ཤེས་རབ་རྒྱལ་མཚན་གྱི་སྙན་རྩོམ་ཆེད་བསྒྲིགས།

⊰ ཉིན་ཐོ་ནི་ཅི་ཞིག་རེད། ⊱

རེག་ཟིག ~ ཟིན་ཐོ།

དབྱངས་དང་གསལ་བྱེད་གཉིས་ཀྱི་རྩིག་པ་བརྩིགས་པའི།།

ཉིན་ཐོའི་ཕ་མཁར་མཐོན་པོའི་ནང་ལོགས་བསྔོགས་ནས།།

འདི་ཕྱིའི་འཕྲལ་ཕུགས་ཀུན་ནས་ཀུན་ཏུ་ཕན་པའི།།

སྔོན་བྱོན་མཁས་གྲུབ་དུ་མའི་གླེགས་བམ་མཇལ་བྱུང་།།

ཉིན་ཐོ་འབྲི་བའི་ཡ་རབས་གོམ་གཤིས་མེད་ན།།

བྱུང་རབས་ལོ་རྒྱུས་དེབ་ཐེར་མེ་ལོང་ནང་གི།

མེས་པོ་དམ་པའི་ཤེས་རབ་སྙིང་སྟོབས་འདི་ཀོ།

བུ་ཚ་ང་ཚོས་ད་ལྟ་ཇི་ལྟར་རིག་ཐུབ།།

རྒྱལ་བ་ཤཱཀྱ་ཐུབ་པའི་གསུང་རབ་མན་ཆད།།

ཐ་ཤལ་ང་འདྲས་བྲིས་པའི་ཡིག་ཉོག་ཡན་ཆད།།

ཀུན་ཀྱང་ཉིན་ཐོའི་ནང་དུ་ཐིམ་ནས་ཡོད་པས།།

ད་གཟོད་མྱོང་རོལ་བྱ་རྒྱུའི་སྐལ་བ་ལྡན་སོང་།།

ལོ་རྒྱུས་དེབ་ཐེར་བགྲང་ཡས་གཟའ་སྐར་དབུས་ནས།།

ཉི་མ་ཟླ་བའི་འོད་བཞིན་ལྷག་ཏུ་འཚེར་བའི།།

ལོ་རྒྱུས་བདེན་རྫུན་འབྱེད་པའི་ཐིག་ཤིང་འདྲོང་ཤོས།།

གཟུར་གནས་མཁས་པ་ཀུན་ཀྱི་ཚད་གཞི་འཛིན་ས།།

མཁས་པའི་དབང་པོ་དགེ་འདུན་ཆོས་འཕེལ་མཆོག་གིས།།

རི་བོ་ཧི་མཱ་ལ་ཡའི་ལ་ལུང་བརྒལ་ཏེ།།

ས་མཐའི་རྒྱལ་ཁམས་ཕྲ་ཞིབ་རིག་པས་བསྐོར་བའི།།

གཏམ་རྒྱུད་གསེར་གྱི་ཐང་མ་ཡུལ་སྐོར་ཟིན་ཐོ།།(ཉིན་ཐོ།)

