ཡལ་བཞིན་པའི་སེམས་ཀྱི་འོད་སྣང་།

བསྟན་འཛིན་ལེགས་གྲུབ། སྔ་འགྱུར་མཐོ་སློབ་ཆེན་མོ།

མི་ཚེ་ཟེར་བ།

མི་ལོ་དྲུག་ཅུའི་ཚད་དུ་བཏང་ན།

ད་ཚོད་ང་ཡི་མི་ཚེ་ཕྱེད་ཀ་རྫོགས་ཟིན་ཐལ་ཏེ།

འདས་ཟིན་མི་ཚེ་ཕྱེད་ཀའི་མི་ལོ་དགུ་ཡི་རིང་ཕ་མ་སྤུན་ཟླ་འཛོམས་སར།

གཞན་ལ་འཛེམ་དོགས་མེད་པའི་ང་རང་བྱིས་པ་ཡིན་དུས་རེད།

དེ་དུས་ཀྱི་སེམས་པ། དྭངས་ཤིང་གཙང་བའི་འོ་མ་འདྲ་བ།

དེ་དུས་ཀྱི་ང་རང་། འཛུམ་གྱིས་ཁེངས་པའི་མེ་ཏོག་འདྲ་བ།

མི་ཚེ་བདེ་སྐྱིད་ངང་བསུས་ཤིང་།

མི་ཚེ་སེམས་ཀྱིས་འཚོ་བའི་དུས་ཤིག་རེད།

དེ་དུས་ཟས་ལ་བཅུད་ཅིག་ཡོད།

དེ་དུས་སེམས་ལ་འོད་ཅིག་ཡོད།

དེ་དུས་ཁོག་ལ་དྲོད་ཅིག་ཡོད།

དེ་དུས་གདོང་ལ་འཛུམ་ཞིག་ཡོད།

ཨ་སྔོན་དབྱིངས་ཀྱི་སྤྲིན་དཀར་མཛེས་པའི་འོག་ན་རེད།

རྩ་ལྗང་ལོ་ཐིང་ངེར་ཡོད་ས།

མེ་ཏོག་སྣ་ཚོགས་ཁྲ་མེར་སྐྱེ་ས།

རི་ལུང་ཐང་གསུམ་དགོད་སྒྲས་ཁེངས་ས།

ཕ་མ་བཟང་པོའི་བྱམས་སྐྱོང་འོག་ནས།

ཆུང་ནས་འདྲིས་པའི་གྲོགས་པོའི་ལྷན་དུ།

སེམས་པའི་ནང་དུ་སྤོབས་པ་ཡོད་དུས་རེད།

ད་བཟོད་ངས་གང་ནས་བསམས་ཀྱང་ཆུང་དུས་སེམས་ལ་འོད་སྣང་ཞིག་དང་།

སྐྱིད་སྣང་ཞིག་ཡོད།

རང་ལོ་བཅུ་པར་སློབ་གླིང་ཐོག་མར་འགྲིམས་པ་ནས།

ལྷད་མེད་ཀྱི་སེམས་ཁོང་ན་ང་ཚོའི་ཡི་གེ

ང་ཚོའི་སྐད་རིགས། ང་ཚོའི་རིག་གཞུང་། ང་ཚོའི་ཆོས་ལུགས།

ང་ཚོའི་འགྲོ་སྲོལ་འདུག་སྲོལ་སོགས་བསླབས་པ་ནས་བཟུང་།

འོ་ཆུ་འདྲ་བའི་སེམས་ཁོང་ན།

ཀུན་རྟོག་ཉ་མོའི་གཤོག་རྩལ་རྒྱས་ཤིང་།

བཟང་ངན་འཛིན་པའི་སྤྲིན་ནག་འཁྲིགས་ཏེ།

ང་ཁྱོད་བཤད་པའི་འབྲུག་སྒྲ་དིར་བས།

སྐབས་འགར། གྲྭ་ས་ནས་གྲྭ་སར་སྐྱིད་སྣང་ཚོར་ལ།

སྐབས་འགར། གྲྭ་ས་ནས་སྐྱ་སར་སྐྱིད་སྣང་ཤར་ཤིང་།

གང་ལྟར། ཆོས་དང་འཇིག་རྟེན་གང་གི་ཡང་ལམ་བུར་བསྙེགས་མི་ཐུབ་པའི་བར་དོའི་སེམས་པ་བཞིན་གང་སར་འཕྱན་ཏེ། མི་ཚེའི་གོ་བ་མ་རྙེད།

དམིགས་ཡུལ་གྱི་སྣེ་མ་ཟིན།

ཕར་མེད། ཚུར་མེད། བྱ་མ་བྱིའི་ཕ་ལྦང་བཞིན།

མི་ཚེ་ཁ་བྱང་མེད་པའི་ལམ་ཕྱོགས་ནས།

ཉིན་རེར་སེམས་ནང་གི་འོད་སྣང་དང་།

སྐྱིད་སྣང་ཇེ་ཡལ་ཇེ་ཆུང་དུ་འགྲོ་བ།

སེམས་རེ་སྐྱོ།། 

༢༠༢༡/༡༠/༡༦