སློབ་སྤྲུལ་ཚེ་རིང་དབང་འདུས།
འཁོར་བ་ནི་སྡུག་བསྔལ་རང་བཞིན་ཟེར།།
བདག་ཉིད་ནི་བདེན་འཛིན་བཅིངས་དྲགས་ནས།།
སྡུག་བསྔལ་དུ་མ་ཤེས་ཡུན་རིང་འཁྱམས།།
ཡུལ་སྣང་གི་མཛེས་སྡུག་དཔག་མེད་འདི།།
སྒོ་ལྔ་ཡི་ཤེས་པས་བློས་གཏོང་དཀའ།།
ཆོས་གཟུགས་ཀྱི་མིང་ཙམ་འཛིན་འཛིན་ནས།།
གློ་ཁ་འདི་ཆོས་ཕྱོགས་འགྱུར་བར་དཀའ།།
བདེན་མེད་དང་རྟེན་འབྲེལ་བཤད་བཤད་ནས།།
བགྲང་བྱ་ཡི་ཐེམ་སྐས་བརྒལ་ཐེངས་རེར།།
ངོ་གདོང་གི་གཉེར་རིས་བསྟར་ལ་བསྒྲིགས།།
ད་དུང་ཡང་ཚིག་གི་གཟེགས་མ་ལ།།
མགོ་བོ་འདི་གདུགས་ལྟར་འཁོར་བཞིན་གནས།།
མི་ཚེ་ནི་དབང་པོའི་གཞུ་རིས་བཞིན།།
སྐད་ཅིག་ཏུ་འཆར་ཞིང་ཡུད་ཀྱིས་འགག།
མཐའ་མཇུག་གི་གོམ་པ་འདོར་ས་ནི།།
དུར་ཁྲོད་ཀྱི་མི་མེད་ལུང་སྟོང་ངོ་།།
འདིར་སྣང་གི་འཇོ་སྒེག་མཚར་སྡུག་ལ།།
ཞེན་ཆགས་ཀྱི་བརྩེ་སེམས་དྲག་ཏུ་འཕྱུར།།
མི་བརྟན་པའི་རང་བཞིན་ཤེས་ན་ཡང་།།
གནད་གསང་འདི་ཁ་ལྕེའི་དབར་ལ་ཐིམས།།
འདོད་ཆགས་ཀྱི་མེ་སྟག་ཚ་ཚ་འབར།།
ཞེ་སྡང་གི་ཁྲོ་གཉེར་འཇིགས་སུ་རུང་།།
གཏི་མུག་གི་ལིང་ཏོག་སྟུག་པོར་བསྒྲིབས།།
དུག་གསུམ་གྱི་ལྷགས་པ་དྲག་ཏུ་ལྡང་།།
མགོ་བོ་འདི་སྔས་མགོར་བསྙེས་ཙ་ན།།
རྣམ་རྟོག་གི་འཆར་སྣང་ཚད་མེད་བསྐྲུན།།
གློ་བུར་དུ་ཆུ་འཛིན་འཐིབས་པ་བཞིན།།
འདས་མ་ཡི་རྐང་རྗེས་རྩད་བཅད་ཚེ།།
མི་ཚེ་འདི་འཇིགས་རུང་གཡང་ས་ལྟར།།
དགའ་སྤྲོ་ཡི་སྙིང་ཁོང་འཛུམ་མེར་མེར།།
ཉ་གང་གི་ཟླ་བའི་དཀྱིལ་འཁོར་བཞིན།།
འདྲེན་བྱེད་དུ་སྣང་ཡང་ཡུད་ཙམ་རྗེས།།
སྒྱུ་ལུས་འདི་གཟེར་གྱིས་ཕུག་པ་བཞིན།།
ན་ཟུག་གི་སྨྲེ་སྔགས་དབང་མེད་ཤོར།།
སྡུག་བསྔལ་གྱི་དམྱལ་བའི་མེ་དོང་ནང་།།
ཚུད་པ་ལྟར་འཁོར་བའི་སྣང་ལུགས་མཚར།།
དེ་རིང་གི་མཐོང་བའི་མེ་ཏོག་དེ།།
སང་ཉིན་ནི་ཆར་རླུང་དྲག་པོས་བཅོམ།།
གནངས་ཉིན་ནི་རུལ་དྲི་ལྡང་བཞིན་དུ།།
ཐེ་མཛུབ་བར་བཙིར་ཞིང་འབྱོལ་ཐབས་བྱས།།
མཛེས་པོ་དང་ཡིད་འོང་གཟུགས་རིས་རྣམས།།
ཀུན་རྟོག་གིས་བཏགས་ཤིང་གཡམ་རྒྱུག་བྱས།།
སྲེད་པ་ཡིས་ལྕགས་སྒྲོག་དམ་དུ་བཅིངས།།
བཙོན་ར་ཡི་གཟེབ་ཏུ་སྔ་ནས་ཚུད།།
མཛེས་པ་ཡི་བཀྲག་མདངས་ཡོད་ཚད་ཀུན།།
སྲང་ལམ་གྱི་སྐྱུག་བྲོའི་རང་གཤིས་བཟུང་།།
ལེགས་ཉེས་ཀྱི་སེམས་ཀྱིས་འཛིན་སྟངས་དེ།།
དྲན་བཞིན་དུ་སྙིང་ཤ་འདར་ཁྱོམ་ཁྱོམ།།
དེ་འདྲ་ཡི་འཁོར་བའི་སྣང་ལུགས་རྣམས།།
མ་བཅོས་ཤིང་སྲོང་པོར་བརྗོད་པ་སྟེ།།
སྙན་ངག་གི་སྒྲོ་བཏགས་དེ་བས་མིན།།
རྣམ་དཔྱོད་ཀྱིས་གཞལ་བའི་གཏན་ཚིགས་སོ།།
རྩོམ་པ་པོའི་ངོ་དེབ་ནས་བཤུས།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།