ཆགས་འཇིག་དར་རྒུད་རྒོད་པའི་ལོ་རྒྱུས་ཀྱག་ཀྱོག།

ཚམ་ཚོམ་མུན་པ་འཐིབས་པའི་ནག་ཁུང་ནང་ནས།།

གནའ་བོའི་ཡིག་ཚང་མཇལ་བའི་གློག་ཞུ་གསལ་པོ།།

ཐང་སན་བླ་མའི་ལམ་ཡིག་ཡུལ་སྐོར་ཟིན་ཐོ།།

ཡར་ཐོན་རྒྱལ་ཁབ་ཅན་གྱི་ཕྱི་གླིང་མི་རྣམས།།

ལག་ན་དེབ་དང་སྨྱུ་གུ་འབྲལ་མེད་ཡིན་ཞིང་།།

མཐོང་ཐོས་མྱོང་གསུམ་འགོད་པའི་ཉིན་ཐོ་འབྲི་སྲོལ།།

ཁོང་ཚོའི་འཚོ་བའི་ཁྲོད་ཀྱི་རྒྱུན་ལྡན་ལས་ཀ།

ད་ལྟ་ཧོབ་དེ་ཁ་ལ་བསམ་བློ་བཏང་ན།།

ཉིན་ཐོའི་དགོས་པ་ཆེན་པོ་མཐོང་བར་དཀའ་ཡང་།།

མ་འོངས་ག་ས་གང་དུ་འགྲིམ་པའི་ཚེ་ན།།

ཅི་ཞིག་ཡིན་མིན་ངེས་ཤེས་ངང་གིས་འདྲོང་འོང་།།

གང་ནས་གང་དུ་འཁྱམས་རུང་ཡུལ་ལུང་དེ་གའི།།

ཐུན་མོང་ཐུན་མིན་རིག་གཞུང་གོམ་སྲོལ་གཤིས་ཀ།

མཐོང་ཐོས་མྱོང་བའི་ཡུལ་དུ་གང་གང་གྱུར་པ།།

ཡི་གེ་གཟུགས་སུ་ཕེབ་པའི་མ་ལག་རྩ་ཆེན།།

དཔྱད་རྩོམ་སྙན་རྩོམ་སྒྲུང་རྩོམ་གང་ཞིག་ཡིན་རུང་།།

རྩོམ་ལུས་ཀུན་ཀྱི་ཐོག་མའི་རྨང་གཞི་བརྟན་པོ།།

ནམ་ཞག་རྒྱུན་ལྡན་ཉིན་ཐོ་བྲིས་ནས་བཏིང་བ།།

མཁས་པའི་ཉམས་མྱོང་དག་ལ་བལྟས་པས་ཆོག་གོ།

ལ་ལས་ཁྱོད་ལ་དུས་ཚོད་ཆུད་ཟོས་ཟེར་འོང་།།

ལ་ལས་ཁྱོད་ལ་དུས་ཚོད་མི་འཁྱོངས་ཟེར་འོང་།།

རང་གི་ཕུགས་མདུན་རང་གི་སེམས་ན་ཡོད་པས།།

གཞན་གྱི་ཁ་ལ་མོ་ལུང་ཞུ་དོན་མི་འདུག།

གང་ལྟར་གང་ཞིག་ཟེར་ནའང་ཟེར་དུ་ཆུག་ཤོག།

གོམ་པ་གང་དོ་ཙམ་ཡང་ཕྱིར་ནུད་མ་བྱེད།།

ཆོད་སེམས་དམ་བཅའི་འདུན་པ་བརྟན་པོ་ཆོངས་ལ།།

མདུན་ནས་མདུན་དུ་སྐྱོད་པའི་དབུགས་ཐག་མ་སྟུངས།།

༢༠༢༡/༠༨/༢༠ ཉིན།

⊰ རྒྱལ་ཁ་ཐོབ་པའི་ལྗོངས་རྒྱུ། ⊱

ཟླ་གཅིག་ཟླ་གཉིས་ཙམ་ཞིག་ག་ལ་ག་ལ།།

ཞག་གཅིག་ཞག་གཉིས་དེ་བས་ཚད་རྒྱུ་འདི་རྒྱུ།།

ལོ་ནས་ལོ་མཐུད་དངངས་སྐྲག་དོགས་པའི་ཀློང་ནས།།

མུན་པའི་ཕྲང་ལམ་དོག་པོ་རྡོག་པས་བརྒལ་སོང་།།

