འབྲི་གུང་སྤྲོ་ཚེས་བརྩམས།
༡
སྲིད་པའི་བྲག་རི་དགུང་སྔོན་དབྱིངས་སུ་ཟུག།
ཆད་མེད་ཆུ་ཆེན་གཡས་གཡོན་གཉིས་ནས་བཞུར།།
རྐང་འཐུང་སྣ་ཚོགས་འདབས་ནས་རྒྱས་ཤིང་སྟུག།
༢
གཡུ་ཐོག་ལྷ་རྗེའི་ཕུག་པ་བརྗིད་ཅིང་རྔམ།།
མི་ལའི་བདུད་འདུལ་ཕུག་པ་ཟབ་ཅིང་འཇམ།།
ཟེ་ཕུག་སྦས་ཕུག་ལུང་བསྟན་ཕུག་སོགས་པའི།།
ཏིང་འཛིན་རོལ་པའི་ཕུག་མང་བྱིན་རླབས་ཆེ།།
༣
ཆུ་གཉིས་འདྲེས་པའི་ཤིང་རྟའི་དབྱིབས་ཀྱི་དབུས།།
ལུང་གསུམ་འདུས་པའི་སྣེ་མོ་ཟུར་གསུམ་སྟེང་།།
གྲུ་བཞི་ཤོ་འདྲའི་དགོན་པ་ངོ་མཚར་ཅན།།
ཆོས་ར་དགེ་འཕེལ་གླིང་འདི་ཉམས་རེ་དགའ།།
༤
གཟུགས་ཅན་མི་ལའི་ཞབས་བརྗིད་གནས་འདིར་གསལ།།
གཟུགས་མེད་ལྷ་མོའི་ཞབས་རྗེས་གནས་འདིར་སྣང་།།
ལས་དག་གཡག་གི་ཞབས་རྗེས་གནས་འདིར་བཞུགས།།
ངོ་མཚར་ཞབས་རྗེས་སྣེ་འཛོམས་གནས་འདི་རྨད།།
༥
རང་བྱུང་མེ་ཏོག་སྣ་བརྒྱ་འདི་ན་བཞད།།
རང་བྱུང་དྲི་བསུང་ངད་པ་འདི་ན་ལྡང་།།
རང་བྱུང་མཁའ་རླུང་གཙང་མ་འདི་ན་འདུག།
གནས་མཆོག་ལ་ཕྱི་གངས་ར་ཨེ་མ་རྨད།།
༦
ཕུ་ན་གངས་དཀར་རི་བོ་བརྗིད་ཅིང་དཀར།།
མདའ་ན་ནགས་རི་སྟུག་པོ་གཡུ་ཡི་མདོག།
བར་ན་བྲག་རི་སྣ་ཚོགས་མཁའ་ལ་བསྙེགས།།
ཕུན་ཚོགས་རི་བོས་མཛེས་པའི་ལ་ཕྱི་གངས།།
༧
སྔོན་དུས་མི་ལ་རས་པས་འདྲེ་ཚོགས་བཏུལ།།
བར་དུ་འབྲི་སྒོམ་ལྔ་ཁྲི་ལྔ་སྟོང་བཞུགས།།
དེང་དུས་ཡང་དར་བསྟན་པའི་མེ་གསོ་བའི།།
སྒྲུབ་བརྒྱུད་བསྟན་པའི་སྒྲུབ་གནས་ངོ་མཚར་ཆེ།།
༨
དབྱར་དུས་བཙུན་མོས་དར་གོས་བསྣབས་པ་བཞིན།།
ས་གཞི་ཐམས་ཅད་མེ་ཏོག་གླིང་དུ་གྱུར།།
སྟོན་དུས་དགེ་སློང་ཆོས་གོས་བཞེས་པ་བཞིན།།
ས་གཞི་ཐམས་ཅད་གསེར་མདོག་ལྷང་ངེར་གྱུར།།
༩
དགུན་དུས་མི་ལས་རས་དཀར་གསོལ་བ་བཞིན།།
ས་གཞི་ཐམས་ཅད་ཁ་བའི་འོག་ན་མནལ།།
དཔྱིད་དུས་དམག་དཔོན་གོ་ཁྲབ་གྱོན་པ་བཞིན།།
