རང་སེམས་བདེ་བའི་གླུ།

གཙང་ཐ་མཁའ་འགྲོ་བསམ་གཏན་ཆོས་སྒྲོན།

གླུ་ཨ་ལ་ཐ་ལའི་དབྱངས་རྟ་འདིས། །

སྐྱབས་དྲིན་ཆེན་རྩ་བའི་བླ་མ་དང་། །

གྲོགས་སྣང་སྲིད་དགྲ་བླ་ཝེར་མ་འབོད། །

བློ་ཆོས་དང་འདྲེས་པའི་སྡོངས་གྲོགས་མཛོད། །

གནས་ལྷོ་བྲག་མཁར་ཆུའི་ཡང་དབེན་ན། །

ཕྱི་ཡུལ་སྣང་སྨུག་པ་དམ་དུམ་ཁྲོད། །

མ་འཁྱམས་མོ་བསམ་གཏན་ཆོས་སྒྲོན་ཞེས། །

སེམས་རྣམ་རྟོག་འཕྲོ་རྒོད་ཅན་ཞིག་ཡོད། །

སྐབས་རེ་འགའ་སྤྲོ་ལ་རེ་འགའ་སྐྱོ། །

སེམས་ལོས་སྤྲོ་ས་སྤྱོད་ཞིང་ཁམས་མཇལ། །

ཡང་ལོས་སྐྱོ་སེམས་རྒྱུད་རྒོད་ལ་ཤོར། །

ཡིད་དགའ་སྐྱོ་སྤེལ་མས་ཐུན་མཚམས་ཡིན། །

སྔོན་མཁན་སློབ་ཉི་ཟླ་ཞལ་མཛོམས་དུས། །

རྗེ་དགེ་སློང་ནམ་མཁའི་སྙིང་པོ་མཆོག །

གནས་འདི་ནས་གྲུབ་པ་ཐོབ་པ་དེ། །

ཁོང་རྩེ་གཅིག་སྒྲུབ་བརྩོན་ཆེ་བས་རེད། །

དུས་སྙིགས་མའི་ནང་གི་ཡང་མཐའ་འདིར། །

ལུས་སྒྲུབ་ཚུགས་མེད་པ་བདག་ལྟ་ལ། །

རྟགས་དངོས་གྲུབ་དཀའ་ཡང་སྔོན་སྨོན་གྱི། །

འཕྲོ་ལོས་ཡིན་བསམ་ན་ཞེ་སེམས་བདེ། །

མོ་ཆོས་བརྒྱད་ཆེ་ཟེར་བཤད་ན་བཤད། །

བློ་ཆོས་ལ་འཁོར་བ་འདི་ཡིས་ཆོག །

མོ་དྲན་འཕྲུལ་རྒོད་ཟེར་གླེང་ན་གླེང་། །

གནས་དབེན་རིར་མོས་པ་འདི་ཡིས་ཆོག །

མོ་གྲགས་འདོད་རེད་ཟེར་འབར་ན་འབར། །

ནང་ཀུན་སློང་མི་བཙོག་འདི་ཡིས་ཆོག །

མོ་རང་དོན་ཆེ་ཟེར་བསྒྲགས་ན་བསྒྲགས། །

སྨན་རང་མགོ་འཁྱོངས་པ་འདི་ཡིས་ཆོག །

ཕྱི་བརྒྱ་སྡེའི་བཤད་ཡམས་ལྡང་ན་ལྡང་། །

ནང་རང་སེམས་ནོན་པ་འདི་ཡིས་ཆོག །

བན་སྐྱ་སེར་ངོ་སྲུང་བོར་ན་བོར། །

སྐྱབས་བླ་མ་བརྗེད་མེད་འདི་ཡིས་ཆོག །

གཞན་འགྲན་སེམས་མེ་ལྕེ་རྣོ་ན་རྣོ། །

མ་རང་ཚུགས་མ་ཤོར་འདི་ཡིས་ཆོག །

ཚེ་སྐྱིད་སྡུག་གང་ཞིག་བྱུང་ན་བྱུང་། །

ལས་རྒྱུ་འབྲས་ཡིད་ཆེས་འདི་ཡིས་ཆོག །

མ་མཁའ་འགྲོ་རེད་ཟེར་བསྟོད་ན་བསྟོད། །

རྟགས་རྟེན་འབྲེལ་གཙང་མ་འདི་ཡིས་ཆོག །

མོ་འདྲེ་མོ་རེད་ཟེར་སྨད་ན་སྨད། །

སེམས་སྙིང་རྗེ་ཕྲ་མོ་འདི་ཡིས་ཆོག །

ཆོས་ཐེག་དགུའི་ཁ་བཤད་མི་མཁས་ཀྱང་། །

སེམས་བློ་སྦྱོང་ཅུང་ཙམ་ཤེས་འདིས་ཆོག །

ལམ་བསྐྱེད་རྫོགས་སྤྲོས་པ་མི་ཤེས་ཀྱང་། །

རྗེ་བླ་མའི་གདམས་ངག་འདི་ཡིས་ཆོག །

ངག་བདེ་བདེའི་ལྟ་མགུར་མི་སྙན་ཡང་། །

གླུ་ཨ་ལའི་འགུག་སྟངས་འདི་ཡིས་ཆོག །

ཨ་ལ་ལ་ལ་ཧོ་ཆོག་པ་ལ། །

༢༠༢༡/༡༠/༠༣ ཉིན་གཙང་ཐ་བསམ་གཏན་ཆོས་སྒྲོན་གྱིས་གནས་ལྷོ་བྲག་མཁར་ཆུ་ནས་རྐྱེན་ཞིག་གིས་གླུ་རུ་བླངས་སོ།།

ཡོང་ཁུངས། རིགས་སྲས་ལུགས་གཉིས་ཕོ་ཉའི་གླིང་།