་ཀུན།།
ཅི་མཛད་ཡོན་ཏན་ཉིད་དུ་མཐོང་བར་ཤོག།
མཐའ་བཞི་འཛིན་པའི་ཞེན་པ་ཞིག་གྱུར་ནས།།
སྟོང་པའི་ངང་ལས་སྣང་ཙམ་ཆོས་དེ་ལ།།
རྟེན་འབྲེལ་ཉིད་དུ་ལས་འབྲས་མི་འཆོལ་བར།།
བླང་འདོར་གནས་ལ་ཡིད་ཆེས་གཏིང་ཟབ་མོས།།
ཕྱིར་མི་ལྡོག་པའི་ངེས་ཤེས་སྐྱེ་བར་ཤོག།
གཏན་གྱི་བདེ་བ་དབེན་པའི་འཁོར་བ་འདིར།།
སྣང་སྲིད་དག་མཉམ་ཆེན་མོ་མ་བརྟོགས་ཀྱང་།།
དུག་སྦྲུལ་ཚང་དང་མེ་འོབས་རོ་མྱག་འདམ།།
མཐོང་སྟེ་ངེས་པར་འབྱུང་བའི་བཅོས་མིན་སེམས།།
དཀའ་ཚེགས་མེད་པར་མྱུར་དུ་སྐྱེ་བར་ཤོག།
སྐྱེ་བ་འདི་ནས་ཚེ་རབས་ཀུན་ཏུ་ཡང་།།
དལ་འབྱོར་བཅོ་བརྒྱད་ཚང་བའི་ལུས་རྙེད་དེ།།
ཕ་མར་གྱུར་པའི་སེམས་ཅན་ཐམས་ཅད་ཀྱི།།
ཞབས་ཏོག་ངམ་ངམ་ཤུགས་ཀྱིས་གྲུབ་འགྱུར་ནས།།
མཐར་ཐུག་ཚོམ་བུ་གཅིག་ཏུ་འཚང་རྒྱ་ཤོག།
༢༠༢༡/༩/༡༢ སྔ་དྲོ་རང་མལ་ནས་རྣམ་རྟོག་གི་ཡིག་རྙོག་སོར་རྩེ་ལས་ཉིལ་བར་བྱས།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།