ས་གཞི་ཐམས་ཅད་གོ་ཁྲབ་མདོག་སུ་སྣང་།།
༡༠
ལུས་ཀྱི་ནད་སེལ་སྔོ་སྨན་གནས་འདིར་འཁྲུངས།།
སེམས་ཀྱི་ནད་སེལ་དམ་ཆོས་གནས་འདིར་དར།།
ལུས་བདེ་སེམས་སྐྱིད་འབྱུང་བའི་གནས་མཆོག་ཆེ།།
ལ་ཕྱི་གངས་རའི་ངོ་མཚར་བརྗོད་ལས་འདས།།
༡༡
དྭངས་གཙང་ཆུ་མོ་འོ་མ་ལས་ཀྱང་ཞིམ།།
སྣ་ཚོགས་ཚོད་མ་མ་བཏབ་རང་བྱུང་འཁྲུངས།།
རང་བཞིན་ལྷུན་གྲུབ་ལ་ཕྱི་གངས་ཀྱི་ར།།
སྐལ་ལྡན་སྐྱེས་བུའི་དོན་གཉིས་སྒྲུབ་པའི་གནས།།
༡༢
བག་ཕེབས་རི་དྭགས་སྣ་ཚོགས་གནས་འདིར་རྒྱུ།།
བྱ་དང་བྱེའུའི་གསུང་དབྱངས་གླིང་བུ་བཞིན།།
གདུག་པའི་སེམས་ཅན་འཚེ་བ་འདི་ན་བྲལ།།
བག་ཕེབས་ཞི་བདེའི་གནས་འདི་སུམ་རྩེན་བཞིན།།
༡༣
མི་ཚེ་བློས་བཏང་བྱ་བྲལ་སྒོམ་ཆེན་ཀུན།།
འདོད་ཆུང་ཆོག་ཤེས་རིམ་གཉིས་སྒྲུབ་ལ་བྲེལ།།
མཇལ་ན་མི་ལ་རས་པ་གཉིས་པ་བཞིན།།
སྐྱེས་བུ་དམ་པའི་རང་གཤིས་གསལ་བར་མངོན།།
༡༤
གོང་མའི་བསམ་གཏན་ཁང་བུ་ཉམས་དགའི་ནང་།།
མཐུན་བཞིའི་ཉམས་ལེན་བདེ་བས་འཚོ་བཞིན་དུ།།
གོང་མའི་བྱིན་རླབས་གྲུ་ཆར་ཟིལ་མ་ཡིས།།
རྟོགས་པའི་ཡོན་ཏན་རྩི་ཤིང་རྒྱས་བཞིན་མཆིས།།
༡༥
ཚེ་འདི་མི་རྟགས་གཟིགས་པའི་བྱིན་རླབས་ཀྱིས།།
ཟང་ཟིང་བདུད་ཀྱི་ཀ་ཅར་ཞེན་པ་ཆུང་།།
མི་མེད་དབེན་པའི་གནས་སུ་སླེབས་པ་བཞིན།།
བསམ་གཏན་ཁང་དྲུང་རྩྭ་དང་རྩི་ཤིང་རྒྱས།།
༡༦
གསར་བུའི་སྒྲུབ་པོ་སྔོན་འགྲོ་སྒྲུབ་ལ་ཞོལ།།
འགའ་ཞིག་ཡི་དམ་ལྷ་ཡི་བསྙེན་པར་འབད།།
འགའ་ཞིག་ལོ་གསུམ་འདག་སྦྱར་དམ་པོར་བཞུགས།།
འགའ་ཞིག་དུས་ཀུན་ཕྱག་རྒྱ་ཆེན་པོར་རོལ།།
༡༧
གནས་འདིར་སླེབས་ན་མི་ལའི་ཡོན་ཏན་དྲན།།
གནས་འདིར་བསྡད་ན་མི་ལའི་བྱིན་རླབས་ཐོབ།།
གནས་འདི་བསྟེན་ན་རྟོགས་པའི་ཡོན་ཏན་རྒྱས།།
གནས་འདི་སྒྲུབ་བརྒྱུད་དམ་པའི་ཕ་ས་ལགས།།
༡༨
གོ་ད་ཝ་རི་སྣ་བ་གཡོན་པའི་གནས།།
