མཛད་པ་པོ། རྒྱལ་སྲས་ཐོགས་མེད་བཟང་པོ།
ན་མོ་གུ་རུ།
བདག་གཞན་སྒྱུ་ལུས་ཀྱི་ཕུང་པོ་འདི།།
ན་ན་ན་སྟེ་ན་བས་དགའ།།
སྔར་བསགས་ཀྱི་ལས་ངན་འཛད་པ་ཡིན།།
ཆོས་སྤྱོད་ཀྱི་བྱ་བ་སྣ་ཚོགས་ཀྱང་།།
ན་བ་མེད་ན་མེད་དེ་དགའ།།
ལུས་སེམས་བདེ་ན་དགེ་སྦྱོར་འཕེལ།།
མི་ལུས་དོན་ཅན་བྱེད་པ་ཡང༌།།
སྒོ་གསུམ་དགེ་ལ་སྦྱོར་བ་ཡིན།།
འབྱོར་པ་མེད་ན་མེད་དེ་དགའ།།
བསྲུང་བྲལ་གྱི་བྱ་བྲེལ་དེ་ལ་མེད།།
འཐབ་རྩོད་ཀྱི་ཁྲོ་འཁྲུགས་ཇི་སྙེད་པ།།
འཛིན་ཆགས་ཀྱི་ནོར་ལས་བྱུང་བར་ངེས།།
འབྱོར་པ་ཡོད་ན་ཡོད་དེ་དགའ།།
བསོད་ནམས་ཀྱི་དགེ་ཚོགས་སྤེལ་བས་ཆོག།
འཕྲལ་ཕུགས་ཀྱི་ཕན་བདེ་ཇི་སྙེད་པ།།
བསོད་ནམས་ཀྱི་འབྲས་བུ་ཡིན་པར་ངེས།།
མྱུར་དུ་ཤི་ན་ཤི་བས་དགའ།།
རྐྱེན་ངན་གྱིས་བར་དུ་མ་ཆོད་ཅིང༌།།
མཚམས་སྦྱོར་གྱི་བག་ཆགས་བཟང་འགྲོགས་པས།།
མ་ནོར་གྱི་ལམ་དུ་ཚུད་པར་ངེས།།
ཡུན་དུ་གསོན་ན་གསོན་པས་དགའ།།
ཉམས་མྱོང་གི་ལོ་ཐོག་སྐྱེས་པ་ལ།།
གདམས་ངག་གི་རླན་དྲོད་མ་ཡལ་བར།།
ཡུན་དུ་བསྟེན་པས་སྨིན་པར་འགྱུར།།
གང་ཡིན་ཡང་དགའ་བ་སྒོམས་ཤིག་ཨང་།།
ཞེས་པ་ས་སྐྱར་དགེ་བཤེས་ཤིག་གིས་ནད་ལ་སོགས་པ་བྱུང་ན་ཇི་ལྟར་བྱེད་དྲིས་པའི་ལན་དུ་ནད་ལ་སོགས་པ་ལམ་དུ་འཁྱེར་བའི་ཚུལ་འདི། ཆོས་སྨྲ་བའི་བཙུན་པ་ཐོགས་མེད་ཀྱིས་བཀོད་པའོ།། སརྦ་མངྒ་ལཾ།།
ཡོང་ཁུངས།: དོལ་སྨྱོན་ལགས་ཀྱི་ངོ་དེབ་དྲྭ་བ་ལས་བཤུས།
No comments:
Post a Comment
࿐ ལྷན་རྒྱས་ནས་འདི་ག་ངེད་དྲྭ་བའི་རྩོམ་ཡིག་ལ་མགུ་མཆན་དང་དཔྱད་མཆན་སོགས་འདེབས་ཆོག་ལ། མཐའ་ན་དགག་ལན་ཡང་གནང་ཆོག་པས་དེ་དག་ལ་ང་ཚོས་ཅིས་ཀྱང་དགའ་བསུ་ཞུ་བཞིན་ཡོད། ཡིན་ན་ཡང་གང་ཟག་སྒེར་པ་ལ་དམོད་ཚིག་བོར་བ་ལ་སོགས་པ་དང་མི་རིགས་པའི་གནས་ཚུལ་བཀོད་པ་ལ་སོགས་པ་བྱུང་ན། དེ་རིགས་ལ་ངེད་དྲྭ་བས་ངོས་ལེན་གཏན་ནས་ཞུ་ཐབས་བྲལ་བས་ཁྱེད་ཀྱི་མཆན་དེ་རིགས་འགོག་ཐབས་བྱེད་སྲིད།
ཁྱེད་ཀྱིས་མཆན་འདེབས་གནང་བའི་ཚེ། སོ་སོའི་མཚན་དང་། གང་འདེབས་རྒྱུའི་མཆན་རྣམས་ཡིན་ཅིག་བོད་ཡིག་ཐོག་བཀོལ་སྤྱོད་གནང་རོགས་ཞུ་རྒྱུ་དང་། དུས་རྒྱུན་དུ་ཁྱེད་རང་གི་མཚན་དང་གློག་འཕྲིན་ཁ་བྱང་རྣམས་གཅིག་གྱུར་ངང་བེད་སྤྱད་པ་ལ། ཁྱེད་ཀྱི་མཆན་བུ་དང་པོ་དེར་ལེགས་པར་བཀོད་ཡོད་ན། མཆན་བུ་རྗེས་མ་རྣམས་ལ་བསྐྱར་དུ་འབྲི་མི་དགོས་པར་རང་བཞིན་གྱིས་དྲྭ་བར་འཁོད་འགྲོ་བ་ཡིན་པས། དེ་དོན་དགོངས་འཇགས་གནང་རོགས་ཞུ། བཀའ་དྲིན་ཆེ།