ཤེས་རབ་རྒྱལ་མཚན། སྔ་འགྱུར་མཐོ་སློབ་ཆེན་མོ།
ལ་ལུང་པ་མང་པོའི་ཕར་རྒྱབ་ཀྱི།།
གནའ་སྔ་མོ་སྔ་མོའི་དུས་ཚོད་དེར།།
ནང་དཀྱུས་མ་དཀྱུས་མའི་ཁྱིམ་ཚང་ནས།།
རྒྱུ་དཔལ་འབྱོར་འཁོས་ཀ་ཞན་ན་ཡང་།།
ལུས་རྒྱན་ཆ་བཀྲོལ་ནས་ཆོས་རྒྱགས་སྦྱངས།།
བུ་སྤུན་གསུམ་སྙིང་དུ་བཅངས་བཅངས་ནས།།
ཡུལ་རི་གྲོང་ག་ཚོད་ག་ཚོད་བསྐོར།།
དབྱར་ཆར་ཆུས་ཙམ་བརྡུངས་ཙམ་མ་བརྡུངས།།
དགུན་ཁ་བས་ཙམ་དང་ཙམ་ཞིག་གཙེས།།
ས་ཐག་རིང་ས་མཐའི་རྒྱལ་ཁམས་ཏེ།།
ལྷོ་རྒྱ་མཚོ་ཆེན་པོའི་ཉེ་འདབས་ཀྱི།།
གནས་འཕགས་ཡུལ་རྒྱ་གར་ལྷོ་ཕྱོགས་སུ།།
མགོན་༧གྲུབ་དབང་བླ་མའི་སྐྱབས་འོག་ཚུད།།
སྐྱབས་བླ་མེད་༧སྐྱབས་རྗེ་གྲུབ་དབང་མཆོག།
ཐུགས་བྱམས་བརྩེའི་ཉི་མ་རང་ཤར་གྱི།།
ཐབས་ཤེས་རབ་འོད་ཀྱི་སྣང་བ་ལས།།
བུ་ལས་ཅན་སྙིང་ལ་འོད་ཟེར་ཕོག།
ཆོས་བླ་མེད་མདོ་སྔགས་ཆོས་སྐོར་ཏེ།།
ལམ་ཐེག་པ་རིམ་དགུའི་གནད་གསང་ལ།།
ལོ་ཧྲིལ་པོ་བགྲང་བྱ་དགུ་ཡི་རིང་།།
བློ་རིག་པས་ཐོས་བསམ་སྒྲོ་འདོགས་བཅད།།
གནས་བླ་མེད་གསང་ཆེན་སྔ་འགྱུར་གྱི།།
སྡེ་ཆེན་པོ་ཆེན་པོ་ཐེག་མཆོག་རྣམ་གྲོལ་གླིང་།།
གྲོགས་བླ་མེད་རྡོ་རྗེ་ཆོས་གྲོགས་འགྲོགས།།
དོན་བླ་མེད་བྱང་ཆུབ་གོ་འཕང་བཙལ།།
གཉེན་བླ་མེད་ཨ་ཞང་ཟླ་བས་གཙོས།།
ལམ་སྟོན་པའི་གཉེན་དང་དགེ་རྒན་གྱིས།།
བློ་རིག་པའི་ཁ་ལོ་བསྒྱུར་བ་ལས།།
ལམ་མ་ནོར་ཆོས་ཀྱི་ལམ་བཟང་ཞུགས།།
དུས་ད་ནི་དགའ་འོ་ལོས་སྐྱིད་དོ།།
ད་གསོན་དང་གཟིགས་དང་ཕ་མ་ལགས།།
ནང་སེམས་ཀྱི་བདེ་དྲོད་ཇི་ལྟར་འབར།།
ཕྱི་གདོང་ལ་འཛུམ་མདངས་ག་ཚོད་རྒྱས།།
ཨ་ཇོས་གཙོས་པའི་སྔ་འགྱུར་རྙིང་མའི་ཞིབ་འཇུག་པ་ཐོག་མ་རྣམ་པའི་གྲུབ་འབྲས་ལ་བསྔགས་བརྗོད་ཡང་ཡང་ཞུ་བ་ལགས།༠༥/༠༦/༢༠༢༢
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།