ལ་ཕྱི་གངས་ར་བདེ་མཆོག་ཕོ་བྲང་ཆེ།།
མ་ཚོགས་མཁའ་འགྲོ་སྤྲིན་ལྟར་འཐིབས་པའི་ས།།
མཁའ་སྤྱོད་ཐུགས་ཀྱི་འཁོར་ལོའི་ལྷ་གནས་རྨད།།
༡༩
སྒྲུབ་པའི་མཐུན་རྐྱེན་ཆུ་ཤིང་འཛོམས་པའི་ས།།
སྒྲུབ་པའི་བར་ཆད་འདུ་འཛི་བྲལ་བའི་གནས།།
སྒྲུབ་བརྒྱུད་སྐྱེས་བུ་དམ་པས་བྱིན་རླབས་པའི།།
གནས་གསུམ་ཡ་གྱལ་ལ་ཕྱི་གངས་ཀྱི་ར།།
༢༠
དཔའ་བོ་དགྲ་ལྷ་དཔའ་མོ་བློ་གྲོས་མའི།།
གནས་ཡུལ་གྱུར་པ་གོ་ད་ཝ་རི་ཞེས།།
སྙན་པའི་གྲགས་པ་འཛིན་མའི་ཁྱོན་འབར་བའི།།
ཉེར་བཞིའི་ཡུལ་གྱི་ཡ་གྱལ་འདི་ཉིད་རྨད།།
༢༡
བལ་ལུ་སྤ་མ་སྤང་སྤོས་ལ་སོགས་པའི།།
རང་བྱུང་སྤོས་ཀྱི་དྲི་ངད་གནས་འདིར་ལྡང་།།
སྣ་ཚོགས་ཤ་མོ་འབེལ་ཅིང་བྲོ་བ་ཞིམ།།
ཉམས་དགའི་གནས་མཆོག་ལ་ཕྱི་གངས་ཀྱི་ར།།
༢༢
ཟིམ་ཟིམ་ཆར་གྱི་བདུད་རྩི་མཁའ་ལས་འཕྱོ།།
འབྲུག་སྒྲ་གློག་དང་ཐོག་སེར་མིག་རྣར་དབེན།།
འཇའ་ཚོན་ཕྲེང་བའི་དྲ་བས་སྦྲེལ་བའི་དབུས།།
འཁོར་ལོ་སྡོམ་པའི་ཕོ་བྲང་བརྗིད་རེ་ཆགས།།
༢༣
ཆོས་སྐུ་སྐྱེ་མེད་སྟོང་གསལ་མཁའ་དབྱིངས་སུ།།
ལོངས་སྐུ་མ་འགག་རང་ཤར་འཁོར་ལོ་སྡོམ།།
སྤྲུལ་སྐུའི་ཕོ་བྲང་དཀྱིལ་འཁོར་ནང་བཞུགས་པའི།།
ལ་ཕྱི་དཔལ་གྱི་རི་བོ་ཨེ་མ་རྨད།།
༢༤
ཉེར་བཞིའི་གནས་ཀྱི་ཡ་གྱལ་གོ་ད་ཝར།།
མར་པས་མི་ལར་ལུང་དུ་བསྟན་པའི་གནས།།
ས་བཅུའི་མགོན་པོ་འབྲི་གུང་པ་དེ་ཡི།།
འཕྲིན་ལས་ཕྱོགས་བཅུར་ཁྱབ་གནས་ལ་ཕྱི་གངས།།
༢༥
རྒྱལ་བ་འབྲི་གུང་པ་ཡི་གནས་གསུམ་ཞེས།།
ཏི་སེ་ལ་ཕྱི་ཙ་རི་གངས་ཀྱི་ར།།
སྐུ་གསུང་ཐུགས་ཀྱི་འཁོར་ལོའི་གནས་གསུམ་གྱི།།
ཡ་གྱལ་གསུང་གི་གནས་མཆོག་ལ་ཕྱི་རྨད།།
༢༦
ཞོ་འཐུང་རུས་པ་གནམ་དུ་ཀེར་འདྲ་བའི།།
སྲིད་པའི་བྲག་ལ་སྒྲུབ་པའི་ཕུག་པ་མང་།།
ལས་ཅན་རྣམས་ལ་མཆོག་མཐུན་དངོས་གྲུབ་ཐོབ།།
དམ་ཉམས་རྣམས་ཀྱི་ཚེ་སྲོག་ཚོགས་སུ་རོལ།།
༢༧
