ཞོགས་པའི་ཅོང་བརྡ།

ས་ལྡང་པདྨ་རྒྱལ་མཚན། སྔ་འགྱུར་མཐོ་སློབ་ཆེན་མོ།

ཀྱེ་མ།

དེ་རིང་གི་ཞོགས་པའི་ཅོང་བརྡས།

གཉིད་ཀྱི་མུན་ནང་དུ་ཐིམས་པའི།

ཁྲ་ཁྲ་དང་མཛེས་མཛེས།

དགའ་དགའ་དང་སྐྱིད་སྐྱིད་ཀྱི་མུན་རུམ་ན་ཉུལ་བཞིན་པའི་རྨི་ལམ་ཡང་།

ལ་མོ་ཐོན་པོ་ཞིག་དང་། གཞུང་ལམ་རིང་མོ་ཞིག་གི་ཕ་རོལ་ཏུ། བརླག་པར་བྱས།

རེ་ཞིག སྙིང་ཆུང་དམར་པོའི་ཕར་མཚམས་ཡང་།

ཇེ་མགྱོགས་སུ་སོང་།

ཅི་འདྲའི་ཚེར་བ་ལ་ཨང་།

མ་རེད།  

དེ་ནི་མི་ཚེ་གཉིད་ལས་གསོད་པའི་ཅོང་བརྡ་རེད།

གཞོགས་པའི་ཅོང་བརྡ་དེ།

ཕྲ་སྒྱུས་བསླས་པའི་རྨི་ལམ་ཞིག་གི་དགྲ་བོ་ཡིན་མོད།

འོན་ཀྱང་།

དེ་ནི་མི་ཚེའི་མདུན་ལམ་བཟང་པོའི་གཉེན་དུའང་ཆོག

དེ་ནས།

རང་ཤག་ཕོ་བྲང་དཀར་པོའི་ཕྱི་རོལ་དུ་བརྟོལ་བས།

དེ་རིང་གི་འཁོར་ཡུག་ནི། ནག་ཅིང་ཐིབས་པའི་ན་བུན་གྱིས་བཏུམས་པ།

གནམ་གཤིས་ཀྱང་ལྷག་ཏུ་གྲང་ངར་ལྡན།

འོ་རེད།

སྨིན་དྲུག་ཟླ་བ་ཚེས་པ་རེད།

ས་རྡོ་རྒས་ལ་ཁད་པ་རེད།

ལོ་རྙིང་རྫོགས་ལ་རན་པ་རེད།

ངན་སེམས་དོར་བའི་དུས་ལ་བབས་པ་རེད།

དེ་ནས།

དེ་རིང་གི་གཞོགས་པའི་རང་སྦྱོང་ཡང་འགོ་ཚུགས།

མཐོ་སློབ་ཆེན་མོའི་སློབ་མ་ཚོས།

རྣམ་དཔྱོད་ཀྱི་རལ་གྲི་དབྱིངས་ལ་གདེངས་ཞོར།

བརྩོན་འགྲུས་ཀྱི་མེ་ལྕེ་རྣམ་པར་རྒྱས་པས།

ཤེས་རབ་གླིང་འདི་ཉིད།

རེ་ཞིག་འོད་སྣང་དང་ལྡན་པ་ཞིག་ཏུ་བསྐྲུན་སོང་།

ལྟོས་དང་།

ཤར་ཕྱོགས་རི་བོའི་བརྩེ་ནས།

མཚམས་སྤྲིན་གཞོན་ནུས་ཉིན་བྱེད་དབང་པོ་ལ་བསུ་མ་བྱེད་པ་དང་།

ཤེས་རབ་གླིང་ན་སློབ་མ་ཤེས་རིག་ལ་བརྩོན་བཞིན་པའི་མཛེས་སྡུག་གཉིས།

ཅི་འདྲའི་ཡིད་དབང་འཕྲོག་པ་ལ་ཨང་།

གསོན་དང་།

ཡལ་འདབ་སྟོང་གིས་བསྐོར་བའི་ལྗོན་ཤིང་སྟེང་ན།

བྱ་བྱིའུ་སྣ་ཚོགས་ཀྱི་གྲེ་འགྱུར་དང་།

མཐོ་སློབ་ཀྱི་ལྗོངས་འདིར་གཞུང་ཆེན་བཀའ་པོད་ཁག་གི

གནད་དོན་དང་། རྩ་ཚིག་སྒྲོག་པའི་དབྱངས་གཉིས།

ཅི་འདྲའི་སྙན་འགྱུར་གྱི་དཔལ་དང་ལྡན་པ་ཞིག

མ་ཚད།

དེ་གཉིས་ཅི་འདྲའི་མཚུངས་པ་ལ་ཨང་།

       སྤྱི་ལོ་ ༢༠༢༡ ལོའི་རང་སྦྱོང་སྐབས་སུ་བྲིས་པའི་ཚོར་བ་ཞིག་དེ་རིང་(༢༠༢༢/༠༡/༢༦)ངོ་དེབ་ཏུ་ཕབ།