མདང་དགོང་མུན་པ་སྟུག་པའི་ས་སྲོད་ནང་དུ།།

ཆར་སྨག་དྲག་རླུང་འཚུབ་མ་འུར་གྱིས་འཚུབས་ཀྱང་།།

དེ་རིང་སྐྱིད་པའི་ལྗོངས་རྒྱུའི་ཉི་མ་འདི་ལ།།

འོད་སྣང་དྲོད་ཁོལ་སྔར་ལས་ལྷག་ཏུ་ཆེ་བྱུང་།།

དམར་སེར་ངུར་སྨིག་མདངས་ཀྱི་མཛེས་པ་ངོམ་དུས།།

ནམ་ཟླ་དབྱར་ཀའི་ཆར་སྤྲིན་སྨུག་པོ་ཡིན་ཡང་།།

ལམ་སང་ནམ་མཁའི་མཐའ་ནས་མཐའ་ལ་གྱེས་ཏེ།།

དེ་རིང་ཉི་མའི་འོད་ལ་ལམ་ཁ་ཕྱེ་སོང་།།

རིན་ཆེན་གསེར་ཐག་བརྐྱངས་འདྲའི་སེར་བང་རིང་མོ།།

ལྷོ་ནས་བྱང་གི་ཕྱོགས་ལ་ནར་སེར་བསྐྱོད་དུས།།

གསེར་མདོག་ཉི་མའི་འོད་ཀྱི་མཛུམ་ཞལ་དྲོན་མོ།།

འདུས་སྡེ་ང་ཚོའི་མིག་ལ་ཅི་འདྲའི་མཛེས་པ།།

༠༦/༡༠/༢༠༢༡

⊰ གོམ་སྣེ་ཕྱི་ལ་བསྒྱུར་པའི་ཉིན་ཐོ་དང་པོ། ⊱

གོམ་སྣེ་ཕྱི་ལ་མ་བསྒྱུར་མ་བསྒྱུར་ནས།།

ལོ་ངོ་གཉིས་ལ་ཉེ་བའི་དེ་རིང་ནི།།

སེམས་པ་གྲོགས་ལ་དཀར་བའི་ཁྱེད་རྣམས་དང་།།

དགའ་དགའ་སྤྲོ་སྤྲོས་རྡོག་སྣེ་ཕྱི་ལ་བསྒྱུར།།

གཅིག་འགྱུར་གཉིས་འགྱུར་ཡོད་ཚད་འགྱུར་ས་ན།།

མ་འགྱུར་མི་འགྱུར་འགྱུར་བ་མེད་པའི་གྲོགས།།

མཛའ་བརྩེ་ཕྱི་ཐག་ཆུ་ལས་རིང་ཡང་རིང་།།

འབྱོར་རུང་རྒུད་རུང་འགྱུར་བ་མ་མཆིས་སོ།།

ཁྲ་ཁྲ་ཟིང་ཟིང་ཡོད་དགུ་འཛོམས་སའི་སྡེ།།

ཀུ་ཤལ་གྲོང་ཁྱེར་ཁྲོམ་རའི་སྲང་ལམ་ཉུལ།།

སྔོན་མའི་ངོ་ཤེས་ཚོང་ཤག་ཙམ་མིན་པར།།

ཚང་མས་སྔར་ལས་ལྷག་པའི་དགའ་སྣང་སྟོན།།

མ་ཐུག་ལོ་ཟླའི་ཕྲེང་བ་རིང་སོང་ཟེར།།

ད་རེས་ཁྱེད་ཅག་ཐུག་པ་དགའ་སོང་ཟེར།།

ད་ནས་སྔར་བཞིན་ཕྱི་བདེ་ནང་བདེའི་ངང་།།

ཕྱི་ནང་འགྲོ་འོང་ཡག་པོ་ཡོང་ངེས་ཟེར།།

ཚུལ་དེར་ཡང་ཡང་བསམས་ཤིང་བསམས་པ་ན།།

ཆོས་སྡེ་ཆེན་མོ་འདི་ཡི་བཀའ་དྲིན་ནི།།

སྲིད་གསུམ་ལེགས་བྱས་མ་ལུས་གཅིག་བསྡུས་ཀྱིས།།

བསྐལ་པ་བསྐལ་པར་གཞལ་ཡང་འཁོར་ཐབས་བྲལ།།

༡༦/༡༠/༢༠༢༡

ཤེས་རབ་རྒྱལ་མཚན། སྔ་འགྱུར་མཐོ་སློབ་ཆེན་མོའི་སློབ་གཉེར་བ།