མཐོན་མཐིང་ནམ་མཁའི་དབྱིངས་ལ་ཟུག་པ་ཡི།།
བྲག་རི་གཡང་གཟར་ཅན་གྱི་མགུལ་དག་ཏུ།།
རང་བཞིན་ལྷུན་གྲུབ་སྒྲུབ་ཆུ་རང་བྱུང་ཅན།།
གྲུབ་བརྒྱའི་གཙུག་རྒྱན་མི་ལའི་ཟེ་ཕུག་རྨད།།
༢༨
འོད་གསལ་ཟེ་བ་ཕུག་གི་གཡོན་ངོས་སུ།།
མི་ལ་རྗེ་དང་མཁའ་འགྲོ་ཚེ་རིང་མའི།།
ཞབས་ཀྱི་རེ་ཁ་རྡོ་ལ་བཀོད་པའི་རྗེས།།
ཆུ་བུར་མིག་ངོར་ལྷང་ངེར་གསལ་འདི་མཚར།།
༢༩
རས་ཆེན་མཁའ་སྤྱོད་སྒྲུབ་པའི་ཕུག་པའི་ལྡེབ།།
རས་ཆེན་མི་ལའི་ཞབས་རྗེས་ངོ་མཚར་ཅན།།
རས་པ་ཀུན་གྱི་སྒྲུབ་མཆོད་ཞལ་ཡས་ཁང་།།
རས་ཆེན་སྒྲུབ་ཕུག་བྱིན་ཅན་འདི་ཉིད་རྨད།།
༣༠
དབྱར་དུས་དར་དཀར་ཐུར་དུ་འཕྱང་འདྲ་བའི།།
བྲག་རིའི་ངོས་ལ་འབབ་ཆུ་བསམ་ལས་འདས།།
དགུན་དུས་གྲང་ལྷག་ངར་ཁ་བཙན་ན་ཡང་།།
ནམ་ཡང་ཆད་མེད་སྦས་ཕུག་ལྷ་ཆུ་མཛེས།།
༣༡
འདྲེ་ལུང་སྐྱོར་མོ་ལྷ་ལུང་བསྒྱུར་བའི་རྗེས།།
ཁ་བ་ཉིན་མཚན་བཅོ་བརྒྱད་འབབས་པའི་དུས།།
ཟླ་དྲུག་ཕྱག་ཆེན་རོལ་ནས་བཞུགས་པའི་གནས།།
བདུད་འདུལ་ཕུག་མོ་ཆེ་དེ་ཨེ་མ་རྨད།།
༣༢
ཤུགས་དྲག་བཞུར་བའི་ཆུ་བོའི་གཡས་འགྲམ་དུ།།
གཏུམ་དྲག་གཉན་པའི་སྒྲུབ་ཕུག་ངོ་མཚར་ཅན།།
དར་དྲག་སྐྱེས་བུ་དམ་པ་བཞུགས་པའི་གནས།།
ཞེ་དྲག་རྩ་བ་ཆེ་བའི་ལུང་བསྟན་ཕུག།
༣༣
སྔར་འདས་བྱ་བཏང་རི་ཡི་བུ་རྣམས་ཀྱི།།
གནས་འདིར་མི་ཚེའི་སྙིང་པོ་སྒྲུབ་པའི་ཤུལ།།
བྱིན་ཆེན་ཕུག་པ་སྣ་མང་གིས་ཁེངས་པའི།།
སྒྲུབ་པའི་གནས་མཆོག་ལ་ཕྱི་གངས་ར་རྨད།།
༣༤
མི་ལ་རྗེ་དང་བཀའ་བརྒྱུད་གོང་མ་ཚོའི།།
བྱང་ཆུབ་སྒྲུབ་གནས་འདི་ཉིད་མཇལ་བ་ན།།
སྔར་མེད་ཡིད་ལ་དགའ་དད་འཕེལ་བ་དང་།།
རང་རྒྱུད་འདི་ཡང་འཇམ་པོར་འགྱུར་བར་ངེས།།
༣༥
དལ་འབྱོར་ལན་གཅིག་ཙམ་འདི་ཐོབ་པ་འདི།།
རྩ་ཆེན་བསམ་ན་གནས་འདིར་ལན་གཅིག་ཕེབས།།
བྱིན་ཆེན་བསམ་ན་གནས་འདིར་ལན་གཅིག་སྒོམས།།
མི་ཚེའི་སྙིང་པོའི་ནོར་མཆོག་ཐོབ་པར་ངེས།།
༣༦
ཚེ་འདི་མི་རྟག་རླུང་ནང་མར་མེ་འདྲ།།
མི་མཐུན་རྐྱེན་ངན་བསམ་པའི་ཡུལ་ལས་འདས།།
ལུས་སེམས་སོ་སོར་མ་གྱེས་ཙམ་འདིའི་ནང་།།
ལ་ཕྱི་གངས་ཀྱི་ར་བར་ལན་གཅིག་ཕེབས།།
༣༧
རྩ་ཆེན་གནས་བཟང་འདི་འདྲའི་མཚན་ཐོས་པ།།
སྔར་འདས་བསྐལ་མང་དགེ་ལ་སྤྱོད་པའི་དྲིན།།
འདི་འདྲའི་དུས་བཟང་ཆུ་ཟོས་མ་བཏང་བར།།
དགེ་བའི་ལས་ལ་སྤྱོད་པར་མྱུར་དུ་ཕེབས།།
༣༨
འཁོར་བ་སྲིན་མོའི་གླིང་ལས་ཐར་འདོད་ན།།
གནས་མཆོག་ལ་ཕྱི་རྟ་མཆོག་སྤྲིན་ཤུགས་ཅན།།
བཞོན་པའི་བསམ་པ་ངེས་འབྱུང་སྐྱེས་བྱས་ནས།།
ཕྱིར་བལྟས་མེད་པར་ཕེབས་ཤོག་གྲོགས་བཟང་ཚོ།།
༣༩
ཡང་དག་དམ་པའི་ལམ་དུ་བཞུགས་འདོད་ན།།
ཕྱི་ནང་གཉིས་ཀྱི་དབྱེ་བ་འབྱེད་འདོད་ན།།
སྡོམ་པ་ཀུན་གྱི་རྩིག་རྨང་གདིང་འདོད་ན།།
སྐྱབས་སྡོམ་ཞུ་བར་ལ་ཕྱི་གངས་དུ་ཕེབས།།
༤༠
མི་དགེའི་སྡིག་སྒྲིབ་ཡོངས་རྫོགས་བཀྲུ་འདོད་ན།།
སྟོབས་བཞིའི་འདག་ཕྱེས་ཉེས་ཚོགས་བཀྲུ་འདོད་ན།།
ལུས་སེམས་ཤེལ་བུམ་ལྟར་དུ་གཙང་འདོད་ན།།
རྡོར་སེམས་སྒོམ་དུ་ལ་ཕྱི་གངས་དུ་ཕེབས།།
༤༡
ཚོགས་གཉིས་ནོར་བདུན་བང་བ་འགེངས་འདོད་ན།།
བྲལ་འབྲས་རྣམ་སྨིན་ཡོན་ཏན་ཐོབ་འདོད་ན།།
དགེ་ལེགས་འབྱུང་བའི་རྒྱུ་བཟང་སྒྲུབ་འདོད་ན།།
མཎྜལ་འབུལ་དུ་ལ་ཕྱི་གངས་རར་ཕེབས།།
༤༢
འབྲལ་མེད་སྙིང་གི་དབུས་དང་སྤྱི་བོའི་གཙུག།
ཆོས་སྐུའི་ངོ་བོར་བཞུགས་པའི་གཟི་བརྗིད་ཅན།།
བྱིན་རླབས་བདུད་རྩི་གནང་བའི་དྲིན་ཆེན་རྗེ།།
ཀུན་འདུས་བླ་མ་སྙེན་ན་ལ་ཕྱིར་ཕེབས།།
༤༣
བྱང་ཆུབ་སེམས་ཀྱི་ཞིང་ས་ལ་ཕྱི་གངས།།
བྱང་ཆུབ་སྤྱོད་པའི་སྒྲུབ་གནས་ལ་ཕྱི་གངས།།
བྱང་ཆུབ་དམ་པའི་གོ་འཕང་འཚོལ་འདོད་རྣམས།།
བྱང་སེམས་བསྐྱེད་ལ་ལ་ཕྱི་གངས་དུ་ཕེབས།།
༤༤
འཁོར་ལོ་སྡོམ་པའི་ཕོ་བྲང་འདི་ན་མཆིས།།
ཡི་དམ་ལྷ་ཡི་དཀྱིལ་འཁོར་འདི་ན་འདུག།
མཆོག་ཐུན་དངོས་གྲུབ་འདོད་པའི་རྡོ་རྗེའི་སྤུན།།
མ་འགྱངས་མྱུར་བར་ལ་ཕྱི་གངས་དུ་ཕེབས།།
༤༥
ཡོན་ཏན་ལྔ་ལྡན་ངོ་བོ་ཐོབ་འདོད་ན།།
ཆོས་སྐུ་སྐྱེ་མེད་རྒྱལ་ས་འཛིན་འདོད་ན།།
ལོངས་སྐུ་འགག་མེད་དབྱིངས་ན་བཀྲ་འདོད་ན།།
སྤྲུལ་པའི་སྐུ་རྣམས་ལ་ཕྱི་གངས་དུ་ཕེབས།།
༤༦
ཆོས་ཀུན་གཤིས་བབ་རྗེན་པར་མཐོང་འདོད་ན།།
བཟུང་འཛིན་སྤྲོས་པའི་མཐའ་ལས་འདས་འདོད་ན།།
འཁོར་འདས་ཕྱག་རྒྱ་ཆེན་པོར་རོལ་འདོད་ན།།
ལ་འུར་ལ་འུར་ལ་ཕྱི་གངས་དུ་ཕེབས།།
༤༧
བྱང་ཆུབ་སེམས་མཆོག་ཡིད་བཞིན་ནོར་བུ་ཡིས།།
ཁམས་གསུམ་འགྲོ་ལ་བདེ་སྐྱིད་བསྐྲུན་འདོད་ན།།
ནམ་ཡང་འཛད་མེད་བསྔོ་བས་རྒྱས་གདབ་ཕྱིར།།
དགེ་རྩ་བསྔོ་བར་ལ་ཕྱི་གངས་དུ་ཕེབས།།
༤༨
ཟང་ཟིང་འདུ་འཛིའི་བར་ཆད་འདི་ན་མེད།།
ཐ་གཉིས་མ་ལྷུང་འཚོ་གོས་གནས་མལ་གསུམ།།
རྩོལ་སྒྲུབ་མི་དགོས་ཤུགས་འབྱུང་ངོ་མཚར་ཅན།།
རང་བཞིན་དག་པའི་གནས་འདིར་ཅིས་མི་བསྔགས།།
༤༩
ལས་དང་ལས་ཀྱིས་འབྲེལ་བའི་བཤེས་གཉེན་དང་།།
གཉེན་དང་ཉེ་བ་མཛའ་བའི་གྲོགས་རྣམས་ལ།།
ཟང་ཟིང་ནོར་གྱིས་ལེགས་བསྐྱེད་མ་མཆིས་ཀྱང་།།
ཆོས་སྐྱེས་པད་མ་དཀར་པོ་འདི་ཕུལ་ན།།
༥༠
ལ་ཕྱིའི་གནས་ཀྱི་ཡོན་ཏན་དྲན་བྱས་ཏེ།།
མཐའ་མེད་འཁོར་བའི་སྡུག་བསྔལ་ཞི་བའི་ཆེད།།
བློ་ཐག་རྦད་ཀྱིས་བཅད་ནས་གནས་བཟང་འདིར།།
ཞབས་ཀྱི་རེ་ཁ་ཅིས་ཀྱང་འཇོག་པར་འཚལ།།
༥༡
འདི་བྲིས་དགེ་བས་མཐའ་ཡས་མ་རྒན་རྣམས།།
གནས་སྐབས་མཐོ་རིས་བདེ་ཐོབ་དགེར་སྤྱོད་ཅིང་།།
མཐར་ཐུག་མགོན་མེད་ཆོས་སྐུའི་རྒྱལ་ས་ཆེར།།
མྱུར་དུ་འབྱོར་བར་བསྔོ་བས་རྒྱས་བཏབ་བོ།།
༢༠༢༡/༠༩/༢༡ འབྲོག་ལ་ཕྱི་གངས་ཀྱི་ར་བའི་ཆོས་ར་དགེ་འཕེལ་གླིང་ནས་རྒྱལ་ཁམས་པ་སྤྲོ་ཚེས་སོ།།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།